.png){kind=logo}
2024 оны УИХ-ын сонгуулийн санал хураалт дуусаж, урьдчилсан байдлаар саналыг нэгтгэн гаргаад байна.
Энэ удаагийн сонгууль 21 нам, эвслээс 1337 хүн нэр дэвшиж, 78 нэр дэвшигчийг тойргоос, 48 хүнийг жагсаалтаас УИХ-ын гишүүн болгож, ирэх дөрвөн жилд парламентад “суулгах” юм.
Энэ удаагийн сонгуулийн урьдчилсан дүнгээр МАН 67, АН 43, ХҮН 8, Үндэсний эвсэл 4, Иргэний зориг ногоон нам 4 суудал авахаар байна.
Сонгогчдын саналаар 2020-2024 оны парламентад гишүүнээр ажилласан нэлээд хүнд “муу” дүн тавьж явуулсны тэргүүн эгнээнд УИХ-ын дарга Г.Занданшатар орлоо. Түүний араас УИХ дахь МАН-ын бүлгийн дарга Д.Тогтохсүрэн, Эдийн засаг хөгжлийн сайд Ч.Хүрэлбаатар ч мөн иргэдийн итгэлийг хүлээж, улиран сонгогдож чадсангүй.
УИХ-ын 1-р тойрог хангайн бүсэд спикер, бүлгийн даргаар ахлуулан 9 мандат олж ирэхээр явсан МАН-ын хоёр нь л буюу Гадаад харилцааны сайд Б.Батцэцэг, УИХ-ын гишүүн Г.Тэмүүлэн нар хоёрыг мандат зулгааснаар тус тойрогт далаараа тавиулчихсан гэхэд болно.
Уг нь тус тойрогт Батлан хамгаалахын сайд П.Сайханбаяр, Эрүүл мэндийн сайд С.Чинзориг, УИХ-ын гишүүн Г.Ганболд нарын туршлагатай парламентчид мөр зэрэгцэн өрсөлдсөн ч өвдөг шороодов.
УИХ-ын 2-р тойрог Увс, Завхан, Ховд, Говь-Алтайнхан Эдийн засгийн байнгын хорооны дарга Ц.Цэрэнпунцагийг бүрэн эрхээс нь чөлөөлсөн бол МАН-ын эмэгтэй гишүүдээс нэлээд нь мөн л муу дүн авч, дахин тангараг өргөхгүй болж байна. Тухайлбал, Сонгинохайрханчуудын итгэлийг хүлээж гишүүн болсон ч дөрвөн жилийн дараа зам салж одсон П.Анужинг Хэнтий, Дорнод, Сүхбаатарын иргэд сонгогчид дэмий биз дээ гээд сонгосонгүй. Сэлэнгэ нутгийн Сөүлээр “овоглодог” Д.Өнөрболор ч мөн Сэлэнгэ, Дархан-Уул, Төв аймаг гэсэн томсгосон тойрогт арай л “барсангүй”.
Баянзүрхийнхэн таван мандатын 4-өө МАН-д итгэл хүлээлгэсэн ч Б.Саранчимэгт дахин боломж олгосонгүй, хоёр удаа парламентад сонгогдсон М.Оюунчимэг Чингэлтэй, Сүхбаатараас сонгогдох хэмжээний саналыг авч чадалгүй УИХ-ын гишүүний бүрэн эрхээ дуусгахаар боллоо.
Увс, Завхан, Ховд, Говь-Алтайд нэр дэвшсэн Б.Баярсайхан мөн л үргэлжлүүлэн ажиллах болзол хангасангүй. Дорноговь, Говьсүмбэр, Өмнөговь, Дундговь буюу УИХ-ын сонгуулийн 7-р тойрогт намаа төлөөлөн нэр дэвшсэн Г.Мөнхцэцэг, Т.Энхтүвшин нарыг ч мөн дөрвөн жилд өөр ажил хий гээд мөн л “чөлөөлчихлөө”.
Ардчилсан Намаас 2020-2024 оны парламентад суусан Н.Ганибал Хэнтий, Дорнод, Сүхбаатар аймагт нэр дэвшээд намдаа суудал авч чадалгүй буцлаа. Хангайн бүсийг АН цэнхэртүүлсэн ч А.Адъяасүрэн нэмэр болж чадсангүй. Увс, Завхан, Ховд, Говь-Алтайд өрсөлдсөн Ш.Адьшаагийн өнгөрсөн дөрвөн жилд муу дүн тавиад буцаалаа.
2020-2024 оны парламентад нэг анги болж явсан 16 нөхөд нэр дэвшсэн ч ийнхүү “ангийн дарга”-ын хамтаар бүрэн эрхээ дуусгавар болголоо.
Эх сурвалж: Gogo.mn
