Ангилалтай шүүгч болон тоглолт зохион байгуулагчийн сургалт үргэлжилж байна

МХБХ-ны 2023 - 2024 оны улирлын өвлийн амралт дуусаж хөлбөмбөгийн улирал эргэн ирж буйтай холбоотойгоор талбайн тэмцээнүүдийн бэлтгэл ажлын хүрээнд Төв аймаг дахь Л.Сандагдорж багшийн нэрэмжит Шигшээ багийн бэлтгэлийн төвд Ангилалтай Шүүгчийн болон Тоглолт Зохион Байгуулагчийн Нэгдсэн Сургалт зохион байгуулагдаж байна.

Өнөөдөр тус сургалтуудын нээлтэд МХБХ-ны Техникийн захирал асан Ш.Жаргалсайхан болон Шүүгчийн Хорооны дарга Г.Тэгшжаргал нар оролцож МХБХ-ны нийт тоглолт зохион байгуулагч шүүгчид нарт тэмцээн уралдаанд нь амжилт хүслээ.

Тоглолт зохион байгуулагчийн сургалтаар МХБХ-ны дүрэм журмууд шинэчлэгдсэн найруулга орж батлагдсан тул нэгдсэн ойлголттой болох үндсэн зорилго агуулж байгаа бөгөөд, тэмцээнүүдийн шинэчилсэн зохион байгуулалт болон өнгөрсөн хөлбөмбөгийн улирлын тоглолтууд дээр гарсан зөрчлүүдийг ярилцан цаашид тоглолт зохион байгуулагчийн зүгээс клубүүдийн албаны хүмүүс, тоглогчид, шүүгчид болон бусад тоглолттой холбоотой албаныхантай хэрхэн уялдаа холбоогоо сайжруулах тал дээр бодит жишээнүүд дээр тулгуурлан ажилласан онол практикийн хосолсон сургалт болж байна.

Ангилалтай шүүгчийн нэгдсэн семинарт МХБХ-ны А,В,С ангилалтай шүүгч хамрагдан, ангилал бүрдээ тохирсон бие бялдрын шалгалтуудыг өгч, ОУ-ын хөлбөмбөгийн тоглолтын үеэр ихээхэн тохиолддог үйл явдлуудын талаар бичлэг үзэж, дүрмийн мэдлэг ур чадвараа дээшлүүлж мөн тоглогчид дасгалжуулагчтай харилцах харилцааны талаарх сургалт болж байна.