105 м-ийн гүнд усан доогуур хонгил барьжээ

БЭЭЖИН, 2026 оны аравдугаар сарын 3 /Kazinform/. Хятад дахь хамгийн урт усан доорх авто замын хонгилыг бамбай холболтын аргаар ухаж дуусжээ. Энэ тухай Синхуа мэдээлснийг Kazinform агентлаг дамжууллаа.

Хятадын Төмөр замын барилгын корпорацын мэдээлснээр, хонгил ухагч машин Шандун мужийн Жяожоу буланд далайн түвшнээс доош 105 метрийн гүнд хонгилыг ухаж дуусгасан байна.

Уг булангаар дамжих энэхүү хоёр дахь хонгил нь Чиндао хотын төв хэсгийг баруун эрэг дэх шинэ дүүрэгтэй холбох юм. Хонгилын нийт урт нь 17.48 км бөгөөд үүнээс 14.37 км нь хонгилын үндсэн хэсэг ажээ. Уг хэсэг нь авто замын хоёр хонгил ба тэдгээрийн дундахь засвар үйлчилгээний хонгилоос бүрдэнэ. Чиглэл бүр нь гурван эгнээ замтай бөгөөд түүгээр 80 км/цаг хүртэл хурдлах боломжтой.

Хятадын Төмөр замын барилгын корпорацийн 14 дүгээр товчооны дарга Ван Зюньпиний ярьснаар, хонгилыг барихын тулд бамбай холболтын ба өрөмдлөг-тэсэлгээний гэсэн хоёр аргыг хэрэглэсэн байна. Ингэхдээ Жяожоу булангийн баруун ба зүүн эргээс нэгэн зэрэг ухаж эхэлсэн бөгөөд энэхүү хоёр хэсэг нь усан дор холбогджээ.

Үндсэн хонгилын гүн нь 95 м бол засвар үйлчилгээний хонгилын гүн нь 105 м ажээ. Ийм гүнд усны даралт их байдаг тул туннелийн битүүмжлэл ба усны хамгаалалтад онцгой шаардлага тавигддаг.

Хонгилыг барих явцад шнекэн дамжуулагч, бункер, чулуу бутлагчаас бүрдсэн хөрс зайлуулах шинэ системийг анх удаа хэрэглэснээр ажлын бүтээмжийг нэмэгдүүлж, бөглөрөх эрсдлийг бууруулсан байна. Түүнчлэн малталтын явцад тоног төхөөрөмжийн тогтворжилтыг хангахын тулд чичиргээнээс хамгаалах технологийг боловсруулжээ.

Шинэ хонгил ашиглалтад орсноор Жяожоу булангийн одоогийн хонгил, гүүр болон замын бусад дэд бүтэц нь булангаар тусгаарлагдсан Чиндао хотын дүүргүүдийг холбосон олон түвшний тээврийн сүлжээг бүрдүүлэх болно.

Хятадын Тээврийн яам долоодугаар сард "Арван тавдугаар таван жилийн төлөвлөгөө"-ний (2026–2030 он) хүрээнд тээврийн цогц тогтолцоог хөгжүүлэх төлөвлөснөө зарласан юм. Ингэснээр 2030 он гэхэд тээврийн үйлчилгээний орчин үеийн тогтолцоог үндсэнд нь бий болгож дуусгах зорилт тавин ажиллаж байна.

Эх сурвалж: МОНЦАМЭ Б.Адъяахүү