ТӨСЛИЙН БАЙГАЛЬ ОРЧИН, НИЙГМИЙН БАРИМТ БИЧГИЙГ НИЙТЭД ИЛ ТОД МЭДЭЭЛЭХ ТУХАЙ

Монгол Улсын Засгийн газар, Эрчим хүчний яамны хүсэлтээр Эрчим хүчний салбарын гуравдугаар төсөл (ЭХС-3 төсөл)-ийг Дэлхийн банкны санхүүжилтээр хэрэгжүүлэхээр төслийн бэлтгэл ажил явагдаж байна.

Монгол Улсын хөгжилд амин чухал эрчим хүчний салбар үйлдвэрлэх хүчин чадал хангалтгүй, дэд бүтэц хуучирсан, нүүрснээс ихээхэн хамааралтай, экспортоор хэрэгцээгээ нөхөх шаардлагатай гэх мэт олон сорилтуудтай тулгарч байна. Эдийн засаг сэргэж эрчим хүчний эрэлт хэрэгцээ өсөн нэмэгдэж байгаа энэ үед импортоос хараат хэвээр байх аваас энэхүү сэргэлтэд сөргөөр нөлөөлөх нь дамжиггүй. Иймд дотоодын шийдлүүдийг яаралтай хэрэгжүүлэх, сэргээгдэх эрчим хүчний үлэмж их нөөцөө хуучирч муудсан дэд бүтцээ шинэчилснээр эдийн засгийн эргэлтэд оруулах, өөрийн нөөц бололцоог бүрэн дайчлан илүү ногоон, тогтвортой, хөгжингүй эрчим хүчний салбар бий болгох нь Монгол улсын урт хугацааны тогтвортой хөгжлийг хангахад зайлшгүй шаардлагатай байна.

Дэлхийн банкнаас санхүүжүүлэхээр төлөвлөж буй тус төсөл нь цахилгаан дамжуулах сүлжээний найдвартай байдлыг сайжруулах, сэргээгдэх эрчим хүчний эх үүсвэрүүдийг шинээр сүлжээнд холбох боломж бүрдүүлэх замаар эдгээр бэрхшээлийг шийдвэрлэх зорилготой юм. Энэхүү санаачилга нь Монгол Улсын эдийн засгийг сэргээх “Шинэ сэргэлтийн бодлого”, агаарын бохирдлыг бууруулах үйл ажиллагаа, тогтвортой хөгжлийн зорилтуудтай нийцэж байна.

Санал болгож буй төсөл нь хоёр үндсэн бүрэлдэхүүн хэсэгтэй. Эхний бүрэлдэхүүн хэсгийн хүрээнд Багануур-Чойрын 188 км 220 кВ-ын хоёр хэлхээт цахилгаан дамжуулах агаарын шугам барих, холбогдох Багануур болон Чойр дэд станцуудыг өргөтгөх ажил хийгдэнэ.

Чадавхыг бэхжүүлэх, төслийн хэрэгжилтийг дэмжих үйл ажиллагааг багтаасан хоёрдугаар бүрэлдэхүүн хэсгийн хүрээнд Эрчим хүчний яам (ЭМЯ), Цахилгаан дамжуулах үндэсний сүлжээ (ЦДҮС), Эрчим хүчний зохицуулах хороо (ЭХЗХ), Диспетчерийн үндэсний төв (ДҮТ) зэрэг салбарын үндсэн байгууллагуудын дотоод болон техникийн чадавхыг бэхжүүлэх, үйл ажиллагааны дэмжлэг үзүүлэх, сургалт зохион байгуулах, төслийн өдөр тутмын хэрэгжилт, удирдлагад дэмжлэг үзүүлэх юм. Түүнчлэн, сэргээгдэх эрчим хүчний эх үүсвэрийг эрчим хүчний сүлжээнд холбох, сүлжээний дэвшилтэт үйл ажиллагаа, тухайлбал эрчим хүчний системийн төлөвлөлт, ухаалаг сүлжээний технологийг нэвтрүүлэх чиглэлээр төрийн оролцогч талуудын мэдлэг, ур чадварыг дээшлүүлэхэд чиглэсэн зөвлөх үйл ажиллагаа, судалгааг санхүүжүүлэх болно.

Бэлтгэл ажлын хүрээнд Дэлхийн банкны Байгаль орчин, нийгмийн Стандартын дагуу Байгаль орчин, нийгмийн нөлөөллийн цогц үнэлгээг Оффсет ХХК гүйцэтгэв.

