.png){kind=logo}
Монгол Улсын Засгийн газар, БНСУ-ын Засгийн газар хоорондын хэлэлцээрийн дагуу “Архивын ерөнхий газрын цогцолбор барилгын тоног төхөөрөмж, техник хэрэгслийн хангалт” төслийг Хууль зүй, дотоод хэргийн яам хариуцан Архивын ерөнхий газарт 2022 оноос хэрэгжүүлж эхэлжээ.
Энэ төслийн хүрээнд Үндэсний төв архивд хадгалагдаж буй кино, гэрэл зураг, дуу авианы баримт болон зураг төслийн баримтыг тоон хэлбэрт шилжүүлж, цахим сан бүрдүүлэх, хадгаламжийн санд RFID систем нэвтрүүлэх, бүх баримтыг бар коджуулах, төрийн архивуудын мэдээллийн санг нэгтгэх, сэлбэн засах, сэргээн шинэтгэх лаборатори, АЕГ-ын хурлын танхим, сургалтын танхим, үзэсгэлэнгийн танхим, серверийн өрөөг шинэчлэн тохижуулах, агааржуулалт, салхивчийн системийг солих, орчин үеийн, өндөр хүчин чадалтай техник хэрэгсэл, тоног төхөөрөмжөөр хангах, төрийн архивын CAMS, албан хэрэг хөтлөлтийн GAS, архивын портал системийг хийж ашиглалтад оруулах зэрэг өргөн хүрээтэй ажлууд хийгдэж байна. 
Мөн АЕГ болон төрийн архивуудын удирдлага, ажилтнуудын чадавхийг бэхжүүлэх сургалтыг 08 дугаар сарын 05-наас 30-ны өдрүүдэд 4 долоо хоногийн хугацаатай, 4 өөр сэдвийн хүрээнд зохион байгуулах бөгөөд Солонгос Улсын Гадаад хэлний их сургуулийн Магистр, докторын сургалт-мэдээлэл, архивын баримт бүртгэлийн тэнхимийн багш Жу Мин Жи, БНСУ-ын Үндэсний Архивын газрын Баримт бүртгэл судлаач Жон Сү Жин, RM Soft компанийн MasterCell Pro / Бүртгэл менежментийн мэргэжилтэн архивч Мин Сон Хе, RM Soft компанийн төслийн гүйцэтгэх удирдагч/ Бүртгэл менежментийн мэргэжилтэн Ким Бүе-ын, Цахим кино, соёлын архивын газрын дарга Пак Жү Вон, RM Soft компанийн хилийн чанад дахь бизнес хариуцсан хэлтсийн дарга Ким Ён Сан, Уран зургийн хадгалалт, сэргээн засварлалтын мэргэжилтэн У Сон Хэ нар хичээл орох юм байна. 
Өнөөдөр төрийн архивуудын удирдлагуудад зориулсан сургалт эхэлж байна. 
Энэ сургалтыг хийснээр төрийн архивын ажилтнууд шинэ мэдлэг эзэмшээд зогсохгүй Архив, албан хэрэг хөтлөлтийн тухай хуульд заасан Төрийн архивт зайлшгүй байх орон тооны ажилтнуудыг мэргэшүүлэхэд чухал ач холбогдолтой гэж зохион байгуулагчид үзэж байна.
