.png){kind=logo}
Тайланд улсын Паттаяа хотод ᠋пара пауэрлифтингийн хэвтээ шахалтын Дэлхийн цомын аварга шалгаруулах тэмцээн тавдугаар сарын 5-11-ний өдрүүдэд болж, гавьяат дасгалжуулагч, Үндэсний шигшээ багийн ахлах дасгалжуулагч Д.Баттулга, туслах дасгалжуулагч Б.Энхбаяр нарын удирдлага дор 3 эрэгтэй, 1 эмэгтэй тамирчин хүчээ сорилоо.
Тодруулбал, эрэгтэйчүүдийн 54 кг жинд Д.Жигмэд, 65 кг-д А.Амартайван, 107 кг-д Паралимпын аварга, дэлхийн аварга, дэлхийн дээд амжилтыг эзэмшигч, Хөдөлмөрийн баатар, гавьяат тамирчин Э.Содномпилжээ, эмэгтэйчүүдийн 86 кг-д Б.Уранжаргал нар хүч сорьсон байна.
Тус тэмцээний 54 кг жинд Д.Жигмэд эхний өргөлтөөр цээжнээс 128 кг-ыг шахсанаар алтан медаль хүртэж, залуучуудын Ази тивийн дээд амжилтыг шинэчлэн тогтоолоо. Тэрбээр дараагийн хоёр өргөлтөөр 131, 140 кг-ыг амжилттай шахсанаар дээд амжилтаа дахин шинэчилж, олон улсын хэмжээний мастер цолны болзол хангалаа. Энэ тэмцээнээс “Парис-2024” зуны паралимпын эрхийн оноо олгож байгаа бөгөөд паралимпын эрхийн сүүлийн тэмцээн Гүрж улсад 6 дугаар сарын 20-26-нд болох юм.
Эх сурвалж: БТСУХ