Барилгын ажлын үеийн түр зуурын сөрөг нөлөөлөлд дуу чимээ, замын хөдөлгөөн, иргэдийн эрүүл мэнд ба аюулгүй байдал, бэлчээр талхлах, нүүдлийн шувуудын үржлийн бүсэд нөлөөлөх, газар чөлөөлөлт, нүүлгэн шилжүүлэлт, хөдөлмөрийн аюулгүй байдал, олон нийтийн оролцоо хангалтгүй байх зэрэг сөрөг нөлөөллийн эрсдэл байгааг тодорхойлсон. Амьдрах орчны хуваагдлаас бусад тохиолдолд барилга угсралтын ажилтай холбоотой эрсдэлийг удирдан зохицуулах боломжтой.

Ашиглалтын явц дах эрсдэлд Цахилгаан дамжуулах шугам (ЦДШ)-ыг шувуу мөргөх, цахилгаан соронзон орны нөлөөлөлд өртөх, ажилчдын аюулгүй байдлын эрсдэл байгаа бөгөөд эдгээрийг Дэлхийн Банкны удирдамж, үндэсний стандартын дагуу зохицуулах боломжтой.

Бүрэлдэхүүн хэсэг 2-ын хүрээнд хийгдэх техникийн судалгаанууд нь байгаль орчин, нийгэмд эрсдэл учруулахгүй ч судалгааны дараах төсөл, үйл ажиллагааны нөлөөлөлд анхаарал хандуулах шаардлагатай. Тодорхойлогдсон эрсдэлүүдийн магадлал, цар хүрээнд үндэслэн гаргасан төслийн эрсдэлийн ангилал дараах байдалтай байна, үүнд:

· Байгаль орчинд үзүүлэх нөлөө – Их

· Нийгмийн нөлөөлөл – Дунд зэрэг

Байгаль орчин, нийгмийн дараах баримт бичгүүдийг боловсруулан, олон нийтэд нээлттэй танилцуулж байна:

1. Байгаль орчин ба нийгмийн зорилтын төлөвлөгөө – Төсөл хэрэгжүүлэгч буюу ЭХЯ, холбогдох байгууллагуудаас төслийн эрсдэлийг бууруулах арга хэмжээг хэрэгжүүлэх, тайлагнах, хяналт шинжилгээ, үнэлгээ хийх амлалтуудыг багтаасан бөгөөд Төслийн санхүүжилтийн гэрээний салшгүй хэсэг болох юм.

2. Оролцоог хангах төлөвлөгөө– тус төлөвлөгөө нь төслийн оролцогч талууд, нөлөөлөлд өртөгч, олон нийтийг мэдээллээр хангах, тэдгээрийг төслийн хэрэгжүүлэлт болон хяналтын үйл ажиллагаанд татан оролцуулах арга хэмжээг тодорхойлсон.

3. Нүүлгэн шилжүүлэлтийн баримт бичиг– Тус төслийн хүрээнд нүүлгэн шилжүүлэлт, газар чөлөөлөлт төлөвлөгдөөгүй хэдий ч хэрэгжилтийн шатанд бодит эрсдэл үүсэх тохиолдолд баримтлах стандарт, журам, хэм хэмжээг тус баримт бичигт тусгасан.

4. Хөдөлмөрийн харилцааны удирдлага– төслийн хүрээнд хөдөлмөр эрхлэлттэй холбоотой аливаа эрсдэл, хөдөлмөрийн эрүүл ахуй, аюулгүй байдлыг хангах арга хэмжээ, хөдөлмөр эрхлэлтийн хэм хэмжээг тодорхойлсон баримт бичиг.

5. Байгаль орчны нарийвчилсан үнэлгээ– Монгол Улсын Байгаль орчны үнэлгээний тухай хуулийн дагуу гүйцэтгэсэн байгаль орчны нарийвчилсан үнэлгээний тайлан

6. Байгаль орчин, нийгмийн нөлөөллийн менежментийн төлөвлөгөө (БОМТ) тодорхойлогдсон аливаа эрсдэлийг удирдах, зохицуулах, хянах, сайжруулах, тайлагнах шаардлагуудыг тодорхойлсон нэгдсэн төлөвлөгөө. (Монгол Улсын Байгаль орчны үнэлгээний тухай хуулийн дагуу гүйцэтгэсэн байгаль орчны нарийвчилсан үнэлгээний тайлангийн 7 дугаар бүлэгт)

Та бүхэн өргөнөөр танилцан санал бодлоо 2024 оны 03 дугаар сарын 19-ний өдрийн 15 цагаас өмнө ажлын цагаар 51263094 утас, Хан-Уул дүүрэг 3-р хороо, Чингисийн өргөн чөлөө, Засгийн газрын XIV байр Эрчим хүчний яамны 213 тоот хаягаар эсвэл [email protected] э-мэйлээр ирүүлнэ үү.

Эрчим хүчний яам