Энэ долоо хоногт Цагдаа, дотоодын цэргийн байгууллагаас зохион байгуулсан иргэд, олон нийтэд чиглэсэн ОНЦЛОХ үйл явдлыг тоймлон хүргэж байна.

ЦАГДААГИЙН БАЙГУУЛЛАГААС НАСАНД ХҮРЭЭГҮЙ ХҮНИЙ ЭСРЭГ ҮЙЛДЭГДСЭН БЭЛГИЙН ХҮЧИРХИЙЛЛИЙН ГЭМТ ХЭРЭГТЭЙ ТЭМЦЭХ, УРЬДЧИЛАН СЭРГИЙЛЭХ “НУУГДМАЛ” АРГА ХЭМЖЭЭГ ЭХЛҮҮЛЛЭЭ

Хүүхдийг бэлгийн хүчирхийлэл, аливаа эрсдэлээс урьдчилан сэргийлэх, хүүхдийн эрхийг хамгаалах, аюулгүй байдлыг хангахад эцэг эх, асран хамгаалагчийн үүрэг, хариуцлагыг нэмэгдүүлж, оюутан сурагчид, иргэдийн эрх зүйн боловсролыг дээшлүүлэх, далд хэлбэрт үйлдэгдсэн хүүхдийн эсрэг бэлгийн хүчирхийллийн хэргийн талаар мэдээлэл цуглуулах, илрүүлэх, урьдчилан сэргийлэх, шалгаж шийдвэрлэх ажиллагааг эрчимжүүлэх чиглэлээр 2023 оны 3 дугаар сарын 15-ны өдрөөс 04 дүгээр сарын 28-ны өдрийг дуустал “Нуугдмал” арга хэмжээг зохион байгуулж байна.

ЦАГДАА, ПРОКУРОР, ШҮҮХИЙН БАЙГУУЛЛАГЫН ХАМТАРСАН “ХАНГАЙН БҮС”-ийн зөвлөгөөн болов

Эрүүгийн хэргийн илрүүлэлт, шийдвэрлэлтийг нэмэгдүүлэх, гэмт хэргээс урьдчилан сэргийлэх ажлын чиглэлээр цагдаа, прокурор, шүүхийн байгууллагын хамтарсан “Хангайн бүс”-ийн зөвлөгөөнийг Мөрдөн байцаах албанаас санаачлан 2023 оны 03 дугаар сарын 20-ны өдөр цахимаар зохион байгууллаа.

Зөвлөгөөнд Мөрдөн байцаах албаны дарга, Дүн шинжилгээ, үнэлгээ, хяналт шалгалтын хэлтсийн дарга, зөвлөлийн гишүүд, Архангай, Орхон, Хөвсгөл, Булган, Өвөрхангай, Баянхонгор зэрэг 6 аймгийн ерөнхий шүүгч, шүүгч, ерөнхий прокурор, орлогч прокурор, нутаг дэвсгэр хариуцсан цагдаагийн газрын дарга, дэд дарга, мөрдөн байцаах тасгийн дарга нар болон алба хаагчид хамрагдаж, нийт 119 алба хаагч 25 байршлаас цахимаар оролцлоо.

“ЗӨРЧЛИЙН БҮРТГЭЛ, МЭДЭЭЛЛИЙН НЭГДСЭН САН”-г ашиглахтай холбогдсон сургалт зохион байгуулав

Хууль зүй, дотоод хэргийн сайдын 2020 оны А/208 дугаар тушаалаар “Зөрчлийн бүртгэл, мэдээллийн сан”-г ашиглах болсонтой холбогдуулан программ хангамжийн шалгуур үзүүлэлт, өгөгдлийн бүрдэлт, ашиглалтыг сайжруулах чиглэлээр цагдаагийн байгууллагын мэдээлэл судалгааны чиглэлээр ажиллаж байгаа алба хаагчдыг дадлагажуулах, мэдээллийн нэгдсэн санд ажиллах чадварыг дээшлүүлэх, шинээр томилогдсон алба хаагчдыг чадавхжуулах зорилгоор сургалт зохион байгууллаа.

