.png){kind=logo}
Боловсрол, Шинжлэх Ухааны Яамны Төрийн нарийн бичгийн дарга Л.Цэдэвсүрэн ЖАЙКА-ийн техникийн хамтын ажиллагааны “Монгол-Япон эмнэлгийн менежмент, эмнэлгийн мэргэжилтний сургалтын үйл ажиллагааг бэхжүүлэх төсөл”-ийн мэргэжилтнүүдийг 2023 оны 11 дүгээр сарын 1-ний өдөр хүлээн авч уулзлаа.
Уулзалтын эхэнд төслийн явцын талаар Монгол-Японы эмнэлгийн захирал М.Адилсайхан, төслийн ахлах зөвлөх Шимада Масааки, төслийн дэд удирдагч Або Хироши нар мэдээлэл хийв.
Монгол-Японы эмнэлэг 2019 онд ашиглалтад орсон бөгөөд Монголын анхны их сургуулийн эмнэлэг юм. Японы Токүшима их сургууль, Эхимэ их сургуулийн хамтын ажиллагааны хүрээнд Японы их сургуулийн эмнэлгүүдийн менежментийн тогтолцоо, эрүүл мэндийн тусламж үйлчилгээний тогтолцоог тус эмнэлэг үйл ажиллагаандаа нэвтрүүлсэн. Уг төсөл нь Монгол-Япоын эмнэлгийн менежментийг сайжруулах, их сургуулийн эмнэлгийн боловсролын чиг үүргийг бэхжүүлэх зорилгоор 2023 оны 6 дугаар сараас хэрэгжиж эхэлсэн.
Төрийн нарийн бичгийн дарга Л.Цэдэвсүрэн Монгол Улсын анхдагч их сургуулийн эмнэлгийн хувьд Монгол-Япон эмнэлгийн үйл ажиллагаа, менежментийг тогтворжуулахын тулд эмнэлгийн мэргэжилтнүүдэд урьд өмнө байгаагүй хөдөлмөрийн шинэлэг орчин бүрдүүлэх нь чухал бөгөөд үүнд төсөл том үүрэг гүйцэтгэнэ гэв. Мөн Монгол-Япон эмнэлгийн төдийгүй Монгол Улсын хэмжээнд эмнэлгийн тусламж үйлчилгээг сайжруулахын тулд төслийн үйл ажиллагааг хэрэгжүүлэхэд Боловсрол, Шинжлэх Ухааны Яам болон бусад холбогдох яамдтай хамтран ажиллах шаардлагатайг онцоллоо.
Төслийн ахлах зөвлөх Шимада Масааки Төрийн нарийн бичгийн дарга Л.Цэдэвсүрэнд төслийн талаар өндөр хүлээлт, ойлголттой байгаад талархаж Монгол Улсын эрүүл мэндийн салбарт хувь нэмрээ оруулах хүсэлтэй байгаагаа илэрхийлэв.
