“Оюутолгойн сонсголд гэрчээр оролцогчдын нэрсийг хасч, нэмэх боломжгүй“

УИХ-ын гишүүн П.Ганзориг Оюу толгойн сонсголтой холбоотой асуудлаар мэдээлэл өглөө.

Тэрбээр, "Оюутолгойн хянан шалгах түр хороо энэ оны долдугаар сарын 02-нд байгуулагдсан. УИХ-ын хянан шалгах түр хороо хуульд заасны дагуу зургаан сарын дотор ажлын хэсэг байгуулж, нээлттэй сонсголынхоо товын талаар олон нийтэд мэдээлэх ёстой. Үүний дагуу товоо зарласан. Нийтдээ 20 орчим хянан шалгах шинжээч нар сүүлийн гурван сарын хугацаанд ажилласан. Сүүлийн 16 жилийн хугацаанд Оюутолгойн төсөлтэй холбоотой явагдсан процессын талаар мэдээллийг өгнө.

Тухайлбал, Оюутолгойн гэрээтэй холбоотой УИХ-аас гарч байсан тогтоолуудад тусгасан гэрээний нөхцөлүүд, монголын талын өгөөжийг нэмэгдүүлэх асуудлыг бодит байдал дээр хэрэгжээгүй байдаг.

2018 оны гуравдугаар сард УИХ-ын гишүүн Д.Тэрбишдагвын ахалж байсан ажлын хэсэг маш сайн ажиллаж Оюутолгойн гэрээтэй холбоотой долоон асуудлыг УИХ-ын тогтоолоор батлуулсан ч, үүнээс 100 хувь хэрэгжсэн заалт нэг ч байхгүй. Дөрвөн заалт нь огт хэрэгжээгүй. Үүнтэй холбоотой бодитой мэдээллийг олон нийт авах нь зөв гэж үзэж байгаа.

Нээлттэй сонсголд оролцох нийт 300 орчим гишүүн байгаа. Хянан шалгах түр хороо ямар нэгэн байдлаар хуульд тусгаагүй үйл ажиллагаа хэрэгжүүлэхгүй. Анхнаасаа Оюутолгойн гэрээг байгуулахад Монголын тал 50 хувиас дээш өгөөж хүртэнэ гэдэг хүлээлттэй байсан. Гэтэл өнөөдөр бид баялгаа ашиглуулаад өндөр хүүтэй зээлийн өрөнд ороод явж байгаа. Үүнийг цаашид шийдэх хэрэгтэй. Уг нь энэ асуудал УИХ-ын тогтоолоор хэд хэдэн удаа хөндөгдөж байсан. Гэтэл шийдээгүй. Шийдээгүй, болохгүй байгаа шалтгаан нь юу юм бэ гэдгийг олон нийт харах хэрэгтэй. Үр дүнд хүрээгүй бодит шалтгааныг олон нийт мэдэж, дүгнэлт хийгээсэй гэж хүсч байна.

Хянан шалгах хороонд гишүүд мөн мэргэжлийн шинжээчид ажиллаж байгаа. Шинжээчид сүүлийн гурван сарын хугацаанд 65 мянган материал цуглуулсан. Мөн гэрчээр дуудагдсан гишүүдийг нэмж хасах боломжгүй. Мэргэжлийн шинжээчид хуулийнхаа дагуу хараат бусаар нэрсээ гаргасан гэв.

Эх сурвалж: News.MN