.png){kind=logo}
ПАРИС, 2024 оны наймдугаар сарын 5. /sport-express.ru/. Ням гарагт болсон Олимпын наадмын 100 м-ийн гүйлтэд АНУ-ын тамирчин Ноа Лайлз 9,784 секундийн амжилтаар алтан медаль хүртлээ. Хоёрдугаар байрт Ямайкийн Кишане Томпсон /9,789 сек/, гуравдугаарт Америкийн Фрэд Керли /9,81 сек/ нар шалгарсан байна.
Токиогийн Олимпын хүрэл медальт Канадын Андре де Грасс шигшээ наймд багтаж чадсангүй.
Зургаан гүйгч зэрэг барианд орсон нь
Энэ зайн дэлхийн дээд амжилтыг домогт Усэйн Болт /9,58 сек/ тогтоосон нь өнөөдрийг хүртэл эвдэгдээгүй байгаа билээ. Энэ хүн спортын замналаа дуусгасны дараа эрэгтэйчүүдийн богино зайн гүйлтийн төрөл “өнчирсөн” мэт болов. Ямайкийн алдарт гүйгчийн оргил үедээ гаргаж байсан амжилтыг хэн ч давтаж чадахгүй байна. Үүнд сул ба давуу талууд бий. Тэр үед Болтод өрсөлдөгч гэж байхгүй, тэрбээр зөвхөн секундомертэй л өрсөлдөхийг нь бид харж байсан билээ.
Харин одоо тамирчид тун ойролцоо өрсөлддөг болжээ. Эхний гуравт орсон медальтнуудын үзүүлэлтүүд ердөө мянганы хувиар хоорондоо зөрүүтэй байгааг та анзаарсан буй заа.
Өчигдөр болсон 100 м-ийн гүйлтийн барианд орсон эхний 6 тамирчны үзүүлэлтийг фотофинишийн аргаар тодорхойлохоос аргагүйд хүрлээ.
Ням гарагт Олимпын хөгжөөн дэмжигчдийн анхаарал Н.Жокович-К.Алькарас нарын тоглолтод төвлөрсөн байсан нь үнэн, гэхдээ хөнгөн атлетикийн тэмцээнийг чимж байдаг 100 м-ийн финалын гүйлт ч мөн адил хэзээ ч мартагдахгүй ээ.
Хөнгөн атлетикийн 100 м-ийн гүйлтэд зургаан тамирчин “нэгэн зэрэг” барианд орсон тохиолдол түүхэнд үгүй. Шууд дамжуулалт хийж байсан телевизийн найруулагчид хүртэл хэн түрүүлснийг мэдэхгүй байлаа. Тэд Ямайкийн Кишан Томпсоныг ялагчаар тодруулаад, эцсийн мөч хүртэл үүндээ итгэлтэй байв. Гэтэл хэний ч мэдэхгүй 23 настай энэ залуу АНУ-ын тамирчин Ноа Лайлзаас 0,005 секундээр!!! хоцрон барианд оржээ.
Та төсөөлөөд үзээрэй: 10 хуваасны нэг биш, 100 хуваасны нэг биш, бүр мянга хуваасны 5 шүү дээ! Үүнтэй төстэй шуугиан тарьсан гүйлт 2004 онд Афинд болсон юм. Тэр үед Америкийн тамирчин Жейсон Гэтлин Португалийн Фрэнсис Обиквелу-гаас 0,01 секундийн өмнө барианд орж байв. Гэхдээ л энэ бол секундийг 100 хуваасны нэг шүү дээ, мянга хуваасны 5 биш!
Зууны хувиар ялагчийг тодруулсан тохиолдол 1980 оны Москвагийн Олимпын үеэр гарч байжээ. Тухайн үед Их Британийн тамирчин Аллан Уэллс Кубын Сильвио Леонардаас зууны нэг секундийн өмнө барианд орсон нь хамгийн ширүүн өрсөлдөөнтэй гүйлт хэмээн Олимпын түүхэнд бичигдсэн байдаг. Харин Стад де Франс цэнгэлдэх хүрээлэнд ням гарагт болсон гүйлт нь дурдсан бүх тохиолдлоос давж гарлаа. Хүрэл медальтныг тодруулахын тулд мөн л фотофинишийг ашиглажээ. Хүрэл медаль авсан тамирчин 6 дугаар байрт орсон тамирчнаас ердөө 0,05 секундийн өмнө барианд орсон нь хөнгөн атлетикийн түүхэнд үзэгдээгүй тохиолдол мөн.
Лайлз дөрвөн алтын төлөө өрсөлдөнө
Телевизийнхэн Томпсоныг ялагчаар тодруулаад байх тэр мөчид Лайлз өөртөө асар их итгэлтэй байлаа. Тэрбээр аварга болно гэдгээ аль хэдийнэ мэдэрчихсэн бололтой. Ялагчийг зарлах тэр мөчид Лайлз “хамгийн хүчтэй нь гэдгээ би харуулж чадсан” хэмээн цэнгэлдэх даяар хашгирч байлаа. Одоохондоо тэрбээр У.Болтын амжилтыг эвдэхээр төлөвлөөгүй байгаа хэдий ч Олимпын наадмаас нэг дор гурван алт авсан домогт гүйгчийн рекорд амжилтыг давж гарах зорилго түүнд бий.
200 м-т одоо түүнд өрсөлдөгч байхгүй мэт санагдана. Өдгөө 27 настай Лайлз Токиогийн Олимпоос энэ зайд хүрэл медаль хүртэж байсан бөгөөд дэлхийн зургаан удаагийн аварга юм.
Эх сурвалж: МОНЦАМЭ Агентлаг тоймч Б.Адъяахүү
