.png){kind=logo}
Зуны олимпийн XXXIII наадмын уралдаан тэмцээний эргэн тойронд болж буй үйл явдлуудыг базваас:
*****
Эмэгтэйчүүдийн өндрийн харайлтад Украины Ярославө Магучих 2 м 00 см -ийг эхний оролдлогоор харайсан тул алтан медаль хүртэж, түүнтэй адил 2м 00 см харайсан Австралийн Н.Олислагерс хүртэв.
Хэдхээн хоногийн өмнө Магучих 2м 10 см өндрийг давж, 37 жил тогтсон дэлхийн рекордыг шинэчилсэн билээ.
*****
Спортын гимнастикийн эмэгтэйчүүдийн өндөр нам савлуурт Алжирын гимнастикч Кайлия Немур алтан медаль хүртлээ. Тэрбээр Алжирын төдийгүй Африк тивийн анхны олимпын аварга гимнастикч боллоо. Францад төрсөн, алжир цагаачдын удам, 17 настай энэ охин өнгөрсөн жилийн ДАШТ-ээс мөнгөн медаль хүртэж байсан юм.
*****
Хөнгөн атлетикийн эмэгтэйчүүдийн гурвын харайлтад Карибын тэнгист орших 70 гаруйхан мянган хүн амтай Доминика арлын тамирчин Теа Лафон түрүүлж, улсынхаа түүхэнд анхны олимпын медалийг авчирсан. Эмэгтэйчүүдийн 100м-ийн гүйлтэд Доминика арлын хөрш Сент Люси арлын тамирчин Жюльен Альфред мөн улсынхаа түүхэн дэх анхны олимпийн медалийг авсан. Карибын тэнгис энэ өдрүүдэд жинхэнэ цалгиж байгаа байх даа.
*****
АНУ-ын гимнастикийн од Симоне Байлс "Парис-2024" олимпоос 3 дахь алтан медалиа хүртлээ. Энэ удаа Байлз өөрийнхөө хамгийн дургүй дасгал гэдэг харайлтад түрүүлэв. Тэрбээр багийн болон хувийн олон төрөлтөд алтан медаль өмнө нь хүртээд байсан юм.
Одоо чөлөөт дасгал болон дамнуурга гэсэн дасгалд медаль авах боломжтой.
*****
Филиппиний Карлос Юло эрэгтэйчүүдийн гимнастикийн харайлт болон чөлөөт дасгалд түрүүлж, хоёр алтан медаль зүүгээд байна. 24 настай Юло Филиппиний олимпын хоёр дахь аварга тамирчин, нэгээс дээш алтан медаль авсан анхны тамирчин, анхны олимпын аварга гимнастикч болж байна.
*****
Усанд сэлэлтийн эрэгтэйчүүдийн 4х100 м холимог буухиад АНУ-ын баг түүхэндээ анх удаа (!!!) ялагдал хүлээлээ. 1960 онд энэ буухиа олимпын хөтөлбөрт орсноос хойш АНУ-ын эрчүүд энэ буухиад тасралтгүй (Зөвхөн 1980 оны олимпод оролцоогүй) алтан медаль авсан ажээ. Тэгвэл энэ удаа мөнгө дээр буув.
Алтан медалийг БНХАУ-ын баг хүртэхэд 4 дэх ээлж буюу чөлөөт сэлэлтээр уралдсан олимп, дэлхийн аварга, дэлхийн рекорд эзэмшигч Пань Жан Лэ онцгой гавьяа байгуулсан. Америкчууд эхний гурван ээлжинд тувтан хошуучилж байгаад хамгийн сүүлийн мөчид тэргүүллээ алдсан билээ.
*****
Алдар цуут домогт аваргууд амжилтаа улам л баяжуулсаар байна. Францын жүдоч "Тэдди баавгай" Тэдди Ринер олимпийн тав дахь алтан медалиа багийн төрлөөр хүртсэн бол АНУ-ын усан спортын од Кэти Ледеки дөрвөн олимп дараалан алтан медаль зүүж буй анхны эмэгтэй усанд сэлэгч боллоо.
Эх сурвалж: Ц.Энхтүвшин Таван цагариг сонин
