.png){kind=logo}
Монголбанкны Хяналтын зөвлөлийн ээлжит хурал 2026 оны нэгдүгээр сарын 19-ний өдөр боллоо.
Хурлаар Монголбанкны Эрсдэлийн удирдлагын алба, Санхүүгийн зах зээлийн газрын нөөцийн удирдлагын хэлтэс, Санхүү бүртгэлийн газар болон Дотоод аудитын газрын 2025 оны тайлан, 2026 оны төлөвлөгөөтэй танилцан, Монголбанкны 2025 оны санхүүгийн тайланд хөндлөнгийн аудитаар ажиллаж буй компанийн явцын мэдээллийг сонслоо.
Эрсдэлийн удирдлагын алба болон Нөөцийн удирдлагын хэлтсээс 2025 оны Гадаад валютын улсын нөөц /ГВУН/-ийн бүтэц, эрсдэл, өгөөж, зах зээлийн нөхцөл, цаашдын төлөв болон 2026 оны төлөвлөгөөний талаар танилцуулга хийв. Хяналтын зөвлөлийн гишүүд 2025 оны үр дүнг хэрхэн дүгнэх, ГВУН-ийг зөвхөн жилийн эцсээр биш жилийн дундаж дүнгээр нь тайлагнаж, хянаж байх нь илүү оновчтой эсэх, нөөцийн удирдлагатай холбоотой шийдвэр гаргалтын давтамж, газар хоорондын уялдаа хангадсан эсэх, үүсэж буй геополитикийн нөхцөл байдалтай холбогдуулан удирдлагын тогтолцоогоо эргэн харах хэрэгтэй эсэх талаар Монголбанкны мэргэжилтнүүдтэй санал солилцлоо.
Санхүү бүртгэлийн газар нь 2025 онд Монголбанкны Олон улсын банк хоорондын төлбөр тооцооны СВИФТ сүлжээний ISO20022 стандарт руу шилжих ажлыг амжилттай хэрэгжүүлсэн, дотоодын банкнуудын гадаад төлбөр тооцоог цахимжуулан, Олон улсын стандартад нийцүүлэх ажлыг эхлүүлж, туршилтын орчинд арилжааны 5 банктай хамтран ажилласан талаар танилцуулав. Хяналтын зөвлөлийн гишүүд Монгол улсын Засгийн газрын санхүүгийн эрсдэлийг нэмэгдүүлж болохуйц, тэнцлийн гадна бүртгэлтэй гүйлгээнүүд байгаа эсэх, бүртгэлийн үйл ажиллагаа нь хяналтын тогтолцооны чухал бүрэлдэхүүн хэсэг мөн тул үйл ажиллагаанд тулгамдаж буй хүндрэлийг даван туулахад дэмжлэг үзүүлэх талаар асуулт асууж, санал солилцов.
Монголбанкны Дотоод аудитын газрын 2025 оны сүүлийн хагас жилийн үйл ажиллагааны тайлан, түүний үр дүнгийн талаарх мэдээлэлтэй мөн танилцав.
Энэ хугацаанд нийт 16 аудит, шалгалтыг хийж, улсын байцаагчийн 2 акт тогтоож, 2 мэдэгдэл хүргүүлж зөрчил арилгуулах арга хэмжээ авч, нийт 63 үүрэг даалгавар өгчээ.
Хяналтын зөвлөлөөс тус газар гаргасан дүгнэлт, зөвлөмжийнхөө хэрэгжилтийг хэрхэн хянадаг талаар, 2026 оны ажлын төлөвлөгөөнд зарим аудитын чиглэлийг тусгах нь зүйтэй талаар, аудитын хүрээнд илэрсэн зарим эрсдэлийг арилгах талаар тэдний өгсөн зөвлөмж оновчтой байсан эсэх талаар тодруулан санал солилцов. Тус газар нь 2025 онд хүний нөөцөө чадавхжуулах чиглэлд анхаарч ажиллан, тодорхой үр дүн гаргасан явдлыг Хяналтын зөвлөл сайшаан тэмдэглэв.
Монголбанкны Хяналтын зөвлөл нь Монголбанкны 2025 оны санхүүгийн тайланд аудит хийж буй PwC компанийн аудиторуудтай уулзаж, явцын буюу 2025 онд хийсэн аудитын ажил, тэдний энэ жил онцгойлон анхаарч буй асуудлууд болон цаашид гарах үр дүнгийн талаар мэдээлэл сонслоо. Өмнөx жилүүдийн хязгаарлалттай дүгнэлтээс гаргах чиглэлд Монголбанкны авч хэрэгжүүлсэн арга хэмжээ нь хүрэлцээтэй байсан эсэх, цаашид дахин ийм дүгнэлт авах эрсдэлийг бүрэн хааж чадсан эсэх, Монголбанкны эрсдэлийн сан болон Үндэсний Баялгийн Санг Монголбанк удирдаж буйтай холбогдон үүсэж болох санхүү, бүртгэлийн үр дагаврын талаар санал солилцож, Монголбанкны хөндлөнгийн аудитаар сүүлийн 5 жил ажилласан PwC-ийн зарим удирдлагатай уулзалт товлох боломжийг тодрууллаа.
Эцэст нь дотоод асуудлын хүрээнд 2026 оны Хяналтын зөвлөлийн ээлжит хурлын урьдчилсан тов, Хяналтын зөвлөлөөс санаачлан Монголбанкны засаглал болон хяналтын тогтолцооны өнөөгийн нөхцөл байдал, онцлогийг тодорхойлж үнэлгээ хийх, Олон улсын сайн туршлага, чиг хандлагыг ашиглан үр нөлөөг дээшлүүлэх чиглэлээр зөвлөмж боловсруулах зорилготой судалгааны ажлыг эхлүүлсэнтэй холбоотой анхаарвал зохих зарим зүйлс, хурлаас гарах шийдвэрийн чиг, агуулга, мөн 2026 оны төсвийн талаар мэдээлэл өглөө.
МОНГОЛБАНКНЫ ХЯНАЛТЫН ЗӨВЛӨЛ
