.png){kind=logo}
Нийслэлийн Баянгол дүүрэг дэх ерөнхий боловсролын 70 дугаар тусгай сургуулийн олимп, паралимпын танхим нээлт болж, тус сургуулийн хамт олны ур ухаан, уран гараар бүтээгдсэн дижитал Олимпын танхим нь бусад сургуулийн олимпын танхимуудад санаа авахуйц жишиг болсон гэдгээрээ онцлогтой байв.
Энэхүү Олимпын танхимын нээлтийн ёслолд МҮОХ-ны Ажлын албаны дарга Ц.Цэнд-Аюуш, МҮОХ-ны Гадаад харилцааны албаны дарга Б.Баяртуяа, Монголын үндэсний паралимпын хорооны Тэргүүн дэд ерөнхийлөгч Д.Сүрэнхорлоо, Баянгол дүүргийн БТСГ-ын дарга Г.Батбаяр, Баянгол дүүргийн “Шамони” олимпын зөвлөлийн дарга Ш.Бямбасүрэн тэргүүтэй зочид төлөөлөгчид оролцлоо.
“Олимпын боловсрол ба бие бялдрын хүмүүжил” сэдэвт болзолт уралдааны хүрээнд тус сургуулийн хамт олон сурагчдын тусгай хэрэгцээнд нь тохирсон орчинг бүрдүүлж, орчин үеийн виртуал технологиор танхимаа тохижуулсан байна. Тус сургуулийн багш нар өвөл, зуны бүх олимпын наадмын бэлгэдэл сахиусыг 3D баримлын шавраар урлан байршуулсан нь анхаарал татахуйц болжээ.
Олимпын танхимын өвлийн олимпын хэсэгт виртуал нүдний шил зүүснээр тухайн олимпын наадамд очсон мэт сэтгэгдэлийг авч, биеэр мэдрэх боломжтой юм байна.
Ерөнхий боловсролын 70 дугаар тусгай сургуулийн хэл засалч багш Л.Цоггэрэл: “Манай сургуульд аутизмын хүрээний эмгэгтэй, тархины саажилттай, дауны хам шинжтэй, тулгуур эрхтэний болон хэл ярианы гээд олон төрлийн бэрхшээлтэй хүүхдүүд суралцаж байна. Бид хөгжлийн бэрхшээлтэй хүүхдүүдийн онцлогт тохируулсан, тэдний хүсэл мөрөөдлийг дэмжихэд чиглэсэн байдлаар тус олимпын танхимаа тохижуулахыг хичээсэн” гэдгээ онцолж байв.
Сургуулийн биеийн тамирын танхимыг “Юнител” группийн санхүүжилтээр хөгжлийн бэрхшээлтэй иргэдэд зориулсан байдлаар засаж тохижуулсан бөгөөд энэ зааланд нисдэг таваг, пара бочи, пара бадминтоны секц хичээллэж байгаа аж.
Пара бочигийн тамирчин сурагч нь “Парис-2024” паралимпын эрх авах магадлалтай байгааг Монголын үндэсний паралимпын хорооны тэргүүн дэд ерөнхийлөгч Д.Сүрэнхорлоо онцолж байсан юм.
Энэхүү ерөнхий боловсролын 70 дугаар тусгай сургууль нь 331 сурагч, 54 багштай үйл ажиллагаа явуулж байна. Тус сургуульд Г.Цэцэгжаргал, А.Наранчимэг, Н.Наранжаргал, Э.Доржхүү, Б.Нямдорж, С.Пүрэвжаргал, Б.Лхагвацэцэг нарын сагсанбөмбөг, волейбол зэрэг олон спортын ОУХМ, спортын мастер болон зэрэг цолтой биеийн тамирын залуу багш нар ажилладаг юм байна. Тэд олон жил ажилласан туршлагатай багш болох Л.Цоггэрэл, Л.Очгэрэл нарын удирдлага дор гар, сэтгэл нийлсэн хичээл зүтгэлээрээ нийслэлд төдийгүй улсдаа жишиг болсон энэхүү Олимпын танхимыг байгуулжээ.
Танхимын нээлтийн ёслолын үеэр пара болон тусгай олимпын тамирчдыг хөгжүүлэн бэлтгэх үйлсэд олон жил хоёргүй сэтгэлээр зүтгэж буй 70 дугаар сургуулийн хэл засалч багш Л.Цоггэрэлийг МҮОХ-ны “Олимпын алдар” одонгоор, биеийн тамирын багш Л.Очгэрэлийг “Олимпын алтан медаль”-иар тус тус шагналаа.
Энэ үеэр тус сургуулийн багш нар Монголын тамирчид ирэх жил олимпын наадмаас олон медаль авахыг бэлгэдэн бүтээсэн Парисын олимпын маскот болон эцэг эхчүүд хаягдал цаас ашиглан урласан ваарыг МҮОХ-ны музейд дурсгал болгон бэлэглэлээ.
