.png){kind=logo}
ДУБАЙ/ВАШИНГТОН, 2026 оны гуравдугаар сарын 3 /Reuters/. Ираны эсрэг явуулж буй АНУ, Израилын цэргийн ажиллагаа өчигдөр буюу даваа гарагт улам өргөжиж, нөхцөл байдал хурцадсаар байна. Хезболла бүлэглэлийн цохилтын хариуд Израил улс Ливаны нутаг дэвсгэрт цохилт өгч эхэлсэн бол Техраны зүгээс АНУ-ын цэргийн баазууд байрлаж буй Персийн булангийн орнуудыг чиглэсэн дайралтаа үргэлжлүүлсээр байна.
АНУ-ын Ерөнхийлөгч Дональд Трамп энэхүү ажиллагаа хэдэн долоо хоногийн турш үргэлжилж болзошгүй гэж мэдэгдээд, өнгөрсөн амралтын өдрүүдэд эхлүүлсэн ажиллагааны үеэр Ираны дээд удирдагч Аятолла Али Хаменеи амь үрэгдсэний дараа нөхцөл байдлыг хэн хянаж байгаа нь тодорхойгүй байна гэв.
Ираны эсрэг эхлүүлсэн энэхүү ажиллагаа нь Персийн булангийн бүс нутгийг дайны галд автуулж, Иран, Израил, Ливанд олон арван энгийн иргэд амиа алджээ. Түүнчлэн дэлхийн агаарын тээврийн салбарт хямрал үүсгэснээс гадна, дэлхийн газрын тосны худалдааны тавны нэг нь дамжин өнгөрдөг Ормузын хоолойн тээвэрлэлтэд тасалдал үүсгэснээр газртын тосны үнэ огцом өсөж эхлээд байна.
Түүнчлэн Кувейтийн тал Ираны дайралтын үеэр АНУ-ын "F-15E" загварын гурван сөнөөгч онгоцыг андуурч сөнөөжээ. АНУ-ын Зэвсэгт хүчний Төв командлалаас мэдээлснээр, онгоцны багийн зургаан гишүүн бүгд шүхрээр бууж, эсэн мэнд аврагдсан байна.
Одоогоор АНУ-ын тал Ираны нутаг дэвсгэр дэх 1250 гаруй байгууламжид цохилт өгч, тус улсын 11 хөлөг онгоцыг устгаснаа зарлаад байна.
Ерөнхийлөгч Д.Трампын хувьд АНУ болон түүний холбоотнууд олон жилийн турш дайснаа гэж үзэж ирсэн Иранд цохилт өгсөн нь сүүлийн хэдэн арван жил дэх гадаад бодлогын хамгийн том эрсдэлтэй алхам болж байна. Тэрбээр Ираны зүгээс учруулж буй аюул занал нь дайн эхлүүлэх хангалттай үндэслэл болсон гэж үзэж байгаа боловч үүнийг батлах тодорхой нотлох баримтуудыг дэлгээгүй гэж зарим хууль тогтоогчид шүүмжилж байгаа юм.
Өмнө нь сураггүй болсонд тооцогдож байгаад даваа гарагт амь үрэгдсэн нь тогтоогдсон хоёр цэргийг оруулаад АНУ-ын зургаан цэргийн алба хаагч Иранаас Кувейтэд өгсөн хариу цохилтод өртөн амиа алдсан байна.
"Reuters/Ipsos"-оос явуулсан санал асуулгаас үзэхэд америкчуудын дөрөвний нэг нь энэхүү цэргийн ажиллагааг дэмжиж байгаа тул уг ажиллагаа нь энэ онд болох Конгрессын завсрын сонгуульд Бүгд найрамдах намын хувьд улс төрийн томоохон эрсдэл дагуулж болзошгүй байна.
Эх сурвалж: МОНЦАМЭ Агентлаг Г.Энх-Од
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!