.png){kind=logo}
“Урт цагаан” үйлчилгээний төвийн шинэ барилгын зураг төсөл боловсруулах нээлттэй уралдаанд дотоод, гадаадын 28 багаас бүтээлээ ирүүлж байсан бөгөөд өнөөдөр энэ ажил юу болов...
Нийслэлчүүдийн хамгийн сайн мэддэг эртний үйлчилгээний төв “Урт цагаан”-ыг шинээр барих уралдаанд зураг төслийн мэргэжлийн байгууллага, хувь уран бүтээлчид, оюутан, залуус, олон нийтийн байгууллага, төрийн бус байгууллагууд болон ОХУ, Швед, Нидерланд, БНХАУ зэрэг улсаас нийт 28 баг оюуны бүтээлээ ирүүлжээ.
Нийслэлийн Засаг даргын 2020 оны А/520 дугаар захирамжийн дагуу Нийслэлийн өмчийн 3 дугаар байр буюу “Урт цагаан” үйлчилгээний төвийн барилгыг дахин төлөвлөх концепц, загвар зураг төсөл боловсруулах уралдааныг 2020 оны 4 дүгээр сарын 20-ний өдрөөс 05 дугаар сарын 11-ний өдөр хүртэлх хугацаанд зарласан юм.
Ирүүлсэн бүтээлүүдийг уралдааны удирдамжийн дагуу энэ сарын 12-17-ний өдрийг дуустал нийслэлийн Хот байгуулалт, хөгжлийн газрын албан ёсны цахим http://uda.ub.gov.mn/?p=8150 хуудсаар дамжуулан иргэд олон нийтээс саналыг авах юм. Олон нийтээс хамгийн их санал авсан цорын ганц бүтээлээр “Урт цагаан” үйлчилгээний барилгыг сэргээн засварлах аж. Энэхүү уралдааныг мэргэжлийн байгууллага, олон нийтийн оролцоотойгоор шинэ санаа, орчин үеийн техник технологийн шийдэл бүхий шилдэг санааг тодорхойлж, цаашдын бүтээн байгуулалтын эхлэлийг тавих зорилгоор 30 сая төгрөгийн шагналын сантай зохион байгуулж байна.
Ташрамд сонирхуулахад, Өнгөрсөн зууны дунд үед баригдсан олон түмэнд “Урт цагаан” хэмээн нэрлэгдэж өнөөг хүртэл үйл ажиллагаа явуулж ирсэн тус төвд гуталчин, засварчин, оёдолчин, цагчин, зурагчин, дархан мужаан, гар урчууд гээд үе үеийн оюуны болон гарын ур дүйтэй хүмүүс ажиллаж байсан билээ.
Мөн энд Биеийн тамир спортын анхны “Хоршоолол” нийгэмлэг байгуулагдсан цагаасаа өнөөг хүртэл олон алдар цуутай тамирчид бэлтгэл сургуулилтаа хийж, улс орон болон дэлхийд нэр алдраа дуурсгасан юм.
“Урт цагаан” байрлах энэ гудамж нь нийслэл хотын түүхтэй салшгүй холбоотой гэдгийг Хүрээ болон Улаанбаатарын уугуул оршин суугчид тодхон санаж байгаа.
Улаанбаатар хотын худалдааны анхны гудамж XVIII зууны эцсээс XIX зууны эхэнд үүсчээ. Энэ гудамж дундуур Баруун Сэлбийн гол урсдаг байсан бөгөөд одоогийн Барилгачдын талбайгаас баруун тийш Урт цагаан, Бөмбөгөр худалдааны төвийн урд талын замын уулзвар хүртэл худалдааны захууд байсан түүхтэй. Энд хүнс, мах, төмөр, мод, чулуу, алт мөнгөний төрөлжсөн зах байснаас гадна монгол урчууд, хятад, орос тэргүүтэй гадаадын худалдааны пүүсүүд байрлаж байлаа.
Харин 1954-1961 онд хэрэгжсэн Улаанбаатар хотын анхны ерөнхий төлөвлөгөөгөөр худалдааны гудамжийг өргөтгөж, хойд хэсэгт архитектор Б.Дамбийнямын зураг төслөөр Хоршооллын худалдаа үйлчилгээний нэгдсэн төвийн барилгыг барьсан нь “Урт цагаан” хэмээн нэршжээ.
Худалдааны гудамжийг 1970 онд Октябрын гудамж, 2002 онд Жуулчны гудамж хэмээн нэрлэжээ. Тодруулбал, Чингэлтэй дүүргийн 1 дүгээр хороо, Жуулчны гудамж, Дүрслэх урлагийн музей, Барилгачдын талбайгаас баруун тийш Бөмбөгөр худалдааны төвийн урд талын Их тойруу, С.Чоймболын гудамжны уулзвар хүртэлх гудамж юм.
Эдгээр ирүүлсэн бүтээлүүдийг уралдааны удирдамжийн дагуу энэ сарын 12-17-ний өдрийг дуустал нийслэлийн Хот байгуулалт, хөгжлийн газрын албан ёсны цахим http://uda.ub.gov.mn/?p=8150 хуудсаар дамжуулан иргэд олон нийтээс саналыг авах юм байна. Олон нийтээс хамгийн их санал авсан цорын ганц бүтээлээр “Урт цагаан” үйлчилгээний барилгыг сэргээн засварлах аж. Энэхүү уралдааныг мэргэжлийн байгууллага, олон нийтийн оролцоотойгоор шинэ санаа, орчин үеийн техник технологийн шийдэл бүхий шилдэг санааг тодорхойлж, цаашдын бүтээн байгуулалтын эхлэлийг тавих зорилгоор 30 сая төгрөгийн шагналын сантай зохион байгуулж байна.
Шинэ төслийн барилгын загварууд
