“White Lotus”-ын шинэ бүлэг гарсны дараа Тайландыг зоригчдын тоо эрс өсжээ

БАНГКОК, 2025 оны гуравдугаар сарын 7 /CNBC/. Америкийн HBO телевизийн бүтээл болох “White Lotus” цуврал киноны гуравдугаар бүлэг хоёрдугаар сарын 16-нд дэлгэцэнд гарсны дараа нийгмийн сүлжээнд Тайландын тухай нийтлэлийн тоо 60 хувиар өсжээ.

Эммигийн шагнал хүртсэн “White Lotus” цувралын шинэ бүлгийн үйл явдал Тайландын Ко Самуй арал дээр өрнөсөн бөгөөд эхний бүлгүүдийн зураг авалт хийгдсэн Италийн Сицили, Хавайн Мауи арлуудын нэгэн адил аялагчдын сонирхлыг ихэд татах төлөвтэй байна. Зураг авалт хийсэн газруудад аялагчид олноор ирж байгаа тул “White Lotus”-ын нөлөө гэх нэр томьёо, хэллэг ч хэдийн бий болжээ.

Нийгмийн сүлжээн дэх мэдээлэлд дүн шинжилгээ хийдэг “Sprout Social” компанийн мэдээлснээр, цуврал гарахаас өмнө болон дараа нийгмийн сүлжээний хэрэглэгчдийн нийтлэлд дүн шинжилгээ хийхэд хоёрдугаар сарын 16-26-ны хооронд “White Lotus”-ын тухай 500 мянган хэрэглэгч 1.38 сая удаа дурдсан байна. Үүнээс ихэнх яриа Тайландад (86 016) өрнөсөн бол АНУ (45 728), Бразил (18 613) удаалсан ажээ.

Түүнчлэн тэдгээр харилцан яриа нийт 8.4 сая гаруй хэрэглэгчийг татсан бөгөөд лайк дарж, сэтгэгдэл бичиж, нийтлэлийг хуваалцсан хүмүүсийн 85 хувь нь эерэг хандлагатай байсныг дурдсан байна. Эдгээр нийтлэл маш өргөн цар хүрээг хамарсан нь маш чухал гэдгийг тус компанийн нийгмийн сүлжээ хариуцсан захирал Рачаэл Гулет хэлжээ. Дээрх мэдээллийг X, YouTube, Reddit, Tumblr зэрэг нийгмийн сүлжээнүүдэд өрнөсөн харилцан яриан дээр үндэслэн гаргасан байна. “Хүмүүс зөвхөн шоуны талаар бус харин Тайланд руу аялах тухай ярьцгааж байна” гэж Р.Гулет хэллээ.

Мөн энэхүү цувралын шинэ бүлэгт урьд өмнө байгаагүй нэгэн онцлох зүйл байгаа нь поп хөгжмийн од бүсгүй юм. Жүжигчдийн бүрэлдэхүүнд Өмнөд Солонгосын К-поп урсгалаар уран бүтээлээ туурвидаг “Blackpink” хамтлагийн гишүүн Лиза буюу Лалиса Манобан багтжээ. “Instagram”-д 105 сая орчим дагагчтай Лиза шинэ бүлэгт Мүүк гэх бүсгүйн дүрээр жүжигчний замналаа эхлүүлсэн байна.

Эх сурвалж: МОНЦАМЭ Агентлаг Э.Хулан