.png){kind=logo}
ПАРИС, 2023 оны аравдугаар сарын 31 /ТАSS/. Парисын Олимпийн наадмын нээлтийн ёслолд 400 мянган хүн оролцоно гэж Францын засгийн газар тооцоолжээ.
Энэ тухай Францын “RMC Sport” телевизийн суваг өнөөдөр мэдээллээ.
Эх сурвалжийн мэдээлснээр, ёслолын ажиллагааны үеэр Сена мөрний дээд эргийн далангийн дагуу 300 мянга, доод эргийн далангийн дагуу 100 мянган үзэгч байрлах ажээ. Дээд далангийн суудлуудыг ирэх оны эхээр Францын Дотоод хэргийн яамнаас хуваарилах бол доод далангийн суудлуудын тасалбар аль хэдийн зарагдаж дуусчээ.
Олимпын наадмын нээлтийн ёслолд 600 мянган үзэгч оролцох боломжтой гэж 2022 оны аравдугаар сард Францын Дотоод хэргийн сайд Жеральд Дарманин мэдэгдэж байв. Харин энэ тоог 200 мянган хүнээр цөөрүүлэхээр шийдвэрлэсэн нь арга хэмжээний үеэр замын хөдөлгөөнийг зохицуулахад дөхөмтэй болох юм. Гэхдээ эцсийн тоог 11 дүгээр сард болох Үндэсний аюулгүй байдлын зөвлөлийн хурлын үеэр улсын Ерөнхийлөгч эцэслэн батална гэдгийг Спортын сайд Амели Удеа-Кастера хэллээ.
"Парис-2024" Олимпын наадам 2024 оны долоодугаар сарын 26-наас наймдугаар сарын 11-нд болно.
Эх сурвалж: МОНЦАМЭ агентлаг Д.Одон
