Мэдээллийг ашиглан оновчтой ухуулга, нөлөөлөл хийх тухай сургалт боллоо

Сүрьеэ өвчний талаар нийгэмд харилцан адилгүй ойлголт их байдаг. Сүрьеэгийн тусламж үйлчилгээнд ч эмч, өвчтөнүүд хувьд анхаарах асуудал их байна. Сүүлийн үед сүрьеэ бол зөвхөн эмнэлгийн байгууллагын эрхлэх ажил биш, нийгмийн асуудал, хүн бүхэнд хамаатай асуудал болсон тухай яригдаж байгаа.

Иймд сүрьеэгийн тусламж үйлчилгээнд олон нийтээр удирдуулсан хяналтын тогтолцоог бий болгох төслийг Эрүүл мэнд нийгмийн бодлогын хүрээлэнгээс Эрүүл мэндийн яам, Глобаль сангийн захиалгаар хэрэгжүүлж эхлээд байгаа.

Сүрьеэгийн тусламж үйлчилгээг хүртэгч иргэд, олон нийтийг мэдлэгжүүлж, чадавхжуулан тэдний оролцоог нэмэгдүүлэх, улмаар тусламж үйлчилгээнд хяналт тавих тогтолцоог бий болгох зорилгоор сүрьеэгээр өвчилсөн болон даван туулсан иргэдээс тогтмол мэдээлэл цуглуулж, хамтран ажиллагч талуудтай мэдээллийг хуваалцаж, шийдвэр гаргагчдад мэдээ, мэдээллийг хүргэж, нөлөөлөх боломжийг эрэлхийлэх шинэ боломжийг нээх зорилгоор Баянзүрх, Сонгинохайрхан дүүргүүд, Хэнтий, Дархан-Уул аймгуудад олон нийтээр удирдуулсан хяналтын зөвлөл байгуулан ажиллаж байна.

Олон нийтээр удирдуулсан хяналтын (ОНУХ) хүрээнд бий болсон мэдээллийг хэрхэн ашиглах болон оновчтой ухуулга нөлөөллийн ажлыг хийж, үр нөлөөг сайжруулахад идэвхтэй оролцох сургагч багш нарыг бэлтгэх сургалтыг Эрүүл мэнд нийгмийн бодлогын хүрээлэнгээс энэ оны 6 дугаар сарын дундуур ЭМЯ-д амжилттай зохион байгууллаа.

Тус сургалтад Баянзүрх, Сонгинохайрхан дүүргүүд, Хэнтий, Дархан-Уул аймгуудын Олон нийтээр удирдуулсан хяналтын салбар зөвлөлийн гишүүд, ХӨСҮТ, аймаг дүүргийн ЗДТГ, Эрүүл мэндийн газар болон бусад төрийн болон олон нийтийн байгууллага, иргэдийн төлөөлөл 32 хүн оролцлоо.

Сургалтад оролцогчдод мэдээллийг хэрхэн ашиглаж нөлөөллийн ажлыг зохион байгуулах, сургалт удирдан зохион байгуулах ур чадвар, сүрьеэ өвчний тусламж үйлчилгээний бодлого хөтөлбөр, үйлчилгээ авагчийн эрх, үүрэг болон мэдээллийг үр дүнтэй түгээх арга хэрэгслүүд, ОНУХ мэдээллийг ашиглан үйлчилгээ үзүүлэгч болон бодлого гаргагчдад нөлөөлөх, олон нийтэд нөлөөлөх үйл ажиллагаа, аяны контентыг хэрхэн бүтээх талаар мэдлэг, ур чадварыг олгосон юм. Сургалтын төгсгөлд 32 оролцогч нарт гэрчилгээ гардууллаа.

Ташрамд дурдахад, оролцогчид сургалтын сэдэв, агуулга хоорондын уялдаа сайтайгаас гадна хором бүр үнэ цэнтэй, мэдлэг мэдээллийг түгээж чадсан, сайхан сургалт болсон тухай сэтгэл хангалуун ярьж байлаа.

Г.Энхбаатар