Дэлхийн шилдэг наран шарлагын газруудыг нэрлэжээ

ВАШИНГТОН, 2025 оны хоёрдугаар сарын 19 /CNN/. Дэлхийн хамгийн шилдэг наран шарлагын газруудын энэ оны жагсаалтыг Америкийн аялал жуулчлалын үнэлгээний “Tripadvisor” компани мягмар гарагт танилцуулжээ.

Хамгийн шилдгээр Грекийн Крит арал дахь Элафонисси шалгарсан байна. Ягаан өнгийн элс, бүлээн тунгалаг устай гэдгээрээ алдартай, арлын баруун өмнөд эрэг дээрх энэ газар нь 5, 9 дүгээр сард тохиодог зуны оргил ачааллын өмнө болон дараа нь илүү тайван, нам гүм байдаг ажээ. Элафонисси эрэг 2021 оноос хойш анх удаа жагсаалтад дахин багтжээ.

“Tripadvisor”-ын ерөнхийлөгч Кристен Далтоны ярьснаар, энэ жилийн жагсаалт зургаан тивийн 50 гаруй улсын 100 гаруй газрыг хамарсан нь дэлхийн даяарх эрэг орчмын бүсийн өөр хоорондоо ялгаатай төрх байдлыг харуулсан байна.

Жагсаалтын хоёрдугаарт бичигдсэн Тайландын Пукет арлын Банана наран шарлагын газарт усан онгоц, завиар зугаалж, шүхрээр бууж, шумбах боломжтой бөгөөд шумбах явцад өнгө өнгийн шүр, загаснуудыг олж харна. Харин Аруба улсын Оранжеста хот дахь Игл наран шарлагын газар гуравдугаарт бичигдсэн бөгөөд цагаан элс, тогтуун устай энэ газарт устай холбоотой олон төрлийн аялал хийх боломжтой.

Флорида муж улсын Сиеста-Ки алын Сиеста наран шарлагын газар жагсаалтын дөрөвдүгээрт бичигдсэнээр АНУ-д хамгийн шилдгээр тодорчээ. Нарийн ширхэгтэй элс, далайн хясаанууд нь энэ газрын сэтгэл татам зүйлсийн нэг юм. Энд хавар, намрын улиралд ирвэл зуны оргил үетэй харьцуулахад цөөн хүнтэй, агаарын хэм хамгийн тохиромжтой байдаг.

Харин Португалын Алгарве муж дахь Прайа да Фалесиа гайхалтай хадан цохио, алтан элсээрээ эхний 5-т багтжээ.

2025 оны дэлхийн шилдэг 10 наран шарлагын газар:

1. Элафонисси наран шарлагын газар, Крит, Грек

2. Банана наран шарлагын газар, Пукет, Тайланд

3. Игл наран шарлагын газар, Оранжестад, Аруба

4. Сиеста наран шарлагын газар, Сиеста Ки, Флорида, АНУ

5. Прайа да Фалесиа, Алгарве, Португал

6. Плая Варадеро, Варадеро, Куба

7. Баваро, Пунта Кана, Доминикан

8. Плайа де Муро, Майорка, Испани

9. Келингкинг, Нуса Пенида, Индонез

10. Миртос, Кефалониа арал