.png){kind=logo}
Шүүхийн шийдвэр гүйцэтгэх ерөнхий газрын харьяа 407 дугаар нээлттэй, хаалттай хорих анги тус ангийн даргаар ажиллаж байсан бэлтгэл хурандаа Д.Дэнсмаа агсны нэрэмжит “Шүүхийн шийдвэр гүйцэтгэл ба эмэгтэйчүүд” сэдэвт эрдэм шинжилгээний хурлыг өнөөдөр (2024.04.26) амжилттай зохион байгууллаа.
Энэхүү хурлын зорилго нь шүүхийн шийдвэр гүйцэтгэх ажиллагааны явцад эрх нь хөндөгдөж буй эмэгтэйчүүдийн талаарх эрх зүйн зохицуулалт, уламжлал, шинэчлэлийн асуудлыг шинжлэх ухааны үндэслэлтэй судлан, гарц шийдлийг тодорхойлохын зэрэгцээ эмэгтэйчүүдийн ял эдлүүлэх чиглэлээр судалгааны ажилд оролцогчдын хүрээг тэлэх, судлаачдын оролцоог нэмэгдүүлэхэд оршиж байна.
Эрдэм шинжилгээний хурлын нээлтэд Хууль зүй, дотоод хэргийн дэд сайд Б.Солонгоо, МУИС-ийн Эмерит профессор, Шинжлэх ухааны гавьяат зүтгэлтэн, академич С.Нарангэрэл оролцсоны зэрэгцээ Хууль зүйн сайдаар 1990-1992, 1996-1998 онд ажиллаж байсан, Дотоод хэргийн их сургуулийг түшиглэсэн Докторын зэрэг хамгаалуулах зөвлөлийн дарга, академич Ж.Амарсанаа мэндчилгээ ирүүлснийг уншиж сонордуулав.
Хууль зүй, дотоод хэргийн дэд сайд Б.Солонгоо хорих ял шийтгэгдсэн эмэгтэйчүүдийн эрхийг хангах, ялангуяа олон улсын стандарт шаардлага хангасан орчин нөхцөлийг бүрдүүлэх, хүний нөөцийн бодлогыг дэмжих талаар Хууль зүй, дотоод хэргийн яамнаас тодорхой ажлуудыг шат дараатай хийхээр төлөвлөж байгааг дурдаад хурлаас гаргасан эрх зүйн орчныг сайжруулах, хүний эрхийг хүндэтгэн бэхжүүлэхэд чиглэсэн санал, санаачилгыг дэмжин ажиллахаа илэрхийлэв.
Эмэгтэйчүүдийн хорих тасаг, ангийн даргаар ажиллаж байсан бэлтгэл хурандаа Д.Дэнсмаа агсны үр хүүхдүүд, хамтран зүтгэж байсан ахмад ажилтнууд тус хуралд оролцсон бөгөөд Д.Дэнсмаа агсны намтар, түүхээр мэдээлэл хийсэн юм.
Хуралд оролцогчдын зүгээс нийт 30 гаруй илтгэл ирүүлснийг нэгтгэн эмхэтгэл болгон хэвлүүлсний зэрэгцээ хорих ял шийтгэгдсэн эмэгтэй хүнийг нийгэмшүүлэх ажил, ял эдлүүлэх орчин, хөдөлмөр эрхлэлт, сэтгэл зүйн онцлог, тэдгээрийн эрхийг хангах асуудал, жирэмсэн болон 0-2 настай хүүхэдтэй эхийн эрх, үүргийн талаар хөндсөн 8 судлаачийн илтгэлийг сонгон хэлэлцүүлж, санал бодлоо солилцсон бөгөөд цаашид хэрэгжүүлэх арга хэмжээний талаар холбогдох байгууллагад уламжлахаар тогтлоо.
Тус эрдэм шинжилгээний хуралд Хууль зүйн дотоод хэргийн яам, Улсын дээд шүүх, Улсын ерөнхий прокурорын газар, Нийслэлийн прокурорын газар, Хүний эрхийн үндэсний комисс, Шүүхийн шийдвэр гүйцэтгэх ерөнхий газар, Нийслэлийн Засаг даргын тамгын газар, Жендерийн үндэсний хороо, Шинжлэх ухааны академийн Философийн хүрээлэн, Хууль зүйн үндэсний хүрээлэн, Монгол Улсад суугаа БНФУ-ын Элчин сайдын яам, Монголын Эмэгтэйчүүдийн холбоо, БЗД-ийн Иргэдийн төлөөлөгчдийн хурал, Монголын Эмнести интернэшнл олон улсын байгууллага, Монголын Өмгөөлөгчдийн холбооны удирдлагууд, Шүүхийн шийдвэр гүйцэтгэх ерөнхий газрын харьяа зарим хорих анги, байгууллагын албан хаагч, ахмад ажилтны төлөөлөл, Дотоод хэргийн их сургууль, Шинжлэх ухаан технологийн их сургууль, Монгол Улсын Боловсролын их сургууль, Монголын Үндэсний их сургууль, Их засаг олон улсын их сургууль, Орхон их сургууль, Шихихутуг их сургууль, Сити их сургууль, Глобал удирдагч их сургуулиудын эрдэмтэн судлаачид, багш, суралцагчид, Шүүхийн шийдвэр гүйцэтгэл судлалын судалгааны профессорын багийн гишүүд зэрэг 150-аад гаруй төлөөлөл биечлэн, АНУ-ын Юта мужийн Их сургууль, ОХУ-ын Буриадын Их сургуулийн төлөөлөл цахимаар оролцлоо.
