.png){kind=logo}
Эрсдэлийн Үндэсний Форум 14 дэх жилдээ Монгол Улсын Шадар сайдын ивээл дор “Эрсдэл ба Стандарт” сэдвийн хүрээнд зохион байгуулна.
Тус форум нь улс оронд тулгарч болзошгүй нийгэм, эдийн засаг, гамшгийн эрсдэлүүд, тэдгээрээс урьдчилан сэргийлэх арга замын талаар хэлэлцэж бодит шийдлийг эрэлхийлж, төр, хувийн хэвшил, иргэний зүгээс эрсдэлийг удирдахад тодорхой хувь нэмэр оруулсаар ирсэн билээ.
Энэ удаад Шадар сайдын ажлын алба, Онцгой байдлын ерөнхий газар, Стандарт хэмжил зүйн газар хамтран Нийслэл болон 21 аймгийн хэмжээнд зохион байгуулж, цар хүрээгээ өргөтгөсөн онцлогтой болж байна.
Форум дараах сэдвийг хөндөнө. Үүнд:
- Нийгэм болоод гамшгийн эрсдэлийн өсөлт, урьдчилан сэргийлэх аргууд
- Гамшгаас хамгаалах бэлэн байдал ба хамтын ажиллагаа
- Эдийн засгийн эрсдэл түүнийг удирдах, шилжүүлэх санхүүгийн бодлого
- Барилга, дэд бүтцийн салбарын эрсдэлийг бууруулах бодлого, арга хэмжээ дэд сэдвүүдийн хүрээнд зохион байгуулагдана.
Форумын үйл ажиллагаанд төр, иргэний нийгэм, хэвлэл мэдээллийн байгууллага болон НҮБ-ын Хүнс, Хөдөө аж ахуйн байгууллага, Хүүхдийн Сан, Хүн амын сан, ДЭМБ, МУЗН зэрэг олон улсын байгууллагуудын 1500 гаруй төлөөлөл оролцох юм.
Эрсдэлийн форумыг өнгөрсөн 13 жилийн хугацаанд “Мандал Санхүүгийн Нэгдэл” тасралтгүй зохион байгуулж ирсэн бөгөөд эрсдэлийн талаарх 100 орчим илтгэл, 150 панелистуудын оролцсон хэлэлцүүлэг, 13 удаагийн эрсдэлийн тайланг эмхлэн гаргасан байна.
Дашрамд дурдахад: 2023 оны 5-р сард Улаанбаатар хотод хөрсний нянгийн бохирдлын судалгаа хийж 76 цэгээс хөрсний дээж авч шинжлэхэд нийт дээжийн 88 хувьд нян, хөгц мөөгөнцөр илэрсэн бол гэр хороолол орчмын дээжний 93 хувьд нян, хөгц, мөөгөнцөр илэрчээ. Мөн Улаанбаатар хот дэлхийн хамгийн агаарын бохирдол ихтэй нийслэл хотуудын нэг ба дэлхийд 2022 оны байдлаар 28-т бичигдэж байна. Жилийн хамгийн хүйтэн өдөр PM2.5 бохирдлын өдрийн дундаж шоо метрт 687 микрограм хүрч байсан нь ДЭМБ-ын зөвлөж буй аюулгүй төвшнөөс 27 дахин их байсан юм.
Үүнээс гадна нийт зам тээврийн ослын 25,9 хувьд хүүхэд хохирч, нийт 810 хүүхэд бэртэж, 76 хүүхэд амь насаа алдсан байна. Хамгийн ноцтой нь жолоочийн буруутай үйлдлээс бол амь нас, эрүүл мэндээрээ хохирсон хүүхдийн тоо 605 буюу 77.6 хувийг эзэлсэн байна. Харин Монгол Улсад 2022 онд зам тээврийн 481 ослын улмаас 539 хүн амь насаараа хохирсон. Зам тээврийн ослоор амиа алдсан хүний тоог өнгөрсөн онтой харьцуулахад улсын хэмжээнд 40.7% өссөн, үүнд орон нутагт 69.7%-иар өссөн үзүүлэлт гол нөлөөг үзүүлжээ. Нийслэлийн хэмжээнд 25.9%-иар буурсан үзүүлэлттэй байна.
.jpg)
