Монголын спорт холбоодын нэгдсэн тэмцээн туялзуур сэлмээр эхэлнэ

Улаанбаатар, 2024 оны нэгдүгээр сарын 18 /МОНЦАМЭ/. Спорт холбоодын нэгдсэн Улсын аварга шалгаруулах тэмцээн маргааш эхэлнэ. 10 өдөр үргэлжлэх тус тэмцээн спортын 20 төрлөөр “Буянт-Ухаа” спорт ордон, “Степп Арена”, “Юү Жи Палас”, “Хурд” авиралтын заал, “Техник спортын төв” гэсэн таван газарт болох юм. Маргааш буюу нээлтийн өдөр туялзуур сэлэм, бүжгийн спортын тэмцээн болох хуваарьтай байна.

Спорт холбоодын нэгдсэн Улсын аварга шалгаруулах тэмцээний нэг онцлог нь нэг тасалбараар 10 өдөр үзэх боломжтой. Харин 14 хүртэлх насны хүүхэд үнэ төлбөргүйгээр хүссэн тэмцээнээ үзэх эрхтэй юм.

UNC холбоодыг дэмжих хөтөлбөр нь Монголын спортын хөгжилд бодит хувь нэмрээ оруулах зорилготой байгуулагдсан. Холбоодын Нэгдсэн УАШТ-д оролцож буй холбоо бүр энэ сангаас 15 сая төгрөгийн тусламж авах бөгөөд энэхүү санхүүжилтийг тухайн спортын ирээдүйн хөгжилд зарцуулах юм.

Гурав дахь удаагийн нэгдсэн улсын аваргад олимпын спортын төрлүүд давамгай байгаагаараа онцлогтой аж. Тэмцээнийг NTV телевиз орон даяар шууд дамжуулна.

Энэ тэмцээний сахиусаар бөхөнг сонгосон байна. Бөхөнгийн харайлтаар дамжуулан байгаль орчны хариуцлага, эв нэгдэл, хүн төрөлхтний няцашгүй оюун санааны хамтын үнэт зүйлсийн бэлэг тэмдэг зөвхөн Монголд төдийгүй дэлхий даяар цуурайтаж, уудам тал нутагт ч бид бүгд, хамтдаа илүү сайхан, илүү ногоон маргаашийн төлөө зоригтой үсрэлтийг хийж чадна.