Исламын Бүгд Найрамдах Иран Улсын нийслэл Тегеран хотноо 5 дугаар сарын 27-30-ний өдрүүдэд Азийн паралимпын хорооны удирдах зөвлөлийн хурал болж өндөрлөв.

Тус хуралд оролцсон Н.Оюунбат нь Азийн паралимпын хорооны удирдах зөвлөлийн гишүүн бөгөөд Эмэгтэйчүүд ба спортын комиссын даргаар 2019 оноос хойш ажиллаж байгаа юм. Тэрбээр “Ханжоу 2022” Азийн паралимпын наадмын бамбар дамжуулагчаар тус хороог төлөөлөн оролцох эрхтэй болсон байна

Энэ удаагийн хурлаар “Ханжоу-2022” Азийн IV пара наадмын бэлтгэл ажлын явцын тайлан болон “Нагоя - 2024”, “Парис - 2024”, Залуучуудын “Ташкент - 2025” паралимпын наадмын зохион байгуулах хорооны тайланг хэлэлцлээ. Түүнчлэн Ираны паралимпын хороо, тус улсын олимп, паралимпын академи, бэлтгэл сургуулилтын төвийн үйл ажиллагаатай танилцсан юм.

Иран Улс нь үндсэн хуульдаа зааснаар Ерөнхийлөгч, Парламент, Шүүхийн засаглалыг хослуулан эрх мэдлийг хуваарилдаг теократ буюу шашны засаглалтай улс юм. Иран улсад хүн төрөлхтний хамгийн эртний соёл иргэншлүүдийн нэг үүссэн хэмээн судлаачид үздэг. Манай эриний өмнөх 4000 жилийн үед Иран улсын нутаг дэвсгэр дээр хүн төрөлхтөн соёл иргэншлийг бүтээж амьдарч эхэлсэн бөгөөд манай эриний өмнөх зургадугаар зууны жилүүдэд Ахеменидийн эзэнт гүрэн (дэлхийн түүхэн дэх хамгийн хүчирхэг эзэнт гүрнүүдийн нэг) үүссэн.

Өдгөө чөлөөт бөх, таеквондо, сагсан бөмбөг, хүндийн өргөлт, суугаа волейбол, паэурлифтинг, буудлага болон байт харвааны төрлөөр олимп, паралимпын наадмын медаль хүртэж байсан олон тамирчидтай.

Ираны залуучууд, спортын сайд Доктор Сажид уулзалтын үеэр эмэгтэй тамирчдыг спортод оролцуулах Иран улсын засгийн газар онцгойлон анхаарч байгаа тухай дурдсан бөгөөд сүүлийн үед жендэрийн эрх тэгш байдлыг хангахад тодорхой үр дүнд хүрч байгаа юм байна. Тухайлбал удахгүй зохион байгуулагдах “Ханжоу 2022” Азийн наадамд өмнөх наадамтай харьцуулахад эмэгтэйчүүдийн оролцоог 50 хувь нэмэгдүүлсэн байна.

Мөн Дэлхийн хөл бөмбөгийн холбооны дэргэдэх хөгжлийн бэрхшээлтэй тамирчдыг дэмжих хөтөлбөрийн хүрээнд зохион байгуулагдах шилдэг тамирчин болон шилдэг төслийг сонгон шалгаруулах шүүгчээр Ази тивийг төлөөлөн сонгогдсон болно. Шилдэг төслийн номинацид шалгаруулсан баг тамирчдыг 2023 оны 9 дүгээр сарын 21-нд болох Дэлхийн хөл бөмбөгийн Саммит үеэр зарлах юм байна.

Ташрамд дуулгахад, Арабын Нэгдсэн Эмират Улсын Дубай хотод 2022 4 дүгээр сард болсон Азийн паралимпын хорооны XXVII дахь чуулганы үеэр “Ханжоу-2022” Азийн паралимпын наадмын бэлтгэл ажлыг хангах зорилгоор тус хорооны Удирдах зөвлөлийн гишүүдийг Наадмын зохион байгуулах хороонд томилох шийдвэрийг гаргасан юм.

Азийн паралимпын наадмын зохион байгуулах хороонд Монгол Улсаас Биеийн тамир, спортын улсын хорооны Гадаад харилцаа, мэдээллийн технологийн хэлтсийн дарга Насанбатын Оюунбат томилогдсон байна.

Ингэснээр тэрбээр энэхүү нэр хүндтэй наадмыг зохион байгуулахад хувь нэмрээ оруулах анхны Монгол хүн болох юм. Н.Оюунбат нь БНХАУ-ын Бээжин хотын Спортын их сургуульд боловсрол судлалын докторын зэрэг хамгаалсан юм. Орос, англи, хятад хэлтэй.

Түүний ажил эрхэлсэн байдлыг товч танилцуулбал, БСШУЯ-ны дэргэдэх Европын сургалтын төвд төслийн зохицуулагч, ЮНЕСКО-ийн БНХАУ-ын Бээжин хот дахь салбарын төв, Азийн спортын менежментийн холбооны тэргүүлэгч гишүүн, Азийн спортын менежментийн холбооны ерөнхийлөгч, Дэлхийн спортын менежментийн холбооны удирдах зөвлөлийн гишүүн, Азийн паралимпын хорооны удирдах зөвлөлийн гишүүн, “Эмэгтэйчүүд ба спорт” комиссын даргаар 2019 оноос сонгогдон ажиллаж байна.

Азийн Паралимпын хороо нь 44 орныг эгнээндээ багтаасан бөгөөд тус хороо нь 14 удирдах зөвлөлийн гишүүнчлэлтэй юм. Н.Оюунбат нь Олон улсын паралимпын хорооны гүйцэтгэх зөвлөлийн гишүүн, “Эмэгтэйчүүд ба спорт” хорооны Ази тивийг төлөөлсөн гишүүн, “Токио-2009” Азийн хүүхдийн паралимпын наадам, “Ванкувер-2010” өвлийн паралимпын наадам, “Гуанжоу-2010” Азийн паралимпын наадам, тэргэнцэртэй тамирчдын 2011 оны дэлхийн наадам, ОХУ-ын Саха улсад болсон “Азийн хүүхдийн V наадам, “Лондон-2012” зуны паралимпын наадамд Монгол Улсын багийн ахлагчаар ажиллаж байв.