Тус сургалт нь энэ оны 03 дугаар сарын 20,21-ний өдрүүдэд үргэлжлэх бөгөөд “Зөрчлийн бүртгэл, мэдээллийн нэгдсэн сан”-ийн ойлголт, санд гомдол мэдээлэл шинээр бүртгэх, гомдол мэдээллийн шийдвэрлэлт, зөрчил шалган шийдвэрлэх ажиллагааны бүртгэл хийх, бүртгэл хийхэд гарч буй алдаа зэрэг сургалтуудыг үе шаттай зохион байгуулж байна.

Сургалтад нутаг дэвсгэр хариуцсан цагдаагийн байгууллагын мэдээлэл судалгаа хариуцсан 41 алба хаагч хамрагдаж, зөрчлийн бүртгэл, мэдээллийн нэгдсэн сангийн бүрдүүлэлт, ашиглалт, мэдээллийн нэгдсэн санд гарч буй зөрүүг хэрхэн зөвтгөх талаар арга зүйг эзэмших юм.

АНУ-аас Монгол Улсад суугаа ЭСЯ-ны Аюулгүй байдлын асуудал эрхэлсэн Дэд атташе Ж.Пиззиллог хүлээн авч уулзав

Цагдаагийн ерөнхий газрын Нийтийн хэв журам хамгаалах, олон нийтийн аюулгүй байдлыг хангах албаны удирдлагууд Америкийн Нэгдсэн Улсаас Монгол улсад суугаа элчин сайдын яамны Бүс нутгийн аюулгүй байдлын албаны Аюулгүй байдлын асуудал эрхэлсэн дэд атташе Жозеф Пиззилло, ажилтан Х.Нарантуяа нарыг өнөөдөр /2023.03.22/ хүлээн авч уулзлаа.

Уулзалтад тус албаны дарга, цагдаагийн хурандаа Н.Лхагвасайхан, Дэд бөгөөд Захиргааны удирдлагын хэлтсийн дарга, цагдаагийн дэд хурандаа Н.Амарсанаа болон тус албаны удирдлагууд оролцсон юм.

Энэхүү уулзалтаар хамтын ажиллагааны өнөөгийн нөхцөл байдал, тулгамдаж буй асуудал, ойрын хугацаанд хамтран хэрэгжүүлэх ажил, арга хэмжээ болон алба хаагчдыг сурган дадлагажуулахад хэрхэн үр дүнтэй хамтран ажиллах талаар хэлэлцэж, санал солилцлоо.

"Миний оролцоот нийгэм" гэмт хэрэг, зөрчлөөс урьдчилан сэргийлэх шторкын тэмцээн амжилттай болов

Баянгол дүүргийн гэмт хэргээс урьдчилан сэргийлэх ажлыг зохицуулах зөвлөл, Баянгол дүүргийн Цагдаагийн газар, "Хүрээ" мэдээлэл холбоо, технологийн дээд сургууль нар хамтран зохион байгуулсан "Миний оролцоот нийгэм" сэдэвт гэмт хэрэг, зөрчлөөс урьдчилан сэргийлэх шторкийн тэмцээн амжилттай зохион байгуулагдаж дууслаа. Тэмцээний хүрээнд оюутан залуучууд идэвх санаачилгатай оролцож 25 төрлийн шторк ирсэн бөгөөд мэргэжлийн байгууллага шүүгчдийн бүрэлдэхүүнээс шилдэг 4 байрыг шалгаруулсан юм.

“Миний оролцоот нийгэм” сэдэвт тус тэмцээнийг зохион байгуулснаар оюутан залуус гэмт хэрэг, зөрчлөөс урьдчилан сэргийлэх өргөн цар хүрээний мэдлэгтэй болох, цаашид дүү нартаа үлгэр дуурайлал үзүүлэх, өөрсдийн дуу хоолойгоо хийж буй бүтээлээрээ иргэд олон нийтэд хүргэх давуу талтай юм.

Тэмцээний хүрээнд идэвх санаачилга гарган иргэдэд постер зургаар дамжуулан сэрэмжлүүлэг мэдээлэл хүргэсэн оюутан залуучуудад болон тэмцээнийг зохион байгуулахад гүн туслалцаа үзүүлж хамтран ажилласан "Хүрээ" мэдээлэл холбоо, технологийн дээд сургуулийн хамт олон талархал илэрхийлье.

Эх сурвалж: ЦЕГ