.png){kind=logo}
Өнөөдөр буюу 2023 оны гуравдугаар сарын 21-ний өдөр болох үйл явдлын талаар зарим мэдээллийг та бүхэнд тоймлон хүргэж байна.
08.00 цагт ЭМЯ-ны хурлын Б танхимд: Эрүүл мэндийн сайд С.Чинзоригийн санаачилгаар зохион байгуулж буй “Эмчээ сонсъё” ээлжит уулзалт болно. Энэ удаад хувийн хэвшлийн эрүүл мэндийн байгууллагын төлөөлөлтэй уулзаж иргэдэд эмнэлгийн тусламж үйлчилгээ үзүүлэхэд тулгамдаж буй асуудлын талаар санал солилцоно.
09.00 цагт МУИС-ийн Номын санд: Олон улсын нийгмийн ажилтны өдрийг тохиолдуулан МУИС-ийн Социологи Нийгмийн ажлын тэнхимээс "Хамтран ажиллах замаар ялгаатай байдалд хүндэтгэлтэй хандахуй" нийгмийн ажлын симпозиум зохион байгуулна. Симпозиумд нийгмийн ажлын мэргэжилтэн бэлтгэдэг их сургуулиудаас гадна хороо, сургуулийн нийгмийн ажилтнууд, төрийн бус байгууллагын төлөөлөл оролцож нийгмийн ажлын өнөөгийн боловсрол, нийгмийн тэгш бус байдал, хувьсан өөрчлөгдөж буй нийгмийн орчинд нийгмийн ажлын үйлчилгээг хэрхэн үзүүлж буй талаар хэлэлцэнэ. Утас: 99002019 /502 тоот/
09.00 цагт Яармаг дахь Хангарди ордны Хүндэтгэлийн танхимд: Нийслэлийн нутаг дэвсгэр дэх барилгын чанар, аюулгүй байдал, стандарт, өнөөгийн нөхцөл байдлын талаар “Барилгын чанар, аюулгүй байдал, стандарт” сэдэвт зөвлөгөөн болно. Утас: 99037310
09.30 цагт Цэнгэг усны нөөц, байгаль хамгаалах төвд: Дэлхийн усны өдрийг тохиолдуулан Монгол Улсын Ерөнхийлөгч Ухнаагийн Хүрэлсүхийн санаачилгаар зохион байгуулагдах “Цэнхэр алт” усны салбарын үндэсний чуулганы "Гадаргын усны нөөц ба тулгамдсан асуудлууд” сэдэвт салбар хуралдаан болно. Утас: 51-265526
10.00 цагт Үндэсний Төв номын санд: Монгол Улсын Хөдөлмөрийн баатар, Төрийн шагналт, Ардын уран зохиолч Дэндэвийн Пүрэвдоржийн мэндэлсний 90 жилийн ойд зориулсан "ХХ Зууны Монгол найраглалын үнэт зүйл - Д.Пүрэвдоржийн уран бүтээл" сэдэвт эрдэм шинжилгээний хурал болно. /Ерөнхийлөгчийн нэрэмжит уншлагын танхимд/
10.00 цагт ГЕГ-т: Боомтын үйл ажиллагаа хэвийн горимд шилжиж эхэлсэнтэй холбоотой мэдээлэл болон бусад хэд хэдэн асуудлаар хэвлэлийн бага хурал зарлалаа. Утас: 99145985, 99106505
12.00 цагт ”Зууны мэдээ” сонины Үндэсний мэдээллийн төвд: Залуу дуучин Г.Даваадалай 21 аймгаар хийх бие даасан уран бүтээлийн аялан тоглолтынхоо тухай мэдээлэл өгнө.
12.00 цагт ОБЕГ-т: Үндэсний аюулгүй байдлын зөвлөл, Онцгой байдлын ерөнхий газар, нийслэлийн Засаг даргын Тамгын газар хамтран газар хөдлөлтийн гамшгаас урьдчилан сэргийлэх, ард иргэдэд мэдлэг, мэдээлэл олгох, төрийн болон төрийн бус байгууллагуудын уялдаа холбоог сайжруулах зорилгоор ирэх тавдугаар сарын 24-26-ны өдрүүдэд “Стратегийн команд штабын сургууль”-ийг зохион байгуулахаар бэлтгэл ажлыг хангаж байгаа талаар хэвлэлийн хурал зарлалаа. Утас: 86150069
