.png){kind=logo}
ВАШИНГТОН, 2026 оны зургаадугаар сарын 2 /ВВС/. Израилын Ерөнхий сайд Биньямин Нетаньяху болон "Хезболла" бүлэглэлийн төлөөлөгчидтэй хэлэлцээ хийж, нөхцөл байдлыг намжаах шаардлагатай гэдгийг талуудад ойлгуулсан гэж АНУ-ын Ерөнхийлөгч Дональд Трамп даваа гарагт мэдэгджээ. Түүний хэлснээр, Израилын Ерөнхий сайд Бейрут хотын өмнөд хэсэг рүү цэрэг илгээхгүй байхыг зөвшөөрсөн бол Ливаны зэвсэгт бүлэглэл дайралтаа зогсооно гэж амласан байна.
"Израилын Ерөнхий сайд Биби Нетаньяхутай маш үр дүнтэй яриа өрнүүллээ. Тэрбээр Бейрут руу цэрэг оруулахгүй, хэдийн замдаа гарсан байсан цэргүүдийг буцаасан. Үүнээс гадна, өндөр албан тушаалын төлөөлөгчдөөр дамжуулан "Хезболла"-тай маш бүтээлч яриа хэлэлцээ хийлээ. Тэд байлдааны бүх ажиллагааг зогсоохыг зөвшөөрсөн. Израилын тал тэдэн рүү довтлохгүй, тэд ч Израил руу дайрахгүй" гэж Д.Трамп "Truth Social" нийгмийн сүлжээндээ бичжээ.
Д.Трамп уг мэдэгдлийг хийсний дараахан АНУ-д суугаа Ливаны Элчин сайдын яамнаас мэдээлэхдээ, Израил-Ливаны дөрөв дэх үе шатны хэлэлцээ болохын өмнөхөн Израилын тал Бейрутын өмнөд хэсэгт цохилт өгнө гэж мэдэгдсэний дараа "Хезболла" бүлэглэл "харилцан довтолгоогоо зогсоох" тухай АНУ-ын саналыг хүлээн авсан гэв.
"Харилцан довтолгоогоо зогсоох саналыг "Хезболла" бүлэглэл хүлээн авсан тухай баталгааг Ливаны эрх баригчид хүлээн авсан" гэж уг мэдэгдэлд дурджээ. Баталгаа Ливаны Ерөнхийлөгч Жозеф Аун, АНУ-ын Төрийн нарийн бичгийн дарга Марко Рубио нарыг утсаар ярьсны дараа ирсэн гэдгийг мөн дурдсан байна.
Харин Израилын Ерөнхий сайд Б.Нетаньяху мэдэгдэхдээ, хэрэв "Хезболла" довтолгоогоо зогсоохгүй бол Бейрутад цохилт өгнө гэдгээ АНУ-ын Ерөнхийлөгч Дональд Трампад мэдэгдсэн гэжээ. "Хэрэв "Хезболла" манай хотууд болон иргэд рүү халдахаа зогсоохгүй бол бид Бейрут дахь террористуудын байгууламжуудад цохилт өгөх болно гэдгийг Ерөнхийлөгч Трамптай ярихдаа түүнд хэлсэн" хэмээн тэрбээр мэдэгджээ.
Д.Трамп даваа гаргийн орой оруулсан өөр нэгэн постондоо "Ирантай хийж буй хэлэлцээ эрчимтэй горимоор үргэлжилж байгаа" гэж мэдэгдсэн байна.
Израилаас Ливанд цохилтууд өгсний улмаас Ираны хэлэлцээний баг зуучлагчдаар дамжуулан АНУ-тай хийж байсан бүх харилцаа холбоогоо зогсоож байгааг Ираны "Tasnim" мэдээллийн агентлаг үүнээс өмнө мэдээлжээ.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!