Монголын хүүхдийн спортын VII наадмын хөгжлийн бэрхшээлтэй хүүхдүүдийн спортын тэмцээний нээлтийн ёслолын ажиллагаа спортын төв ордонд баасан гарагт /2023.09.15/ боллоо.

Одоогоос 15 жилийн тэртээ "Бээжин 2008" зуны паралимпын наадмаас байт харвааны тамирчин Дамбадондогийн Баатаржав Монгол Улсын спортын түүхэнд анхны паралимпын аваргын алтан медалийг эх орондоо авчирч Монгол Улсын Хөдөлмөрийн баатар, гавьяат тамирчин хэмээх эрхэм хүндтэй цол хүртсэн түүхтэй.

Тэр үеэс жил бүрийн есдүгээр сарын 14-ний өдрийг "Монголын паралимпын тамирчдын өдөр" болгон орон даяар тэмдэглэж ирсэн билээ. Хөгжлийн бэрхшээлтэй хүүхдийн спортын энэ удаагийн наадамд олон төрөлт тэмцээнд хөдөө орон нутгийн болон нийслэлийн 9 дүүргийн ерөнхий боловсролын сургуулийн тамирчин сурагчид оролцож байна.

Тэмцээнд оролцож байгаа тамирчид Паралимпын жүдо, хөнгөн атлетик, хонхтой бөмбөг, бочи, дифлимпийн волейбол, ширээний теннис, тусгай олимпийн долейбол, бочи гэсэн 8 төрлөөр өрсөлдөж аваргуудаа тодруулна.

Монголын хүүхдийн спортын VII наадмын хөгжлийн бэрхшээлтэй хүүхдийн спортын тэмцээн 5 өдөр үргэлжилж энэ сарын сарын 20-нд хаалтын ёслолоо хийх юм.

Монгол Улсын паралимпын их гэр бүлийнхэн энэхүү баярын өдрийг паралимпын хос алтан медаль, хос хүрэл медальтай, мөн Дэлхий, тивийн аварга шалгаруулах тэмцээнээс олон арван алт, мөнгө, хүрэл медаль хүртсэн амжилт дүүрэн угтаж байна.

Тодруулбал, “Бээжин-2008” паралимпын аварга /байт харваа/, Хөдөлмөрийн баатар Д.Баатаржав, “Рио-2016” паралимпын хүрэл медальт, “Токио-2020” паралимпын аварга /пауэрлифтинг/ гавьяат тамирчин Э.Содномпилжээ, “Рио-2016” паралимпын хүрэл медальт /жүдо/ Б.Ууганхүү тэргүүтэй манай улсын пара спортын баг тамирчид, багш дасгалжуулагчид үндэсний паралимпын өдрийг тэмдэглэж байгаа юм.

Монголын үндэсний паралимпын хороо /МҮПХ/-ноос хөгжлийн бэрхшээлтэй иргэдийг нийгмийн идэвхтэй амьдралд татан оролцуулах, нийгэмшүүлэх, ажил хөдөлмөр эрхлэх сонирхлыг өрнүүлж ирсэн 30 гаруй жилийн түүхийг бичжээ. Өнөөдөр тэдний дундаас спортын авьяаслаг ур чадвартай өсвөр, залуу тамирчдыг нээн илрүүлж тив, дэлхий, паралимпын наадмын түвшинд өрсөлдүүлэх, залгамж халааг бэлтгэхэд онцгой анхаарч ажилласнаар жил ирэх тусам пара спортыг сонирхогч хүүхэд залуус нэмэгдэж, амжилтаа ахиулсаар байна.

МҮПХ-ноос орон нутагт паралимпын спортыг хөгжүүлэх зорилгоор тогтмол сургалт зохион байгуулах болсон нь хөгжлийн бэрхшээлтэй өсвөр залуу үеийг төдийгүй бүх насныханд их урам, эрч хүч өгөх боллоо. МҮПХ-ны төлөөлөгчийн газар аймаг бүрт амжилттай үйл ажиллагаа явуулж пара спортыг улс орон даяар түгээн дэлгэрүүлэх боломж бүрдэж байна. “Монголын үндэсний паралимпын өдөр”-ийг 2019 оноос эхлэн орон даяар тэмдэглэж байгаа билээ.

Монгол Улсад хөгжлийн бэрхшээлтэй иргэдийн спортын асуудлыг хариуцсан төрийн бус байгууллага /ТББ/ анх 1989 онд Тахир дутуу хүмүүсийн БТС-ын холбоо нэртэй байгуулагдсан. Харин 1995 оноос Монголын паралимпын хороо хэмээх нэртэй болж албан ёсоор байгуулагдсан бөгөөд 2000 онд Олон улсын паралимпын хороо/ОУПХ/-ны гишүүнээр элссэн юм.

Бразил улсын Рио де Жанейро хотноо зохион байгуулсан “Рио-2016” зуны паралимпын XV наадамд пара спортын 5 төрлөөр нийт 8 тамирчин оролцож жүдо бөхөөр Б.Ууганхүү, пауэрлифтингээр Э.Содномпилжээ тус тус паралимпын хүрэл медаль хүртэж манай баг тус наадамд оролцсон 159 орноос 75 дугаар байрт шалгарч байсан.

Харин “Токио-2020” зуны паралимпын XVI наадам /2021.08.24-09.05/-д таеквондо /2/, пауэрлифтинг /1/, байт харваа /2/, жүдо /3/, хөнгөн атлетик /2/, буудлага /1/ гэсэн спортын 6 төрөлд эмэгтэй 4, эрэгтэй 7 нийт 11 тамирчин хурд хүч, ур чадвараа сорин амжилттай оролцож паралимпын наадамд өрсөлдсөн 168 орноос амжилтаараа 59 дүгээр байрт шалгарсан юм.

“Токио-2020” зуны паралимпын XVI наадамд эх орноо төлөөлөн оролцсон баг тамирчдаас пауэрлифтингийн төрөлд 107 кг-ын жинд хүч сорин өрсөлдсөн Энхбаярын Содномпилжээ 245 кг-ыг өргөж, паралимпын дээд амжилт тогтоож, паралимпын аварга болж монголчуудаа баярлуулсан билээ. Мөн паралимпын наадмын таеквондогийн эрэгтэйчүүдийн 61 кг-д хүч үзсэн Г.Болор-Эрдэнэ, эмэгтэйчүүдийн 49 кг-д өрсөлдсөн Х.Энхтуяа нар шагналт байр эзэлсэн юм.

Өнөөдөр дэлхий дээр хөгжлийн бэрхшээлтэй 1.2 тэрбум хүн аж төрж байгаа юм. “Токио-2020” зуны паралимпын XVI наадмын хаалтын үеэр Олон улсын паралимпын хорооны ерөнхийлөгч Эндрью Парсонс: “Дэлхий даяар энэ тамирчид шиг хөгжлийн бэрхшээлтэй 1.2 тэрбум хүн бий гэдгийг үргэлж санаж явах хэрэгтэй” хэмээн онцлон хэлсэн билээ.