.png){kind=logo}
ШАНХАЙ, 2025 оны хоёрдугаар сарын 19 /interestingengineering/. Нүүрстөрөгчийг ялган авах төхөөрөмжөөр тоноглогдсон дэлхийд анхны газрын тосны танкер хөлөг онгоцыг Хятадад угсарч дуусжээ.
Газрын тос олборлох, хадгалах, ачих зориулалттай 330 м урт уг хөвөгч байгууламжийг Шанхай хотод барьсан бөгөөд энэ сарын эцэс гэхэд боомтод хүргэх аж.
Төрийн өмчит “Cosco Ocean Shipping” компанид угсарсан уг хөвөгч байгууламж нь өдөрт хамгийн дээд тал нь 120 мянган баррель газрын тос олборлох хүчин чадалтай ба олборлолтын явцад үүссэн нүүрстөрөгчийн давхар ислийг ялган авч, хадгалдаг ажээ.
Газрын тос олборлогч хөвөгч тавцангуудад түгээмэл хэрэглэдэг хийн турбинууд нь нүүрстөрөгчийн давхар ислийн ялгарлын гол эх үүсвэр байдаг. Тэгвэл энэхүү хөвөгч байгууламжийг далайн гүнд цооног өрөмдөх үед байгаль орчинд учрах хор хөнөөлийг багасгах зорилгоор бүтээжээ. Уг хөвөгч нь хийн турбинээс ялгарсан дулааныг ашиглан цахилгаан эрчим хүч үйлдвэрлэх замаар нүүрстөрөгчийг ялган авдаг байна.
Энэхүү төсөл нь нүүрстөрөгчийн ялгарлыг тэглэх зорилтыг хэрэгжүүлэхийн тулд нүүрстөрөгч ялгаруулдаггүй хүхэрт устөрөгчийн олборлолтыг Хятадад нэвтрүүлэх зорилготой. Тус улсад 2030 он гэхэд нүүрстөрөгчийн ялгарал дээд цэгтээ хүрэх ба түүнээс хойш 2060 он гэхэд тэглэх зорилт тавьжээ.
Олон улсын эрчим хүчний агентлагийн мэдээлснээр, газрын тос, байгалийн хийн олборлолт, тээвэрлэлт, боловсруулалтаас 5.1 тэрбум тонн хүлэмжийн хий ялгарсан нь эрчим хүчтэй холбоотой нийт ялгарлын 15 орчим хувийг эзэлж байна. Хятад улс нүүрстөрөгчийг ялган авах технологийг хөгжүүлэхэд ахиц дэвшил гаргасан боловч нүүрстөрөгчийн ялгаруулалтын дэлхийн хамгийн том эх үүсвэр хэвээр байна.
Далай тэнгист өрөмдлөг хийх төслүүдээс гадна, Хятадад сэргээгдэх эрчим хүчний томоохон төслүүдийг хэрэгжүүлсээр байгаа юм. Тус улсад дэлхийд хамгийн өндөр хүчин чадалтай салхин сэнсийг бүтээж, Төвөдийн Ярлунг Цанпо гол дээр томоохон усан цахилгаан станц барих ажил эхлээд байна.
Эх сурвалж: МОНЦАМЭ Агентлаг Д.Жаргал
