Төрийн банк, Голомт банк, Худалдаа хөгжлийн банкууд ATM-ын хураамжаа буурууллаа

Системийн нөлөө бүхий банкууд болох Төрийн банк, Голомт банк, Худалдаа хөгжлийн банкууд харилцагчаа дээдлэх үүднээс хамтран ажиллахаар болжээ.

Тус хамтын ажиллагааны хүрээнд Төрийн банк, Голомт банк, Худалдаа хөгжлийн банкны харилцагчид дээрх гурван банкны АТМ дээр бэлнээр зарлага гаргахдаа гүйлгээний хураамж 100 төгрөг төлөхөөр болж байгаа бөгөөд 500 төгрөг байсан хураамж нь 400 төгрөгөөр буурч байна. Өөрөөр хэлбэл та тус гурван банкны алиных нь ч харилцагч байсан, Улаанбаатар хот болон орон нутагт байрлах 1000 гаруй ATM төхөөрөмжөөс бэлэн мөнгө авахдаа 100₮-ийн л хураамж төлөх юм.

Арилжааны банкнуудын энэхүү хамтрал нь харилцагчдадаа илүү ойртох, бүтээгдэхүүн үйлчилгээгээ сэтгэл ханамжтай хүргэх зорилготой билээ. Гүйлгээний шинэчлэлийн ажил тус гурван банкны үндсэн системд амжилттай хийгдэж дууссан бөгөөд өнөөдрөөс эхлэн хэрэглээнд нэвтэрлээ.

Төрийн банк, Голомт банк, Худалдаа хөгжлийн банкны хамтрал нь банк санхүүгийн системд нэгэн шинэ хуудас нээж байгаа юм. Хамтын ажиллагааны хүрээнд цаашид ч банк хоорондын үйлчилгээний чанар, хүртээмжтэй байдлыг сайжруулахад нээлттэй байж, хамтын ажиллагаагаа өргөжүүлэхээр зорьж байгаа ажээ.