.png){kind=logo}
"Хөгжлийн бэрхшээлтэй хүмүүсийн эрхийн зөрчилд хариу үзүүлэх үр нөлөөг сайжруулахад Иргэний нийгмийн байгууллагуудын хувь нэмэр" төслийн нээлтийн ёслол өнөөдөр /2024.04.01/ ЭМЯ-ны Хурлын танхимд болов.
Европын холбооны санхүүжилтээр Тэгш нийгэм холбоо ТББ, Италийн АИФО ТББ-аас хамтран хэрэгжих энэ төсөл нь Монгол Улсын Засгийн газрын байгууллагууд, Иргэний нийгмийн байгууллага болон Хөгжлийн бэрхшээлтэй иргэдийн байгууллагууд хамтран хөгжлийн бэрхшээлтэй хүний эрхийн зөрчилд хариу үзүүлэхийн тулд төвлөрлийг сааруулсан тогтолцоог бэхжүүлэх мониторинг механизм байгуулах зорилгоор 24 сарын хугацаатай хэрэгжих юм.
Энэхүү төслийн нээлтэд Монгол Улсын Хүний эрхийн үндэсний комиссын дарга Д.Сүнжид, Ерөнхий сайдын нийгмийн бодлогын зөвлөх Ч.Ундрахбаяр, Европын холбооноос Монгол Улсад суугаа төлөөлөгчийн газрын Хамтын ажиллагааны хэлтсийн дарга Адриен Мүрг, Хөгжлийн бэрхшээлтэй хүний хөгжлийн ерөнхий газрын дарга Ц.Нямсүрэн, нар оролцлоо.
Төслийн хүрээнд хөгжлийн бэрхшээлтэй залуучууд, хөгжлийн бэрхшээлтэй 20 хүн, үндэсний түвшинд үйл ажиллагаа явуулдаг Иргэний нийгмийн болон хөгжлийн бэрхшээлтэй иргэдийн 20 байгууллага хамрагдаж, хүний эрхтэй холбоотой бодлого, хууль тогтоомжид нөлөө үзүүлэх чадвартай болох сургалтад хамрагдах юм. Мөн ХЭҮК болон түүний аймгууд дахь референтүүд хөгжлийн бэрхшээлтэй хүний эрхийн зөрчлийн кейсүүдийг илрүүлж, шийдвэрлэх шийдвэрлэх арга хэмжээ ажиллах юм байна.
"Хөгжлийн бэрхшээлтэй хүмүүсийн эрхийн зөрчилд хариу үзүүлэх үр нөлөөг сайжруулахад Иргэний нийгмийн байгууллагуудын хувь нэмэр" төслийн үр дүнд төсөлд хамрагдсан байгууллага, хүмүүс хөгжлийн бэрхшээлтэй хүний эрх /ХБХЭ/-ийн зөрчлийг илрүүлэх төвлөрлийг сааруулах мониторингийн механизм байгуулан ажиллаж, ХБХЭ-ийн талаар мэдээлэл цуглуулж, ХБХЭ-ийн төлөв байдлын илтгэлээр дамжуулж УИХ-д мэдээлэл хүргэх юм байна.
Төсөлд хөгжлийн бэрхшээлтэй хүмүүс, ХБХЭ-ийг хангах Үндэсний зөвлөл, ХЭҮК, ХНХЯ, Хөгжлийн бэрхшээлтэй хүний хөгжлийн ерөнхий газар, Оюуны дархлаа төв ТББ хамтран оролцож байгаа юм.
Уг төслийн нээлтэд оролцож үг хэлсэн хүмүүс болон нийт оролцогчдод хандаж Тэгш нийгэм холбоо ТББ-ын тэргүүн Л.Энхбуянт: "Өнөөдөр энэ танхимд цугласан Олон улсын болон төрийн ба төрийн бус Иргэний нийгмийн байгууллагуудын та бүхэн 30 гаруй жил Монгол Улсын Хөгжлийн бэрхшээлтэй хүмүүсийн эрхийн төлөө хамтдаа зүтгэж ихээхэн туршлага хуримтлуулсан билээ. Өнөөгийн энэ өндөрлөгөөс харж дүгнэхэд бидний үйл хэрэг нэгдмэл нэг зүг тэмүүлсэн зорилт болж хамтдаа хэрэгжүүлэх боломж бүрдсэн гэдгийг илэрхийлж байна. Энэ бүхэнд бидний үйл хэргийн мөн чанар оршиж байгааг онцлон хэлэхэд таатай байна" гэсэн юм.
