Сэтгүүлчийн хайхрамжгүй алдаанаас үүдэлтэй эрүүл мэндийн эрсдэлийг иргэд амь, насаараа төлж байна. Тодруулбал, донорын талаарх буруу ташаа мэдээллийг нийгэмд түгээснээс үүдэлтэй өнөөдөр Монгол улсад эс, эд эрхтэн шилжүүлэх эмчилгээ зогсонги байдалд хүрээд байгааг албаныхан хэллээ.

ЭМЯ-ны хэрэгжүүлэгч агентлаг болох Эрүүл мэндийн хөгжлийн төв (ЭМХТ)-өөс Монголын эрүүл мэндийн сэтгүүлчдийн цагаан үзэг холбоо, эрүүл мэндийн сэтгүүлчдийн вакцин клубтэй хамтран сэтгүүлчдэд мэдээлэл хүргэх уулзалт, сургалтыг зохион байгууллаа. Сургалтаар ЭМХТ-ийн үйл ажиллагааг танилцуулж, эрүүл мэндийн сэдвээр мэдээ, мэдээлэл бэлтгэн нийтэд түгээж буй сэтгүүлч, хэвлэл мэдээллийн байгууллагуудад шаардлагатай мэдээ, мэдээллийг танилцуулав.

Хүний амь, настай холбоотой "Эрүүл мэндийн мэдээ" бэлтгэн түгээхдээ сэтгүүлч, редакц хянуур хандах хэрэгтэй

ЭМХТ-ийн захирал М.Одгэрэл: Анхдагч эх сурвалжаас нотолгоонд суурилсан мэдээллийг сэтгүүлчдэдээ хүргэхээр зорьж байна. Сэтгүүлчийн түгээсэн буруу, ташаа мэдээллээс улбаатай эрүүл мэндийн салбарт доголдол үүсэх асуудлууд гарч, үүний үр дагаврыг иргэд, амь насаараа төлж байна. Тиймээс бид хүний амь настай холбоотой хамгийн чухал мэдээ, мэдээллийг бэлтгэн түгээж буй хэвлэл мэдээллийн байгууллага, сэтгүүлчдэд нотолгоонд суурилсан мэдээ, мэдээллийг өгөхөөр зорьж байна. ЭМЯ-ны бодлого хэрэгжүүлэгч агентлаг болох Эрүүл мэндийн хөгжлийн төв нь эрүүл мэндийн мэдээллийн нэгдсэн сан, салбарыг хөгжүүлэх бодлого болон хууль эрх зүйн орчныг боловсронгуй болгоход шаардлагатай судалгаанууд, хүний нөөцийн чадавхыг бэхжүүлэх, эрүүл мэндийн байгууллагын чанар, магадлан итгэмжлэл, эс, эд, эрхтэн шилжүүлэн суулгах үйл ажиллагаа, иргэдийн гадаад эмчилгээ зэрэг өргөн бодлогын ажлуудыг зохицуулдаг, энэ хүрээнд мэдээллээ анхдагч эх сурвалжаас сэтгүүлчдэдээ хүргэж байна.

Сэтгүүлчид эрүүл мэндийн дата , судалгааг өргөнөөр ашиглахыг хүсэж байна

ЭМХТ-ийн их өгөгдөл, судалгааны албаны дарга Г.Дамба: Манай алба нь үндэсний хэмжээнд хүн амын эрүүл мэндийн дата, судалгаа, их өгөгдлийн санг бүрдүүлж, тоо мэдээллээр хангаж ажилдаг. Бид эрүүл мэндийн мэдээллийн нэгдсэн сан, салбарыг хөгжүүлэх бодлого болон хууль эрх зүйн орчныг боловсронгуй болгоход шаардлагатай бодлогын судалгаануудыг мөн хийж хэрэгжүүлдэг. Тэгэхээр хэрвээ сэтгүүлч та эрүүл мэндийн мэдээ, мэдээлэл бэлтгэж буй бол манай төвийн дата, судалгаа, их өгөгдлийг ашиглан хүн амд нотолгоонд суурилсан мэдээллийг ЭМХТ-ийн www.hdc.gov.mn сайтаас өдөр тутмын мэдээлэл, сар, улирал, жил тутмын статистик мэдээллийг авах боломжтойгоос гадна статистик мэдээллийн нээлттэй өгөгдлийн сан болох www.1313.mn – аас мэдээлэл авах боломжтой.

