.png){kind=logo}
Монгол Улсын Стандарт хэмжил зүйн газар болон БНСУ-ын Эталон, эрдэм шинжилгээний хүрээлэн хооронд 1997 оноос эхлэн Хэмжлийн эталоны нэгж дамжуулалт, судалгаа шинжилгээ, хэмжил зүйн мэргэжлийн хүний нөөцийг чадавхжуулах, техник, хамтын ажиллагааг өргөжүүлэх, сайжруулах чиглэлээр санамж бичиг байгуулан өнөөг хүртэл идэвхтэй хамтран ажиллаж байна.
БНСУ-ын Эталон, эрдэм шинжилгээний хүрээлэнгийн эрдэмтэн судлаачид, мэргэжилтнүүд хоёр байгууллагын хамтын ажиллагааг өргөжүүлэн хөгжүүлэх хүрээнд Стандарт хэмжил зүйн газрын удирдлага, Хэмжил зүйн нэгжийн удирдлагууд болон мэргэжилтнүүдтэй уулзалт, семинар хийж, хоёр байгууллагын албан хаагч нарын дунд Хөлбөмбөгийн нөхөрсөг тоглолт зохион байгууллаа.
Урт, масс, цахилгаан болон шингэрүүлсэн шатдаг хий, байгалийн хийн хэмжих хэрэгслийн шалгалт баталгаажуулалт, хийн тоолуурын загварын туршилт, хийн тоолуур шалгаж баталгаажуулах зориулалттай эталон төхөөрөмж, хийн тоолуур болон бусад хэмжих хэрэгслийн шалгалт тохируулга, нэгж дамжуулалт, эргэлзээний тооцоолол, стандарт арга, аргачлалын талаар зөвлөмж өгч, ажлын туршлага, мэдээлэл солилцох зэрэг хамтарсан уулзалт, семинар зохион байгуулсан юм.
Мөн БНСУ-ын Эталон, эрдэм шинжилгээний хүрээлэнгийн зочид төлөөлөгчдөд Хэмжил зүйн хүрээлэнгийн Масс, Урт, Цахилгааны хэмжлийн эталоны лабораториудтай танилцуулсан юм.
Уулзалт, семинарын дараа хоёр байгууллагын албан хаагч нарын дунд хөлбөмбөгийн “Нөхөрсөг” тэмцээнийг зохион байгууллаа. Хөлбөмбөгийн нөхөрсөг тэмцээнд Монгол, Солонгос улсын Хэмжил зүйн байгууллагын 30 гаруй тамирчид оролцож, авхаалж самбаагаа сорилоо.
Тэмцээнд Стандарт, хэмжил зүйн газрын албан хаагчдаар бүрдсэн хөлбөмбөгийн баг тамирчид 2:1 харьцаагаар хожсон бөгөөд БНСУ-д зохион байгуулах Хөлбөмбөгийн нөхөрсөг тоглолтын урилга, саналыг хүлээн авлаа.
