Улаанбаатар, 2026 оны нэгдүгээр сарын 9 /МОНЦАМЭ/. Монголын төрийн байгууллагууд ба Хятадын хөрөнгө оруулалттай аж ахуйн нэгжүүдийн хамтарсан дугуй ширээний уулзалт МҮХАҮТ-д өнөөдөр боллоо.

Энэхүү уулзалт нь Монгол Улсын төрийн байгууллагууд болон Хятадын хөрөнгө оруулалттай аж ахуйн нэгжүүдийн хамтын ажиллагааг бэхжүүлэх зорилготой юм.

МҮХАҮТ-ын Ерөнхийлөгч Б.Лхагважав, "Өнөөдрийн байдлаар Монгол, Хятадын хоорондын экспорт, импортын хэмжээ 16.5 тэрбум ам.долларт хүрсэн бөгөөд энэ нь манай улсын нийт гадаад худалдааны 80 орчим хувийг эзэлж байна. Сүүлийн 10 жилийн хугацаанд энэхүү дүн 1 тэрбум ам.доллараас 16 тэрбум ам.доллар хүртэл өссөн нь хамтын ажиллагааны үр дүн" хэмээн тодотгов. Мөн тэрбээр, “Өнөөдрийн уулзалтаар уул уурхай, барилга, хөдөө аж ахуй, хүнсний чиглэлээр Хятадын компани болон холбогдох төрийн байгууллагатай санал солилцлоо. Мөн ашигт малтмалын нөөц ашигласны төлбөр /АМНАТ/-ын тооцоо, бүртгэлийн зөрүү олон жилийн турш ярьж ирсэн. Үүнтэй холбоотой зөвхөн гадаадын хөрөнгө оруулагчид төдийгүй Монголын аж ахуйн нэгжүүд ч татварын өрөнд орох нөхцөл байдал үүссэн. Монгол Улсын хөдөлмөр эрхлэлттэй холбоотой журам, шаардлага нэлээд хатуу тул нарийн мэргэжилтэй гадаад ажиллах хүч оруулж ирэхэд хүндрэлтэй байна. Хаврын чуулганаар хөрөнгө оруулалт, бизнесийн орчинтой холбоотой томоохон багц хуулиуд хэлэлцэнэ. Монгол Улсад Хятадын мянга гаруй компани хөрөнгө оруулалт хийж, үйл ажиллагаа явуулж байна. Дэлхийн өнөөгийн нөхцөл байдал ч хөрш орнуудтайгаа бизнесийн идэвхтэй, нээлттэй харилцаа тогтоох нь ямар чухал болохыг харуулж байна” гэв.

БНХАУ-аас Монгол Улсад суугаа ЭСЯ-ны Эдийн засаг, худалдааны албаны зөвлөх Лиү Жинжи, “Хоёр улсын эдийн засгийн хамтын ажиллагаа уул уурхайн салбар хамгийн чухал байр суурь эзэлж байна. Уул уурхайн салбар дахь хоёр улсын худалдаа, хөрөнгө оруулалтын хэмжээ тодорхой хэмжээгээр өссөн нь үүнийг тод илрэл юм. Хоёр улсын эдийн засгийн хамтын ажиллагаа зөвхөн уул уурхайгаас гадна бусад салбарт хөдөө аж ахуйн салбарт ч бодит ахиц гарсан. Мөн хоёр улсын Засгийн газрууд бодлогын уялдааг эрчимжүүлж, төрийн байгууллага хоорондын харилцаа, хамтын ажиллагааг идэвхтэй хөгжүүлэх нь чухал. Засгийн газар хоорондын хамтын ажиллагааг бэхжүүлэхийн зэрэгцээ Монгол Улс татварын тогтолцоог ойлгомжтой, тогтвортой болгох, хөдөлмөрийн харилцаа болон хөдөлмөрийн хүчийг хамгаалах эрх зүйн орчныг сайжруулах, бизнесийн орчныг нийтэд нь сайжруулах шаардлагатай. Ийм өөрчлөлтүүд хийж чадвал Хятад, Монгол хоёр улсын худалдааны хэмжээ цаашид нэмэгдэж, эдийн засгийн хамтын ажиллагаа илүү өргөжинө гэж үзэж байна” гэлээ.

“Мэргэн тур” компанийн захирал Т.Энхтөр ярихдаа, “Өнөөдөр Хятадын худалдаа, аж үйлдвэрийн танхим болон Монголын худалдаа, аж үйлдвэрийн танхим хамтын ажиллагааны санамж бичигт гарын үсэг зурж байгаад бид ихээхэн ач холбогдол өгч байна. Энэхүү санамж бичиг нь аж ахуйн нэгжүүдэд бодит дэмжлэг болно гэдэгт итгэж байна. Монголын эдийн засаг уул уурхайн экспортод хэт төвлөрсөн хэвээр байна. Уул уурхайгаас гадна хөдөө аж ахуйн гаралтай түүхий эд, бүтээгдэхүүнийг экспортлох асар их боломж бий. Энэ чиглэлд манай компани болон Хятадын худалдаа, аж үйлдвэрийн танхим бодитой дэмжлэг үзүүлнэ гэдэгт найдаж байна. Экспортыг солонгоруулах, малын гаралтай түүхий эд, бүтээгдэхүүнийг БНХАУ-ын зах зээлд тогтвортой гаргах нь нэн тэргүүний чухал асуудал юм. Энэ нь зөвхөн бизнесийн ашиг төдийгүй малчдын орлогыг нэмэгдүүлэх, хөдөө орон нутгийн эдийн засагт бодит хувь нэмэр оруулах ач холбогдолтой. Манай компани савхин жижиг эдлэл зэрэг хөнгөн үйлдвэрийн бүтээгдэхүүн үйлдвэрлэж, экспортолдог. Эдгээр бүтээгдэхүүнийг гадаад зах зээлд гаргахад тодорхой хүндрэл, саад бэрхшээл тулгардаг. Мөн экспортын хувьд Хятадын импортын гаалийн татвар харьцангуй өндөр. Манайд гаалийн татвар дунджаар 5 хувь байдаг бол Хятадын талд 17 хувьтай байна. Энэ татварыг бууруулах боломж, гарц шийдэл бий эсэхийг судална” гэв.

Тус уулзалтад Монголын 230 компани, Хятадын 60 компани оролцож, хамтын ажиллагааны бодит боломж, бизнесийн түншлэлийг хэлэлцэв.

Эх сурвалж: МОНЦАМЭ Агентлаг Г.Цогзолмаа