Төрийн ордонд өчигдөр /2023.02.02/ Монгол Улсын сайд Олимп, нийтийн биеийн тамир, спортын Үндсэний хорооны дарга Б.Бат-Эрдэнэ болон БНХАУ-аас Монгол Улсад суугаа Элчин сайд Цай Вэньруй нар хоёр орны найрамдалт харилцааны хүрээнд спортын салбарт хийгдэж буй ажлын талаар харилцан мэдээлэл солилцов.

Тодруулбал, Монгол Улсын Ерөнхийлөгч У.Хүрэлсүх 2022 оны 11 дүгээр сарын 28-нд БНХАУ-д Төрийн айлчлал хийхдээ Хятадын талын буцалтгүй тусламжаар Монголын хүүхэд, залууст зориулж “Президент” спорт цогцолбор байгуулахаар хэлэлцэн шийдвэрлэсэн юм. Энэхүү уулзалтаар тус бүтээн байгуулалтын барилга байгууламжийн ерөнхий төлөвлөгөө, архитектур төлөвлөлтийн судалгааны талаар хэлэлцсэн юм.

Манай улсын нийтийн биеийн тамирын хөгжилд онцгой хувь нэмэр оруулах уг төслийг удирдаж, хяналт тавих үүрэг бүхий Ажлын хэсгийг Ерөнхий сайдын 2023 оны 1 дүгээр сарын 30-ны өдрийн захирамжаар байгуулжээ.

Ажлын хэсгийг Монгол улсын сайд, Олимп, нийтийн биеийн тамир, спортын Үндсэний хорооны дарга Б.Бат-Эрдэнэ ахалж, бүрэлдэхүүнд нь Ерөнхийлөгчийн зөвлөх, холбогдох 5 яамны Дэд сайд нар, Улаанбаатар хотын орлогч дарга, биеийн тамир, спортын 3 байгууллагын төлөөлөгч, ижил төстэй төсөл хэрэгжүүлж байсан инженер, судлаачид багтжээ.

Одоогийн байдлаар “Президент спорт цогцолбор”-ын барилга байгууламжийн ерөнхий төлөвлөгөө, архитектур төлөвлөлтийн судалгааны ажил 80 хувийн гүйцэтгэлтэй байгаа тухай Барилга, хот байгуулалтын яамнаас мэдэгдлээ.

Өөрөөр хэлбэл, хоёр орны хамтарсан бүтээн байгуулалтын ажил амжилттай өрнөж, спорт цогцолборын ТЭЗҮ-г манай орны уур амьсгалын онцлог, орчин нөхцөлд тохируулан гаргахаар ажиллаж байна.

Энэ талаар БХБ-ын Дэд сайд Э.Золбоо: “Президент” спорт цогцолборын техник эдийн засгийн үндэслэл, зураг төсөл боловсруулах ажлыг 2021 оны 4 дүгээр сараас эхлэн “Гоби травел” ХХК гүйцэтгэж байгаа бөгөөд ажил 75 хувийн гүйцэтгэлтэй үргэлжилж байна. Спорт цогцолборын иж бүрдэл ажлын зураг энэ сард багтан гарна.

Цогцолборыг “Дүнжингарав” худалдааны төвөөс зүүн, Үндэсний цэцэрлэгт хүрээлэнгийн хойд хэсгийн ногоон байгууламж бүхий соёл амралтын бүсэд байгуулах бөгөөд шаардлагатай газрыг Нийслэлийн Засаг даргын 2022 оны 03 дугаар сарын 04-ний өдрийн А/356 дугаар захирамжаар Барилга, хот байгуулалтын яаманд олгогдсон.

Төсөл хэрэгжих талбай нь 4 га, үүнээс цогцолборын үндсэн барилга 1.8 га-д босох ба ногоон байгууламж 0.4 га, зам талбай 1.6 га байхаар төлөвлөсөн” гэв.

“Президент” спорт цогцолборын зураг төслийг боловсруулахдаа Монгол Улсын стандартаас гадна олон улсын стандарт, хэмжилзүйг удиртгал болгон ажиллажээ. Уг зураг төслийн дагуу спорт цогцолборын барилга нь нийт 59 мянган м2 талбайтай, 4 давхраас бүрдэх томоохон байгууламж болох аж.

Үүнд: Сагсан бөмбөг, волейбол, хөл бөмбөг, усан сэлэлт, талбайн теннис, ширээний теннис, агаарын теннис, сквош теннис, бокс, бүх төрлийн бөх, ханан хадны авиралт, туялзуур сэлэм, буудлага, байт харваа, фитнесс, иога, спиннинг, дугуй, гүйлт гэсэн 19 төрлийн спортод зориулсан иж бүрэн сургалтын танхим байгуулахаар төлөвлөсөн байна.

Түүнчлэн нэг удаагийн нэвтрэх хүчин чадлын тооцоогоор 1,327 хүнд үйлчлэх боломжтой. Ингэснээр өдөрт 6000 орчим хүн спортоор хичээллэж, 10 мянга гаруй хүнд спортын үйлчилгээ үзүүлэх боломжоор хангагдаж байгаа юм.

Спорт цогцолборыг байгуулах Ажлын хэсгийн дарга Б.Бат-Эрдэнэ: “Монгол, Хятад хоёр орны найрамдалт харилцааны үүх түүхийг сөхвөл тэртэйх 1950-иад оноос эхтэй бөгөөд урд хөрш маань манай улсын спортын хөгжилд томоохон нөлөө үзүүлэхүйц олон туслалцаа үзүүлсээр ирсэн билээ. Хамгийн ойрын жишээг дурдвал, Хятад улсын тусламжаар Буянт-Ухаагийн спорт ордныг байгуулж, дан ганц дотоод гэлтгүй олон улсын хэмжээний тэмцээн уралдааныг эх орондоо зохиож байна. Мөн өнөөдрийн уулзалтаар харилцан мэдээлэл солилцсон спорт цогцолборыг хоёр орны Ерөнхийлөгч нарын хэлэлцээрийн дүнд Хятадын талаас бүрэн санхүүжүүлж, барьж байгуулахаар шаргуу ажиллаж байна. Энэ цогцолбор ашиглалтад орсноор Монголын хүүхэд залуус олон улсын стандартад нийцсэн, иж бүрэн цогцолборт 19 төрлийн спортоор хичээллэж, эрүүл амьдралын хэв маягт суралцах маш том боломж нээгдэж байна. Миний бие энэ бүтээн байгуулалтын Ажлын хэсгийг ахлах болсныг нэр төрийн хэрэг хэмээн хүлээн авсан билээ.

Өнөөдрийн уулзалтын тухайд үнэхээр үр дүнтэй болсон гэдгийг онцлох байна. Элчин сайд Цай Вэньруй зураг төслийн ажлын явцтай танилцаж, сэтгэл хангалуун байгаагаа илэрхийлсэн” гэсэн юм.