.png){kind=logo}
Улаанбаатар, 2024 оны арванхоёрдугаар сарын 25 /МОНЦАМЭ/. ХХААХҮЯ нь Дэлхийн банкны санхүүжилтээр “Мал аж ахуйн эдийн засгийн эргэлтийг нэмэх төсөл” хэрэгжүүлж байна.
Мал аж ахуйн эдийн засгийн эргэлтийг нэмэх төслөөс “Мал сүргийн бүтээмжийг нэмэх хөтөлбөр”-ийг Сэлэнгэ, Булган, Төв аймгийн зарим суманд хэрэгжүүлж эхэллээ. Хөтөлбөр нь зорилтот орон нутгийн мах, сүүний үхрийн үүлдэрлэг байдал, ашиг шимийн гарц, чанарыг дээшлүүлэх зорилготой бөгөөд цаашид өндөр ашиг шимт үүлдрийн үхрийн цөм сүрэг бүрдүүлэн цэврээр нь сонгон үржүүлэх, түүний үр, хөврөлийг шилжүүлэн суулгах дэвшилтэт аргыг ашиглан үхэр сүргийн хээлтүүлэг, төллөлтийг технологийн дагуу удирдаж, аж ахуйн эдийн засгийн үр өгөөжийг нэмэх арга хэмжээг үе шаттай хэрэгжүүлнэ. Хөтөлбөрийн эхлэл болж, Монгол нутагт нутагшуулан үржүүлж буй махны чиглэлийн өндөр ашиг шимт Сэлэнгэ, Казакын цагаан толгойт, Герефорд үүлдрийн 250 толгой гунж, 100 толгой бухыг махны чиглэлийн үхрийн аж ахуй эрхэлж буй иргэн, аж ахуйн нэгжид нийлүүлж дэмжлэг үзүүлэхэд бэлэн боллоо.
Хөтөлбөрт хамрагдсан иргэн, аж ахуйн нэгж нь тус үхрийг цэврээр нь үржүүлж, төлийг нь чиглэлтэй өсгөн бойжуулж, цөм сүрэг бүрдүүлж, 3 жилийн дараа ижил нас, хүйсний үхрийг эргүүлэн өгснөөр дараагийн малчид хөтөлбөрт хамрагдах боломж бүрдэх юм. Үр дүнд нь төвийн бүсийн үхэр сүргийн махан ашиг шимийг 10-15 хувиар нэмэгдэнэ. Ийнхүү махны чиглэлээр төрөлжсөн үүлдрийн үхрийн махлаг, түргэн өсөлттэй шинж чанарыг ашиглан үхэр сүргийн махан ашиг шимийг нэмж, үхрийн махны эрэлт хэрэгцээг хангахад бодит хувь нэмэр оруулах боломж бүрдэхийг ХХААХҮЯ мэдээлэв.
Дээрх төслийн зорилго нь малын эрүүл мэнд, ашиг шим, нэмүү өртгийн сүлжээний эдийн засгийн эргэлтийг нэмэх, онцгой нөхцөл байдал, гамшгийн үед шуурхай, үр дүнтэй хариу арга хэмжээ авч хэрэгжүүлэх юм. Уур амьсгалын өөрчлөлт, ган, зудын давтамж, бэлчээрийн даац хэтрэх, малын тооны хэт өсөлтөөс шалтгаалан мал аж ахуйн үйлдвэрлэлийн бүтээмж, үр ашгийг нэмэн, төвлөрсөн хот суурин газрын хүн амын хүнсний хангамж, аюулгүй байдлыг сайжруулах, мал аж ахуйн тогтвортой үйлдвэрлэл, эрчимжүүлэлтийг дэмжих арга хэмжээг хэрэгжүүлэх шаардлага тулгарч байгаа аж.
Эх сурвалж: МОНЦАМЭ Агентлаг Б.Оюундэлгэр
