Нефтийн үнэ 150 долларт хүрч болзошгүй гэж Катарын сайд анхааруулав

ДОХА, 2026 оны гуравдугаар сарын 7 /DW/. Ираны эсрэг АНУ, Израилын явуулж буй байлдааны ажиллагаа нь нефть, хийн нийлүүлэлтэд ноцтой хохирол учруулна гэдгийг Катар улс сэрэмжлүүллээ. Олборлолт явуулдаг Булангийн бүх улс хэдэн долоо хоногийн хугацаагаар олборлолтоо зогсоож болзошгүй гэж Катарын Эрчим хүчний сайд Саад аль-Кааби “Файнэншл Таймс” сонинд өчигдөр ярилцлага өгөхдөө мэдэгдсэн байна.

Түүний хэлснээр, дайн үргэлжилсээр байвал нэг баррель нефтийн үнэ 150 долларт хүрч өсөж магадгүй ажээ. “Давагдашгүй хүчин зүйл үүссэн талаар одоогоор зарлаагүй байгаа улсууд нөхцөл байдал өөрчлөгдөхгүй тохиолдолд ойрын үед үүнийг зарлах болно. Персийн булангийн бүх экспортлогчид форс-мажор зарлахаас аргагүйд хүрнэ. Хэрвээ дайн дахин хэдэн долоо хоног үргэлжлэх аваас энэ нь дэлхийн ДНБ-ий өсөлтөд нөлөөлөх болно. Эрчим хүчний эх үүсвэрүүдийн үнэ хаа сайгүй өснө, зарим бараа бүтээгдэхүүний хомсдол бий болсноор гинжин урвал үүсэх бөгөөд олон үйлдвэрийн газар нийлүүлэлт хийх боломжгүйд хүрнэ” гэж аль-Кааби ярилаа.

Байлдааны ажиллагааны улмаас Ормузын хоолойг бүрэн хааж болзошгүй гэсэн болгоомжлолоос үүдэн баасан гарагт Брент маркийн нефтийн үнэ 87,66 долларт хүрч өссөн нь 2024 оны 7 дугаар сараас хойших хамгийн өндөр үнэ юм. Өөрөөр хэлбэл, Ираны эсрэг АНУ, Израилын байлдааны ажиллагаа эхэлснээс хойш газрын тосны үнэ 20 гаруй хувиар өсжээ.

Катарын сайдын ярьснаар, танкерууд Ормузын хоолойгоор нэвтрэх нь маш их эрсдэлтэй болсон байна. Байлдааны ажиллагаа эхэлснээс хойш энэ замаар хийдэг далайн тээвэр үндсэндээ зогсжээ. Хэд хэдэн хөлөг онгоц пуужингийн цохилтод өртөн шатлаа. Даатгалын хураамж эрс өсөж, далайн тээврийн компаниуд хөлөг онгоцууд ба багийнхныг эрсдэлд оруулахаас болгоомжилж байна.

Ираны хариу цохилтоос болгоомжлон Катар улс шингэрүүлсэн шатдаг хийн олборлолтоо энэ