.png){kind=logo}
Парис 2024 Олимпын эрхийн төлөөх Азийн бүсийн эхний шатны D хэсгийн эхний тоглолтоо Монголын эмэгтэй шигшээ баг өчигдөр /2023.04.04/ Сингапур улсын шигшээ багийн эсрэг Тайланд улсын Чонбури цэнгэлдэхэд хийлээ.
Тус тоглолт эхлээд 2 дахь минутад Э.Энхмаргадын дамжуулалтаар Н.Намуунаа тооны харьцааг нээж манай шигшээ баг тэргүүлж эхлэв, харин Сингапурын шигшээ багаас 42' Danielle Tan Liern гоол оруулж тэнцүүлснээр эхний үед 1:1 гэсэн онооны харьцаатай тэнцээгээр өндөрлөв.
Тоглолтын хоёрдугаар үе эхлээд манай шигшээ баг С.Золзаяа, М.Халиут нар солилцоогоор орж ирж анх удаагаа үндэсний шигшээ багтаа тун сайн тоглолт үзүүлэв.
Сингапур улсын шигшээ багийн довтолгоонууд үр дүнгээ өгч 79' Nur Izzatai Rosni гоол оруулснаар 2:1-ээр Сингапурын шигшээ баг тэргүүлж эхэлсэн ч шүүгчийн мэдлийн сунгасан нэмэлт цагийн 90+5'-д Н.Намуунаа гоол оруулж эцсийн мөчид гоол оруулснаар үндэсний шигшээ баг хэсгийн эхний оноогоо авсан юм.
Ингэснээр манай шигшээ багийн охид Олимпын эрхийн төлөөх тэмцээнд хоёр дахь удаагаа оролцож хоёуланд нь оноо авсан гэдэг үзүүлэлт гаргаж байгаа юм.
Дараагийн тоглолтоо 4 дүгээр сарын 07-нд Улаанбаатар хотын цагаар 18.00 цагаас талбайн эзэн Тайланд улсын шигшээ багтай тоглоно.
Өнөөдрийн тоглолтод тун сайн тоглолт үзүүлсэн нийт охидууддаа дараагийн тоглолтод нь МХБХ болон монгол түмэн амжилт хүсэж байна.
