Азийн хөнгөн атлетикийн холбооны төлөөлөгчид МҮОХ-нд зочилж, хамтын ажиллагааг өргөжүүлэхээр санал солилцов

Монголын Үндэсний Олимпын Хорооны Гүйцэтгэх зөвлөлийн гишүүн П.Буяндэлгэр өнөөдөр Азийн хөнгөн атлетикийн холбооны Хөгжлийн захирал ноён Салман Икбалл Батт, Ерөнхий нарийн бичгийн дарга А.Шүггумарран болон бусад төлөөлөгчдийг хүлээн авч уулзлаа.

Уулзалтын үеэр Монгол Улсад хөнгөн атлетикийн спортыг хөгжүүлэх, олон улсын хамтын ажиллагааг өргөжүүлэх, техникийн мэргэжилтнүүдийг бэлтгэх чиглэлээр хамтран ажиллах асуудлаар санал солилцов.

Уулзалтаар Азийн хөнгөн атлетикийн холбооны Ерөнхий нарийн бичгийн дарга А.Шүггумарран Монголын хөнгөн атлетикийн холбоог цаашид дэмжин ажиллаж МҮОХ-той хамтын ажиллагаагаа өргөжүүлэх сонирхолтой байгаагаа илэрхийллээ. Мөн бүс нутгийн тэмцээн, сургалт, хамтарсан хөтөлбөрүүдийг Монгол Улсад зохион байгуулах боломжийг судалж, идэвхтэй хамтран ажиллахаа илэрхийлэв.

Ташрамд дурдахад, Азийн хөнгөн атлетикийн холбооны Хөгжлийн захирал ноён Салман Икбалл Баттын удирдлага дор World Athletics Technical Officials Education & Certification System – Level 1 сургалт 2026 оны 2 дугаар сарын 11–15-ны өдрүүдэд Монгол Улсад зохион байгуулж байгаа бөгөөд хөнгөн атлетикийн шүүгч, техникийн албан хаагчдын мэдлэг, ур чадварыг олон улсын стандартад нийцүүлэн бэхжүүлэхэд чиглэсэн байна.

Энэ өдрүүдэд Азийн Хөнгөн Атлетикийн Холбооны Хөгжлийн захирал ноён Салман Икбалл Батт болон Ерөнхий нарийн бичгийн дарга ноён Шуггумарран тэргүүтэй албаны хүмүүс Монгол Улсад ажлын айлчлал хийж байна.

Тодруулбал, энэхүү айлчлал нь Монголын Хөнгөн Атлетикийн Холбоо болон Азийн Хөнгөн Атлетикийн Холбооны хамтын ажиллагааг гүнзгийрүүлэх, Монгол Улсад хөнгөн атлетикийн хөгжлийн дунд болон урт хугацааны бодлого, хөтөлбөрийг шинжлэх ухаанд суурилан төлөвлөх зорилготой юм.

Айлчлалын хүрээнд Монголын хөнгөн атлетикийн өнөөгийн нөхцөл байдал, тулгамдсан асуудал, хөгжлийн тэргүүлэх чиглэлүүдэд иж бүрэн үнэлгээ хийж, холбооны хөгжлийн бүтцийг сайжруулах дараах гол чиглэлүүдэд онцгойлон анхаарна. Үүнд:

• Дасгалжуулагчийн боловсрол, мэргэшлийг сайжруулах (CECS)

• Хөнгөн атлетикийн шүүгчийн боловсрол, гэрчилгээжүүлэлт (WARECS)

• Тамирчны ур чадварыг хөгжүүлэх шаталсан хөтөлбөр

• Тэмцээн, уралдааны тоо, чанарыг нэмэгдүүлэх, олон улсын стандарттай уялдуулах

Айлчлалын хөтөлбөрийн хүрээнд:

• Монголын Хөнгөн Атлетикийн Холбооны удирдлагуудтай уулзалт хийх

• Азийн Хөнгөн Атлетикийн Холбооны Хөгжлийн захирал Салман Икбал дасгалжуулагчийн хөгжил (CECS), шүүгчийн хөгжил (WARECS)-ийн талаарх албан ёсны танилцуулга хийх

• Азийн хөнгөн атлетикийн тэмцээн хариуцсан захирал Cuddikotta Valson 2-р сарын 11-15 өдрүүдэд техникийн ажилтан болон шүүгчдийн ОУ-ын сертификаттай сургалт зохион байгуулна. (World athletics technical officials education & certification system level I courses)

• Бэлтгэлийн бааз, тэмцээн зохион байгуулдаг талбай, спортын байгууламжуудтай танилцах

• Хөнгөн атлетикийн дасгалжуулагчид болон шүүгчидтэй уулзалт хийж, санал солилцох

• Цаашдын хамтын ажиллагааны чиглэл, боломжуудыг тодорхойлох ажлууд хийгдэнэ

Энэхүү айлчлалын үр дүнд Монголын Хөнгөн Атлетикийн Холбоонд зориулсан бодит нөхцөлд тулгуурласан, хэрэгжих боломжтой, цогц хөгжлийн хөтөлбөр боловсруулах суурь тавигдах бөгөөд Монголын хөнгөн атлетикийн олон улсын түвшинд өрсөлдөх чадварыг дээшлүүлэхэд чухал хувь нэмэр оруулах юм.

Монголын Хөнгөн Атлетикийн Холбоо нь цаашид олон улсын түншлэл, хамтын ажиллагаанд нээлттэй байж, тамирчин, дасгалжуулагч, шүүгчид, техникийн ажилтнуудын хөгжлийг тогтвортой хангах бодлогыг тууштай хэрэгжүүлсээр байх болно.

Мөн холбогдох төрийн болон олон нийтийн байгууллагуудын удирдлагатай албан уулзалт зохион байгуулах юм байна.