.png){kind=logo}
Израилын Ерөнхий сайд Биньямин Нетаньяху Хамас-тай хийж байгаа дайн тулааныг түр зогсоох саналуудыг няцаасаар байна.
Израилын батлан хамгаалах арми болон Хамас бүлгийн хоорондох дайн тулаан тав дахь долоо хоногтоо орж байгаа үед өчигдөр Тель-Авивт хүрэлцэн очсон АНУ-ын төрийн нарийн бичгийн даргыг хүлээн авч уулзах үеэрээ Нетаньяху ийм байр сууриа дахин нотолсон байна.
Газын зурвас руу илүү шуурхай бас ахиу хэмжээгээр тусламж нэвтрүүлэх үүднээс хүмүүнлэгийн зорилгоор дайралт довтолгоогоо түр зогсоохыг Блинкен Израилд уриалж, өнөөгийн байдал Палестинчуудыг хэт үзэлд улам түлхэж, хямралыг эцэслэн шийдвэрлэх зорилготой энхийн яриа хэлэлцээ сэргэх аливаа боломж нөхцөлийг үгүй хийнэ гэдгийг мэдэгджээ. Нетаньяху харин, “бүх хүчин чадлаараа үргэлжлүүлэх болно гэдгээ бид хэдийн мэдэгдсэн.
Израил улс барьцааны хүмүүсийг буцаан авчрахаас нааш түр гал зогсоохоос татгалзаж байна. Израил Газын зурваст түлш шатахуун оруулахыг зөвшөөрөхгүй, мөн санхүүжилт оруулахын эсрэг байна” гэж мэдэгджээ.
Хамас бүлэг 10 дугаар сарын 7-нд Израилд халдлага үйлдэх үедээ Израилаас 250 орчим хүнийг барьцаалж Газын зурваст хорьж байгаа юм. Энэ зуур Газын зурвас даяар Израилын цэргийн өргөн хүрээтэй дайралт үргэлжилсэн хэвээр, түүний дотор Газын зурвасын Аль-Шифа эмнэлгийн гадаах түргэний машин руу Израилын хүчнийхэн пуужин харвасны улмаас 15 хүн амь үрэгдэж, 60 гаруй хүн шархадсан гэж Палестины Улаан хавирган сар нийгэмлэг мэдэгджээ. Израилын батлан хамгаалах арми харин уг түргэний машиныг Хамас-ын дайтагчид ашиглаж байсан тул цохилт өгсөн гэж мэдэгдсэн байна.
НҮБ-ын Ерөнхий нарийн бичгийн дарга Антонио Гутерреш Газа дахь түргэний машинуудад халдсан Израилын халдлагыг “аймшигтай” гээд, хямралыг зогсоох ёстой гэж мэдэгдсэн байна. 10 дугаар сарын 7-ноос хойш 9227 Палестин хүн амь үрэгдсэнийг Газын зурвасын ЭМЯ мэдээлж байна. Израилын талаас 1400 гаруй хүн үрэгджээ. Газын зурвас дахь НҮБ-ын тусламжийн агентлагийн тэргүүн Томас Вайт сүүлийн хэдэн долоо хоногт Газын зурвас бүхэлдээ “үхэл, сүйрлийн дүр төрх”-тэй болж, “аюулгүй гэж болох нэг ч газаргүй болсон”-ыг мэдэгдлээ.
Орох оронгүй болсон хүмүүсийг хамгаалалтдаа авах агентлагийнх нь нөөц боломж шавхагдсаныг Томас Вайт мэдэгджээ. 600 мянга гаруй хүнийг агуулж байгаа НҮБ-ын хоргодох байруудын 50 гаруй нь одоогоор дайн тулааны хөлд өртсөн бол, 5 нь шууд онилсон цохилтын бай болсон учир өөр бусад нь ч аюулд өртөхгүй гэх баталгаагүй байгааг анхааруулсан байна. НҮБ-ын харьяа байруудад 38 хүний амь эрсэдсэн гэдгээрээ НҮБ-ын далбаа хойшдоо аюулгүй байдлын баталгаа болохоо байжээ гэж тэрээр НҮБ-ын Палестины дүрвэгсдэд туслах агентлагийнханд хандсан видео мэдэгдэлдээ онцолжээ.
Эх сурвалж: Монголын мэдээ
