Монгол Улс COP17-г зохион байгуулах орон болохыг албан ёсоор баталгаажуулав

Улаанбаатар, 2025 оны хоёрдугаар сарын 22 /МОНЦАМЭ/. БОУАӨ-ийн сайд С.Одонтуяа, Цөлжилттэй тэмцэх тухай НҮБ-ын конвенцын Гүйцэтгэх нарийн бичгийн дарга Ибрахим Тиав нар Монгол Улс “Талуудын 17-р бага хурал” (COP17)-г зохион байгуулах орон болохыг баталгаажуулж, ХБНГУ-ын Бонн хот дахь НҮБ-ын байранд гарын үсэг зурлаа.

Ингэснээр Монгол Улс Цөлжилттэй тэмцэх тухай НҮБ-ын конвенцод нэгдсэн орсон 197 орныг цөлжилт, газрын доройтол, ган гачигтай тэмцэх ажлыг урагшлуулах зорилгоор нэгтгэсэн дэлхийн томоохон хурлыг 2026 онд зохион байгуулах эрхээ баталгаажуулж байгаа юм.

Манай улс тус хурлыг зохион байгуулах хүсэлтээ илэрхийлж, 2022 оны 5 дугаар сард олон улсын түвшинд дэмжүүлэн, энэ чухал хурлыг эх орондоо зохион байгуулах эрхээ авсан билээ. Монгол Улс цөлжилт, газрын доройтол, ган гачигтай тэмцэх дэлхийн хүчин чармайлтад манлайлан оролцохоо ийнхүү бататгалаа. Манай улсын газар нутгийн 76.9 хувь нь цөлжсөнөөр малчдын амьдрал, биологийн олон янз байдал, хүнсний аюулгүй байдалд ноцтой нөлөөлж байгааг шийдэх шаардлагатай байгаа. СОР17 хурлыг зохион байгуулснаар Монгол Улс тогтвортой газрын менежмент, нөхөн сэргээлтийн үйл хэрэгт тэргүүлэх үүрэгтэй оролцож, улс орнуудын Засгийн газар, шинжлэх ухааны байгууллага, бизнес эрхлэгч, нутгийн иргэд, залуусын оролцоог нэмэх боломж бүрдэнэ.

Тус бага хурал нь газрын нөхөн сэргээлт, ган гачигт тэсвэртэй байдлыг бэхжүүлэх, тогтвортой газрын менежментийн хөрөнгө оруулалтыг нэмэх, Монгол Улсын бэлчээрийн экосистемийн нөхөн сэргээх бодлого, уур амьсгалын өөрчлөлтөд дасан зохицох үйл ажиллагааг дэлхий нийтэд таниулахад ач холбогдолтой юм. Монгол орон болон бүс нутагт шар шороон шуурга улам нэмэгдэж, эрүүл мэнд, хүрээлэн буй орчинд аюул учруулж байна. Энэ сорилт нь дан ганц Монголын асуудал биш Хятад, Япон, Солонгос улсад нөлөөлөхөөс гадна Номхон далайг гатлан Хойд Америк хүртэл хүрчээ. Тиймээс бүс нутаг, олон улсын хамтын ажиллагааг бэхжүүлэх, газрын доройтлоос урьдчилан сэргийлэх, тогтвортой менежментийн шийдлийг хэрэгжүүлэх нь чухал байгаа юм.

Монгол Улс цөлжилт, газрын доройтлыг багасгах бодит алхам хийж, "Тэрбум мод" үндэсний хөдөлгөөн өрнүүлэн доройтсон газрыг нөхөн сэргээх, уур амьсгалын өөрчлөлтөд дасан зохицоход тодорхой үр дүнд хүрээд байна. Монголчууд олон мянган жилийн нүүдэлчин уламжлалтай, унаган байгаль, бэлчээртэй харилцан шүтэлцээтэй амьдарч ирсэн ард түмний хувьд бэлчээрийн тогтвортой менежментийг дэлхийд сурталчлах, анхаарлын төвд оруулах, олон улсын хамтын ажиллагааг өргөжүүлэхэд үнэтэй хувь нэмэр оруулах үүрэгтэй. Тиймээс манай улс "Бэлчээр, нүүдлийн мал аж ахуй эрхлэгчдийн олон улсын жил-2026" (IYRP 2026) санаачилгыг НҮБ-ын түвшинд батлуулсан. Талуудын 17 дугаар бага хурлын үеэр энэ санаачлагаа баталгаажуулж "Ирээдүйн төлөөх бэлчээрийн олон улсын эвсэл"-ийг байгуулах санаачилгыг эхлүүлээд байна. Энэ нь Монгол Улс дэлхий дахины ногоон хөгжлийн манлайлагч байхад томоохон хувь нэмэр оруулах эхлэл болох юм.

Талууудын 17 дугаар бага хурал нь зөвхөн хурал, хэлэлцүүлэг төдий бус, бодитой шийдлийг хэрэгжүүлэх чухал тавцан байх болно гэдгийг БОУАӨЯ мэдээллээ.

Эх сурвалж: МОНЦАМЭ Агентлаг Б.Оюундэлгэр