Буруу, ташаа мэдээллээс үүдэлтэй эрхтэн шилжүүлэн суулгах үйл ажиллагаа зогсонги байдалтай байна

ЭМХТ-ийн эрхтэн шилжүүлэн суулгах үйл ажиллагааг зохицуулах албаны дарга Б.Алтантулга: Иргэд, олон нийтэд эрхтэн шилжүүлэн суулгах ажиллагааг хэрхэн зөвөөр таниулж ойлгуулах талаар сэтгүүлчдэдээ мэдээлэл өгч, ярилцаж байна. Сэтгүүлчийн буруу ташаа мэдээллээс болж иргэдийн дунд айдас бий болчихоод байна. Бидэнд өнөөдөр тархины үхэлтэй донор олдсон ч ар гэр нь зөвшөөрөхгүй, айдастай байна. Иргэдийн дундах энэ чиглэлээрх мэдлэг, ойлголтыг нэмэгдүүлэхэд бид хэвлэл мэдээллийн байгууллагуудтайгаа, сэтгүүлчидтэйгээ хамтран зөв мэдээллийг түгээх нь чухал байна.

Монгол Улсад эмчлэх боломжгүй 25 өвчний гадаад эмчилгээнд төлбөрийн буцаан олголтыг олгож байна

ЭМХТ-ийн гадаад эмчилгээг зохицуулах албаны дарга Ш.Алтанцэцэг: Иргэдийн гадаад эмчилгээний санхүүгийн дарамтыг бууруулах зорилгоор мөн чанартай эрүүл мэндийн тусламж үйлчилгээ авахад нь дэмжлэг үзүүлэхээр гадаадын улс орнуудтай холбож өгөх, мэдээллэр хангах буцаагаад иргэнийхээ эрүүл мэндийн тусламж үйлчилгээнд хяналт тавих системийг бий болгож ажиллаж байна. Сайдын тушаалаар Монгол Улсад эмчлэх боломжгүй өвчний жагсаалтад 8 бүлэгт багтах 25 өвчнийг оруулсан байдаг. Энэ жагсаалт нь 2 жилд шинэчлэгддэг ба Монголдоо эмчилж болдог болох боломжийг бүрдүүлэхээр бид зорьж байна.

Хэрэв гадаад эмчилгээ, үйлчилгээ авах иргэд маань сүүлийн эмчилгээнээсээ хойш 3 сарын хугацаанд төлбөрийн тодорхой хувийг буцаан авах боломжтой ба үүнд 18 нас хүртэлх хүүхэд 50 хувь, 18 ба түүнээс дээш насныхан 20 хувийг буцаан олгохоор заасан. Эмнэлгийн дүгнэлт гаргадаг УНТЭ, УХТЭ, УГТЭ, ГССҮТ, ЭХЭМҮТ-ийн комиссын дүгнэлтийн дагуу манай төв дээр ирж хамтын ажиллагаатай гадаад улсын эмнэлгүүдээс сонгон гадаад эмчилгээ авах боломжтой. Манай гадаад эмчилгээг зохицуулах албаны 70128804, 70004525 утсаар бидэнтэй холбогдож иргэд дэлгэрэнгүй мэдээлэл авах боломжтой.

Сургалтаар хэвлэл мэдээлэл, сэтгүүлчдэд нээлттэй мэдээллийг хэрхэн мэдээ, сурвалжилгадаа ашиглах, мэдээллийн хүртээмжийг нэмэгдүүлэх, иргэдийн дундах буруу ташаа мэдээллийг засаж, залруулахад мэргэжлийн байгууллагын зүгээс хэрхэн хамтран ажиллах олон асуудлаар санал солилцлоо.

Г.Энхбаатар