Монгол орны зүг бүрээс хуран цугласан Монголын явган алхалтын холбооны гишүүд, дэмжигчид болох 100 хүн 2023 оны 1 дүгээр сарын 28-нд Улаанбаатар хотоос зүүн хойд зүгт 90 орчим км-т орших Хан Хэнтий нурууны ноён оргил Асралт хайрханыг зорьж далайн түвшнээс дээш 2799 метрт өргөгдсөн оргилд амжилттай гарлаа.

Явган аялагчдын баг тус аяллын замд эх орныхоо онгон дагшин байгаль дэлхий, гайхамшгийг мэдэрч баяр бахдлаар дүүрэн байсныг онцлон хэлэхэд таатай байна. Энэхүү сорилтот аялалд гарахаас өмнө хэд хэдэн удаагийн бэлтгэл алхалтыг зохион байгуулж, туршлагатай алхагчид нь өөрийн туршлага, мэдлэгээ хуваалцаж, сэтгэл зүй, бие махбодийн бэлтгэл хангаж, онлайнаар хүртэл зөвлөгөө өгөх уулзалтыг хийж ярилцсаар ийнхүү товлосон цагтаа зориг шулуудан аяны жолоо залсан юм.

Өглөөний тачигнасан жавар, эрчилсэн салхийг сөрж, эгц өгсүүрт зүтгэж, хунгар цасыг туучин оргилд хүрч, өөрийгөө ялж, хязгаараа давсан хэн бүхний дотор бахархал төрж, огших нь үгээр хэлэх аргагүй сайхан байв.

Энэхүү хөтөлбөрт Багануур дүүргийн явган алхалтын холбооны үүсгэн байгуулагч, Спортын мастер, улсын шүүгч, дасгалжуулагч, 1982 оноос спорт явган аяллыг тасралтгүй хөгжүүлэхэд хувь нэмрээ оруулж байгаа Г.Нансалмаагийн удирдлага дор Дорноговь, Орхон, Дархан-Уул, Сүхбаатар, Хэнтий, Өмнөговь, Увс, Хөвсгөл, Төв аймаг мөн нийслэлийн Багахангай, Багануур, Баянгол, Баянзүрх, СХД-ийн явган алхалтын холбоод, явган алхалтын Хобби, Эрдэнэтийн эрдэнэс клуб, www.facebook.com/groups/mongolwalkers -ийн гишүүд идэвхтэй оролцсон бөгөөд Нийгмийн Эрүүл мэндийн үндэсний төвийн төлөөлж, мэргэжилтэн Х.Бямбасүрэн албан ёсоор оролцож, алхагчдад хөдөлгөөний эрүүл мэндийн талаар төрөөс барьж буй бодлого, үйл ажиллагааны талаар мэдээлэл өгөв.

Тус хөтөлбөрийн хамгийн өндөр настай оролцогч нь 75 настай Л.Ганбаатар, Н.Пүрэвдаш нар бөгөөд хамгийн залуу оролцогч нь 13 настай Б.Уяхан нар байв.

Бэрхшээлийн ард бэлэг

Хүчтэй салхинд хийсчих аядан алхаж, мацах тусам хөл суларч, бие ядарч сульдах боловч олны дэм, хамтын зүтгэл юутай хүчтэй вэ гэдгийг нотлон харуулсан олон сайхан үйл явдлуудаар дүүрэн байлаа. Асралт хайрханд гарахад хоёр огцом өгсүүр авирах бөгөөд бяр тэнхээг шавхаж байв.

Багийн ахлагч нарын шуурхай уулзалт болж баг бүрийн гишүүдийн бие, сэтгэл, эрүүл мэндийн байдлын талаар мэдээлэл авч цаашид алхалтыг үргэлжлүүлэх боломжгүй гишүүдийн талаарх мэдээллийг авсан бөгөөд хэдий шантармаар нөхцөл байдалд байгаа ч эмч нарын зөвлөгөө, анд нөхдийн дэм, өөрийн зориг, бэлтгэлд найдаж өөрийгөө зоригжуулах алхагчдыг харах нь урамтай, нөгөө талаар бахархмаар аж. Гэсэн хэдий ч биднээс 3 алхагч оргилд хүрэх боломжгүй гэж үзэн багийн ахлагчийн шийдвэрээр авиралтыг зогсоов. Гэхдээ зорьсондоо хүрэх цаг хугацаа, уртаас урт сонирхолтой аялал, шинэ боломж дахин дахин ирнэ гэдгийг мэдэж байгаа энэ алхагчдын шийдвэр “ялагдал бус ялалт” байсан гэдгийг онцолмоор байна.

Өнгөрсөн жилээс ялгаатай нь энэ жил салхи, шуурга ихтэй, нүүр нүдгүй цасанд ороолгуулж, нүүр хорсож байлаа. Нэг нэгэндээ сэтгэл зориулж, зөвлөж, туслаж, сэтгэлээ хуваалцаж, дэмжиж буй хүн чанар нь оргилд хүрэхээс өмнө аль хэдийн “хүн бүр ялсан” гэх сэтгэгдлийг төрүүлж байсан юм. Эцэстээ бид хамтдаа оргилд хүрлээ. Гайхалтай нь энэ удаагийн хөтөлбөрт оролцсон алхагчдыг хангай дэлхий ивээж оргилд гарсны дараа ер бусын дулаахан болж, тэнгэр цэлмэг, нар зөөлнөөр ээж, салхи тогтов. Оргил дээр зураг авахуулж, хөгжилдөж, шилдэг гишүүддээ шагнал урамшил олгох таатай боломж гарсан нь таатай байлаа. Энэхүү ялалтыг баталгаажуулж оролцогч бүр амжилтын сертификатаа их уулсынхаа дунд гардан авч, нэгэн гайхамшигтай дурсамжийг бүтээцгээв. Мэргэжлийн тогоочийн удирдлага дор хээрийн хоол, амттай цуйван, банштай цай, ногоотой шөлөөр явган аялагчдаа дайлсан жолооч нарын багийн хөдөлмөр зүтгэлд талархаж, амтархан идэцгээв.

Монголын явган алхалтын холбоо (www.facebook.com/MongolianWalkers) нь 2023 оны туршид сар бүр гадаад улсад нэг алхалтын хөтөлбөр, сар бүр аль нэг аймагт нэг алхалтын хөтөлбөр зохион байгуулж, үндэсний хэмжээнд аймаг, дүүргүүдийн явган алхалтын холбоод 7 хоног бүр тогтмол алхалтуудыг зохион байгуулж байхаар төлөвлөж байгаа юм.

Монгол орныхоо гурван их уулсын нэг Төв, Сэлэнгэ, Хэнтий гурван аймгийн 10 гаруй сумын нутгийг дамнан орших Хан Хэнтий нуруунд хүрч алхсан нийт явган алхагчид, амьдралын нэгэн өдрийн сайхан дурсамжийг хальсанд буулгасан Дорноговь аймгийн явган алхалтын холбооны гишүүн О.Лхагважаргал, зохион байгуулагчдад халуун талархал илэрхийлж, дараагийн явган аялал, алхалтын хөтөлбөрүүдэд нь өндөр амжилт хүсье. Алхалт үнэ цэнийг бүтээнэ.

Монголын явган алхалтын холбоо / Mongolian Walking Association Group