.png){kind=logo}
"Эерэг хандлага - Эрүүл нийгэм" үндэсний аянг 2023 оны 4 дүгээр сарын 1-нээс 11 дүгээр сарын 30 хүртэл улс даяар өрнүүлнэ. Монгол Улсын урт хугацааны хөгжлийн бодлого, "Шинэ сэргэлтийн бодлого"-ыг салбарын хэмжээнд хэрэгжүүлэх, идэвхтэй амьдралын хэвшил бүхий иргэн, гэр бүлийг дэмжих, биеийн тамир спортоор хичээллэх ээлтэй орчныг бүрдүүлэх салбарын төр болон ТББ-уудын ажилчид, тамирчин, дасгалжуулагч, шүүгчдийн ёс зүй, соёл, харьцаа, хандлагыг дээшлүүлэх, спорт, биеийн тамирын арга хэмжээ, үйл ажиллагаагаар дамжуулан нийгэмд үзүүлэх эерэг нөлөөллийг нэмэгдүүлэхэд энэ аяны зорилго орших юм.
"Эерэг хандлага - Эрүүл нийгэм" үндэсний аянд 21 аймаг, нийслэлийн нийт иргэд, хамт олон, аж ахуйн нэгж, төрийн болон ТББ-ууд, бүх шатны сургуулийн сурагч, оюутнууд, цэцэрлэгийн багачууд, БТСХ-д, Спорт холбоод, багш, дасгалжуулагч, шүүгч, тамирчид хамрагдсанаар эерэг хандлага-эрүүл нийгмийг бий болгож, аж амьдралдаа хэрэгжүүлж хэвших эхлэл тавигдана.
Аяны хүрээнд 5 зорилт дэвшүүлсэн байна. Үүнд:
1. Байгууллага, хувь хүний соёл, эерэг ханплага, эелдэг харьцааг сайжруулах
2. Байгууллагын болон бэлтгэлийн заал, талбайн цэвэр орчныг бүрдүүлэх
3.Олон нийтэд чиглэсэн нөлөөллийн ажлуудыг зохион байгуулах
4. Салбарын байгууллагууд бүх шатандаа үйл ажиллагаа, арга хэмжээний болон зохион байгуулалтын цагийг нарийн баримтлах
5. Спортын салбарт зохион байгуулагдаж буй бүхий л үйл ажиллагааны удирдамжид "Алсын хараа - 2050" Монгол Улсын урт хугацааны хөгжлийн бодлого, "Шинэ сэргэлтийн бодлого"-д тусгагдсан зорилго, зорилтуудыг онцгойлон анхаарч тусган хэрэгжүүлэх юм байна.
Олимп нийтийн биеийн тамир, үндэсний спортын хороо, БТСУХ-ноос санаачилж байгаа уг аян дээр дурдсан зорилтуудаас гадна хэвлэл мэдээллээр тамирчид, дасгалжуулагчид, албаны төлөөллийг хамруулан иргэдэд ёс зүй, эрүүл мэнд, эерэг хандлагын тухай өргөн мэдээлэл, контентууд хүргэж сурталчилан таниулах юм.
Мөн Боловсрол, шинжлэх ухааны яамтай хамтарч ЕБС-ийн сурагчид, багш нарыг хамарсан нөлөөллийн ажлуудыг сум, хороо, аймаг, дүүрэг, хот, улсын хэмжээнд зохион байгуулахаар төлөвлөжээ.
