Монголын шигшээ баг Азийн аварга шалгаруулах тэмцээний урьдчилсан хоёрдугаар шатанд шалгарлаа

Улаанбаатар, 2026 оны есдүгээр сарын 1 /МОНЦАМЭ/. Сагсан бөмбөгийн 2029 оны Азийн аварга шалгаруулах тэмцээний урьдчилсан нэгдүгээр шатны тоглолтууд боллоо.

Манай улсад зохион байгуулсан тоглолтын үеэр Монголын шигшээ баг гурав тоглохдоо хоёр хожиж, нэг хожигдсоноор хоёрдугаар шатанд шалгарч үлдэв. Тэд эхний тоглолтдоо Вьетнамыг 98:64-өөр буюу 34 онооны зөрүүтэй хожсон. Энэхүү тоглолтод 12 тамирчин бүгд талбайд гарч, бүгд ямар нэгэн байдлаар оноо авчээ.

Харин хоёр дахь тоглолтод Фижигийн шигшээг 102:40-өөр буюу 62 онооны зөрүүтэй ялав. Энэ нь Монголын сагсан бөмбөгийн шигшээ багийн түүхэнд өрсөлдөгчөө хамгийн олон онооны зөрүүтэй хожсон тохиолдол боллоо. Уг тоглолтод Ш.Энхийн-Од бага зэргийн гэмтлийн улмаас өнжсөн бол бусад нь тоглож, бүгд ямар нэгэн байдлаар оноо авсан байна.

Харин хамгийн хүчтэн өрсөлдөгч болох Тайландтай өчигдөр тоглохдоо 66:69-өөр хожигдлоо. Тус багт гурван тэмцээнд дараалан дийлдсэн нь энэ. Манай багаас Ш.Энхийн-Од 21 оноо, 17 самбар, 3 бөмбөг тасалсан амжилтаа багийнхнаа тэргүүллээ. Монголын шигшээ баг хэсгээсээ хоёрдугаар байраар шалгарав.

Ингэснээр Азийн аварга шалгаруулах тэмцээний эрхийн төлөөх урьдчилсан шатны хоёрдугаар тойрогт манай баг гуравдугаар байраар орж байна. Одоо тэд арваннэгдүгээр сард Хонконг, Малайз, Индонез гэсэн гурван багийн эсрэг тоглоно. Хэсгээс шилдэг дөрвөн баг гуравдугаар шатанд шалгарах бөгөөд манай нэг хожил авахад л дараагийн шатны тоглолтоо хийх боломжтой болох юм.