.png){kind=logo}
Олон улсын олимпын хороо /ОУОХ/-ны 2020+5 хөтөлбөрийн зөвлөмжийн дагуу и-спортын долоо хоног анх удаа зохион байгуулна.
Энэ оны 6 дугаар сарын 22-25-нд Сингапурт болох уг 7 хоногийн үйл ажиллагаа нь виртуал спортын хөгжлийг дэмжих зорилготой юм.
Дөрвөн өдрийн турш үргэлжлэх фестивалийн үеэр виртуал спортын хөгжлийг олон нийтэд таниулж, хамгийн сүүлийн үеийн технологийн хөгжлийг харуулахаас гадна төрөл бүрийн хэлэлцүүлэг өрнүүлж, боловсролд зориулсан хөтөлбөр хэрэгжүүлж, үзүүлэн тоглолтууд хийнэ.
ОУОХ-ноос и-спортын фестивалийг угтаж цуврал тэмцээнүүдийг дэлхий даяар онлайнаар зохион байгуулахаар төлөвлөж байна. Цуврал тэмцээнүүд 3 дугаар сарын 12-ноос 5 дугаар сарын 15-ны хооронд үргэлжлэх бөгөөд мэргэжлийн болоод сонирхогч хэн бүхэн оролцох боломжтой.
Эдгээр цуврал тэмцээнээс шалгарсан шилдэг 150-200 оролцогч Сингапурт болох финалын тэмцээнд оролцох эрхээ авах юм.
Виртуал тэмцээнийг спортын 11 төрлөөр зохиох бөгөөд одоогоор есөн төрөл нь тодорхой болоод байна. Энэ нь байт харваа, бейсбол, шатар, дугуй, бүжгийн спорт, мото спорт, дарвуулт завь, таеквондо болон теннис ороод байгаа аж.
Хэрэв та өөрийгөө сориод үзэхийг хүсвэл https://olympics.com/en/esports хаягаар зочлоорой.
