.png){kind=logo}
БЭЭЖИН, 2026 оны нэгдүгээр сарын 5 /Yonhap/. БНСУ-ын Ерөнхийлөгч Ли Жэ Мён БНХАУ-ын удирдагч Ши Жиньпинтэй хэлэлцээ хийхээр ням гарагт Бээжин хотноо хүрэлцэн ирлээ.
Уулзалтын үеэр хоёр улсын удирдагчид Умард Солонгос, эдийн засгийн харилцаа, соёлын солилцоотой холбоотой асуудлуудыг голчлон хэлэлцэх төлөвтэй байна.
Дөрвөн хоног үргэлжлэх төрийн айлчлал нь Ли Жэ Мёны хувьд өнгөрсөн оны зургаадугаар сард үүрэгт ажилдаа орсноос хойш Хятадад хийж буй анхны айлчлал, 2019 оноос хойших Өмнөд Солонгосын Ерөнхийлөгчийн анхны айлчлал болж байна.
Ли Жэ Мён, Ши Жиньпин нар даваа гарагт хэлэлцээ хийх бөгөөд энэ нь тэдний сүүлийн хоёр сарын хугацаанд хийж буй хоёр дахь уулзалт болно. Тэд өмнө нь 11 дүгээр сарын эхээр Гёнжү хотод болсон Ази-Номхон далайн эдийн засгийн хамтын ажиллагааны (APEC) дээд хэмжээний уулзалтын үеэр уулзсан бөгөөд тухайн үед Ши Жиньпин 11 жилийн дараа анх удаа Өмнөд Солонгост айлчилсан юм.
Энэ удаагийн айлчлал нь Өмнөд Солонгосын тал худалдаа, аялал жуулчлал болон Солонгосын хойгт энх тайвныг тогтоох хүчин чармайлтад чухал түнш болох Хятад улстай харилцаагаа тогтвортой хөгжүүлэхийг эрмэлзэж буй үед, мөн Ли Жэ Мёны засаг захиргааны баримталж буй “прагматик” гадаад бодлогын хүрээнд АНУ-тай байгуулсан эвслийг хадгалахыг зорьж буй цаг үед болж байна.
Ши Жиньпинтэй хэлэлцээ хийх үеэрээ Ли Мён Жэ Пёньянтай хурцадсан харилцааг намжаахад дэмжлэг үзүүлэх, мөн Солонгосын хойгийг цөмийн зэвсэггүй болгох үйл явцыг урагшлуулахад хамтран ажиллахыг хүсэх төлөвтэй байна. Энэ нь түүний засаг захиргааны гадаад бодлогын гол зорилтуудын нэг юм.
Тэрбээр мөн бизнесийн салбарын томоохон төлөөлөгчдийн хамт даваа гарагт Бээжинд болох Солонгос-Хятадын эдийн засгийн чуулга уулзалтад оролцож, хиймэл оюун, ногоон эрчим хүч, нийлүүлэлтийн сүлжээ, аялал жуулчлал зэрэг олон чиглэлээр хамтын ажиллагааг өргөжүүлэх асуудлыг хэлэлцэнэ.
Ерөнхийлөгчийн Тамгын газраас мэдээлснээр, талууд янз бүрийн салбарт хамтран ажиллах тухай 10 гаруй харилцан ойлголцлын санамж бичигт гарын үсэг зурах төлөвтэй байна.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!