.png){kind=logo}
Өнөөдөр буюу 2026 оны 5 дугаар сарын 1-ний Баасан /Гэгээн/ гарагт болох зарим үйл явдлыг тоймлон танилцуулж байна.
Өнөөдөр: Олон улсын хөдөлмөрчдийн эв санааны нэгдлийн өдөр тохиож байна
09:00 цагт Новотел зочид буудалд: Хэвлэлийн Хүрээлэнгийн 30 жилийн ойн баярын хүрээнд зохион байгуулж буй “Монголын хэвлэл мэдээллийн тогтвортой байдлын форум” болно.
09:00 цагт УБЦТС ТӨХК-ийн байранд: Эрчим хүчний зохицуулах хорооны 2025 оны тайлангийн хурал болно.
09:00 цагт ХӨСҮТ-ийн зааланд: Дэлхийн лабораторийн эмч нарын өдрийн үйл ажиллагаа болно.
10:00 цагт Төрийн ордонд: УИХ-ын чуулганы нэгдсэн хуралдаан болно.
10:00 цагт Монгол бөхийн өргөөнд: Монгол Улсын оюутны аварга шалгаруулах үндэсний бөхийн барилдаан болно.
11:00 цагт Д.Сүхбаатарын талбайд: Монголын Үйлдвэрчний Эвлэлийн холбооноос иргэд, хөдөлмөрчдийн эрх ашгийг хамгаалж, Засгийн газарт бодит шаардлага хүргүүлэх зорилгоор “Нийгмийн шударга ёсны төлөөх” жагсаалыг зохион байгуулна.
11:00 цагт “News cafe”-д: “Сэтгүүлч М.Батдорж” сангийн 13 дугаар уралдааны дүнг танилцуулж, сэтгүүл зүйн шилдэг оюутанд сургалтын төлбөрийн тэтгэлэг гардуулна.
11:30 цагт Зам, тээврийн яаманд: Засгийн газраас хэрэгжүүлж буй “Чөлөөлье” санаачилгын хүрээнд цахилгаан хөдөлгүүртэй авто машины хэрэглээг дэмжих, цахилгаан тээврийн хэрэгслийн хэрэглээг нэмэгдүүлэх бодлого шийдвэрийн хүрээнд цахилгаан тээврийн хэрэгслийг тодорхой ангиллын дагуу дугаарын хязгаарлалтад хамруулахгүй ногоон дугаар олгох талаар мэдээлэл хийнэ.
11:40 цагт Монголын Үндэсний музейн үзэсгэлэнгийн танхимд: “Үндэсний бичиг үсгийн баяр”-ын хүрээнд Архивын ерөнхий газар болон Монголын Үндэсний музейн хамтарсан “Монголчуудын үсэг бичиг, утга соёлын өв” тусгай үзэсгэлэн нээлтээ хийнэ.
15:00 цагт Төрийн ордны их танхимд: Байгаль орчны салбарын албан хаагчдын нэгдсэн зөвлөгөөн болно.
“Тэрбум мод тарих үндэсний өдрүүд” өнөөдрөөс 6 дугаар сарын 1-нийг хүртэл үргэлжилнэ.
Төв цэнгэлдэх хүрээлэн, Барилгачдын талбай, Жуковын талбай, Налайх дүүрэг, “Соёлын төв ордон”-ы талбайд: “Тэрбум мод экспо” үзэсгэлэн худалдаа 5 дугаар сарын 15-ны өдрийг хүртэл зохион байгуулна.
“Hue арт” галерейд: МУЭ-ийн гишүүн, зураач Ц.Соёлмаагийн “Зэрэглээн цаана” үзэсгэлэн энэр сарын 16-ныг хүртэл гарна.
Улаанбаатар дахь Хятадын соёлын төвд: “Уран бүтээлийн хур-Олон улсын хятад хэлний өдөр” сэдэвт орчин үеийн хятадын уран бичлэг, дүрслэх урлагийн шилдэг уран бүтээлчдийн үзэсгэлэн энэ сарын 20-ныг хүртэл гарна.
Сингапурт: 2026 оны 3x3 сагсан бөмбөгийн Азийн аварга шалгаруулах тэмцээн эхэлнэ.
Эрхүү хот дахь В.С.Рогалийн нэрэмжит урлагийн төвд: Орос, Монгол Улсын хооронд дипломат харилцаа үүссэний 105 жилийн ойд зориулсан “Монгол орон Эрхүүгийн зураачдын нүдээр” уран бүтээлийн үзэсгэлэн энэ сарын 28-ныг хүртэл гарна.
Москва хотын Кремлийн музейд: “Чингис хааны удмынхан: Оросууд ба даян дэлхий” үзэсгэлэн 7 дугаар сарын 19-нийг хүртэл гарна.
