Дэлхийн хос бөхт тэмээний холбоог Монголд байгуулах санаачилгыг дэмжжээ

Улаанбаатар, 2024 оны долоодугаар сарын 7 /МОНЦАМЭ/. Ази тивийн сүүний түншлэлийн хүрээнд Дэлхийн хос бөхт тэмээний холбоог Монгол Улсад байгуулах санаачилга дэвшүүлснийг Олон улсын тэмээний байгууллагатай хийсэн хоёр талын уулзалтаар дэмжиж, хамтран ажиллахаар болжээ.

Дэлхийд 42 сая тэмээ байдгаас нэг сая гаруй нь хос бөхтэй. Тэмээний бэлчээр, эко орчныг хамгаалах, бүтээмжийг нэмэх, тэмээчдийн амьжиргааг дээшлүүлэх, салбарыг өртгийн сүлжээгээр хөгжүүлэх, сайн туршлагыг нэвтрүүлэх, улс орнууд хамтран ажиллах, НҮБ-аас дэвшүүлсэн Тогтвортой хөгжлийн зорилт, түүний дотор ядуурлыг багасгах, жендерийн тогтвортой байдлыг хангахад тэмээний салбар чухал хувь нэмэр оруулна. Ялангуяа ингэний сүү, сүүн бүтээгдэхүүнийг тогтмол хэрэглэх нь чихрийн шижин, сүрьеэ, харшил, шарлалт, астма зэрэг суурь өвчнөөс урьдчилан сэргийлэх ач холбогдолтой тул тэмээний аж ахуйг сүүний чиглэлд дэмжин хөгжүүлэх, цаашид тэмээний салбарт хамтран ажиллах талаар БНЭУ-ын Кочи хотод өнгөрсөн сарын 26-29-нд болсон Ази Номхон далайн бүсийн сүүний салбарын анхдугаар бага хурлын үеэр онцолжээ.

Энэ үеэр Ази тивийн сүүний түншлэлийн зохицуулагч, Нарийн бичгийн дарга нарын газрын гүйцэтгэх захирал Б.Батбаатар, “Ази тивийн сүүний түншлэлийн хүрээнд хэрэгжүүлж буй үйл ажиллагаа, түүний дотор Дэлхийн сарлагийн холбоо, Дэлхийн хос бөхт тэмээний холбоог Монголд байгуулах хамтын санаачилга, сарлаг, хос бөхт тэмээтэй орнууд хоорондын хамтын ажиллагааг дэмжих, Дэлхийн сүүний өдрийг угтсан сүүний 7 хоног санаачилга, Монгол Улсын Засгийн газар, ХХААХҮЯ, Ази тивийн сүүний түншлэлийн Нарийн бичгийн дарга нарын газар хоорондын идэвхтэй хамтын ажиллагааны талаар илтгэл тавьсан юм.

Хуралд оролцогчид байгаль экологид ээлтэй тэмээний аж ахуйг тогтвортой хөгжүүлэх, тэмээний соёл, уламжлалыг хадгалж хамгаалах, ингэний сүү, сүүн бүтээгдэхүүний эрүүл мэндэд үзүүлэх ач холбогдол, хэрэглээ, үйлдвэрлэл, хөгжлийн боломж, салбарт тулгамдаж буй нийтлэг асуудлыг хэлэлцсэнийг ХХААХҮЯ мэдээллээ.

Олон улсын сүүний холбооны удирдлагатай хийсэн хоёр талын уулзалтаар Ингэний сүүний кодексийн олон улсын стандарт (CAC) боловсруулах ажлын хэсэгт Монголоос төлөөлөл оруулж хамтран ажиллахаар тогтжээ.

Тус хурлын үеэр НҮБ-ын ХХААБ, Ази тивийн сүүний түншлэлийн Нарийн бичгийн дарга нарын газар, Ази Номхон далайн Мал аж ахуй, мал эмнэлгийн комисс, Олон улсын тэмээний байгууллага, БНЭУ-ын Сүүний салбарыг хөгжүүлэх үндэсний зөвлөлөөс хамтран Олон улсын тэмээний жилийн үйл ажиллагааг зохион байгуулсан байна. Ази тив нь дэлхийн сүү, сүүн бүтээгдэхүүний хэрэглээний 60, сүүний үйлдвэрлэлийн 40 гаруй хувийг бүрдүүлдэг аж.