.png){kind=logo}
Японы мэргэжлийн сумо бөхийн Токио хотноо үргэлжилж байгаа тавдугаар сарын Нацү башёгийн 12 дахь өдрийн /2023.05.25/ барилдааны тоймыг та бүхэнд танилцуулж байна.
Их аварга Тэрүнофүжи Г.Ган-Эрдэнэ, 12 дахь өдрийн барилдаанд Сэкиваке Вакамотохару-тай таарч барилдан түүнийг ёритаоши мэхээр давж 11 даваа, 1 унаатай болж башёг ганцаараа тэргүүлж эхэллээ.
Сэкиваке Хошёорюү С.Бямбасүрэн, өнөөдөр Хокүсейхо Э.Даваанинж /М-11/тэй хүч үзэж түүнийг ошидаши мэхээр хаяснаар тэд адилхан 8 даваа, 4 унаатай боллоо.
Энэ өдөр Сэкиваке Кирибаяама Б.Лхагвасүрэн, Озэки Такакэйшо-той таарч барилдан түүнийг ёрикири мэхээр давж, 10 даваа, 2 унаатай болж, Озэки цолны болзол хангалаа.
Тамаваши Б.Мөнх-Оргил /М-7/, Аойяама /М-12/-тай учраа таарч барилдан, түүнийг ошидаши мэхээр давснаар 6 даваа, 6 унаатай болоод байна.
Чиёошома Г.Мөнхсайхан /М-13/ энэ өдөр Ичияамамото /М-15/-той барилдаж түүнд ошитаоши мэхээр ойчиж 6 даваа, 6 унаатай башёг үргэлжлүүлж байна.
Миторюү М.Төрболд /М-16/, энэ өдөр Такарафүжи /М-10/-тэй барилдаж түүнд окүридаши мэхээр ойчиж 4 даваа, 8 унаатай болоод байна.
Дайшохо Ч.Шижирбаяр/М-11/ өнөөдөр Мёогирюү /М-14/-тай учраа тааран барилдаж түүнд ёрикири мэхээр ойчиж 5 даваа, 7 унаатай башёг үргэлжлүүлж байна.
Энэ башёг Их аваргын хамт 10 даваатай тэргүүлж явсан Асанояама /М-14/ энэ өдөр Cэкивакe Дайэйшотой барилдаж түүнд окүридаши мэхээр унаснаар 10 даваа, 2 унаатай болж тэргүүллээ алдлаа.
