.png){kind=logo}
Дэлхийн олон орны сонсогчдод зориулан Монгол орныг сурталчлах зорилгоор гадаад хэлний нэвтрүүлгийн редакци "Монголын дуу хоолой" радио 1964 онд Монголын үндэсний олон нийтийн радиогийн дэргэд байгуулагдсан юм.
Ийнхүү 60 жилийн тэртээ буюу 1964 оны 10 дугаар сарын 1-нээс монгол, хятад, орос, англи, франц, казах хэлний нэвтрүүлгүүд ээлж дараалан нээгдэж байсан түүхтэй.
Монголын тухай мэдээлэл дэлхий нийтэд хомсхон байсан тухайн цаг үед Радиогийн гадаад нэвтрүүлэг анх цацагдсан өдрөөсөө эхлэн дэлхийн олон орны сонсогчдын анхаарлыг татаж, захидал,х үсэлт тасралтгүй ирж эхэлсэн билээ.
Жишээ нь 1965 оны эхний 10 сард Энэтхэг, Австрали, Индонези, Япон, Канад, Америк, Мехсик зэрэг дэлхийн 20 гаруй орны 200 гаруй сонсогчдоос захидал ирсэн нь тухайн цагтаа томоохон үйл явдал болж, гадаад сурталчилгааг цаашид хөгжүүлэх нь зүйтэй гэдгийг нотолсон байна.
Цаг хугацааны явцад хамгийн олон сонсогчтой монгол, орос, англи, хятад хэлний нэвтрүүлгүүдийг бэхжүүлж, японы сонсогчдын хүсэлтээр 1989 оны 1 дүгээр сараас Япон хэлээр нэвтрүүлэг бэлтгэн дамжуулж эхэлсэн юм.
Монголын Радиогийн Гадаад нэвтрүүлгийн нэр хүнд ,үр нөлөө жил ирэх тусам өсч зарим жилд байнга захидал бичдэг сонсогчдын тоо 5000-д хүрч байлаа. Мөн Ази Номхон Далайн орнуудын Радио нэвтрүүлгийн холбоо 1972 онд гишүүнээрээ бүртгэн авсан юм. "Монголын Дуу Хоолой" радиод өнөөгийн байдлаар дэлхийн 40 гаруй орноос 3 мянга гаруй сонсогч байнга захидал бичиж байна.
Тус радиогийн байнгын сонсогчид Японы Осака, Энэтхэгийн Дели, Хятадын Тэнжин хотуудад сонсогчдын клуб байгуулан нэвтрүүлгийн сонсогдолт ямар байгаагаас эхлээд ямар сэдэв хамгийн их сонирхол татаж байгааг байнга мэдээлж байна. Өнөөдөр богино долгионы зэрэгцээ www.vom.mn” интернет хаягаар “Монголын дуу хоолой”-гийн нэвтрүүлэг дэлхий дахинаа түгж байгаа юм.
Ташрамд дуулгахад, "Монголын дуу хоолой" буюу "VOICE of MONGOLIA" радиогийнхаа энэ 10 дугаар сард тохиож буй түүхт 60 жилийн ойгоо тохиолдуулан өнөөгийн "Монголын дуу хоолой" радиод ажиллаж байгаа хамт олноос МДХ радиод ажиллаж байсан 3 үеийн сэтгүүлч, орчуулагчдын уулзалтыг зохион байгуулсан юм.
