.png){kind=logo}
Олон улсын сагсанбөмбөгийн холбооны “FIBA 3x3 World Cup 2023” Дэлхийн цомын аварга шалгаруулах тэмцээн 2023 оны 5 дугаар сарын 30-наас 6 дугаар сарын 4-ны өдрүүдэд Австри улсын Вена хотод болно.
Монголын эрэгтэй шигшээ баг D хэсэгт Нидерланд, Швейцар, Япон болон урьдчилсан шатнаас шалгарах нэг багтай таарсан бол эмэгтэй шигшээ баг C хэсэгт АНУ, Канад, Унгар болон урьдчилсан шатнаас шалгарах нэг багтай тоглохоор тус тус оноолт таарчээ.
Сагсан бөмбөгийн 3x3 төрлөөр Монголын эмэгтэй шигшээ баг 2020 оны Токиогийн олимпын наадамд оролцож байсан билээ. Харин 3x3 төрлийн сагсан бөмбөгийн дэлхийн чансаанд эрэгтэй шигшээ баг тавдугаар, эмэгтэй шигшээ баг 11 дүгээр байрт жагсаж байгаа юм байна.
Энэхүү 8 дахь удаагийн тэмцээнд эрэгтэй 20, эмэгтэй 20 нийт 40 баг өрсөлдөх бөгөөд ДАШТ-ээс медаль хүртсэн багууд “Парис-2024” олимпын наадамд оролцох эрх авах юм.
Ташрамд дуулгахад, “Парис 2024” Олимпын наадмын эрх олгох шинэ цикло эхэлж байгаатай холбогдуулан Монголын 3х3 бүх насны шигшээ багуудын хурал болж шинэ улирлын төлөвлөгөөгөө ярилцсан байна.
