.png){kind=logo}
МОСКВА, 2026 оны дөрөвдүгээр сарын 22 /TASS/. 2025 онд дэлхийд хамгийн томд тооцогдож байсан А23а мөсөн уул Өмнөд далайд хөвөх явцдаа бүрэн хагарч хуваагдсан тухай Арктик ба Антарктикийн судалгааны хүрээлэн мэдээлжээ.
"Судлаачдын 40 шахам жилийн турш ажиглаж байсан дэлхийн хамгийн том А23а мөсөн уул түүх болон үлдэж байна. Энэхүү аварга мөсөн уул нь жижиг хэсгүүд болон задарч, хэмжээ нь 99 хувиар багассан" гэж тус хүрээлэнгийн мэдээлэлд дурджээ.
А23а мөсөн уул нь 1986 онд Фильхнерийн мөсөн тавцангаас тасарсан юм. Тухайн үед талбай нь 4170 хав.дөр.км байжээ.
Уг мөсөн уул 30 гаруй жилийн турш Уэдделлийн тэнгисийн төв хэсэгт гүехэн усанд "хайргадаж" байгаад Антарктидын эргийн дагуу хөвж эхэлсэн ба 2023 оны 11 дүгээр сарын дундуур ил гарч иржээ.
2025 оны эхээр мөсөн уул Өмнөд Жоржиа арлыг чиглэн хөвж эхэлснийхээ дараа уг арлаас 80 км-ийн зайд дахин гүехэн усанд 2025 оны 1-5 дугаар сар хүртэл гацжээ. Үүний дараа арлын зүүн талаар тойрон хөвж эхэлсэн байна. 2025 оны наймдугаар сарын сүүлчээр мөсөн уулаас 60-300 хавтгай дөрвөлжин км талбайтай гурван том хэсэг нэгэн зэрэг салсан байна. Ийнхүү нийт талбайнхаа 70 орчим хувийг алдсанаар "дэлхийд хамгийн том" гэгдэхээ больсон юм.
"Өнгөрсөн онд А23а нь дэлхийн хамгийн том мөсөн уул хэвээр байсан боловч есдүгээр сард энэ статусаа алдсан. Нэгдүгээр сард мөсөн уулын талбай ойролцоогоор 1,300 хав.дөр.км байсан бол одоо 50 хүрэхгүй хав.дөр.км болоод байна. Одоогоор А23а мөсөн уул задгай усанд хөвсөөр байгаа бөгөөд бидний нүдэн дээр хэд хэдэн хэсэг болон салж байна. Сүүлийн гурван сарын хугацаанд 1 000 орчим км замыг туулж, Өмнөд болон Атлантын далайн хил хязгаарыг даван, одоо өмнөд өргөргийн 49° орчимд хөвж байна" хэмээн AARI-ийн ус цаг уурын мэдээллийн төвийн ахлах мэргэжилтэн Полина Солощук ярилаа.
Эх сурвалж: МОНЦАМЭ Агентлаг Д.Жаргал
Сэтгэгдэл (0)
Анхаар!
Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд хариуцлага хүлээхгүй. !!!